Galates 5 - Ma Zhiklè

Va-nza taraʼa a sam mpraʼa

¹ Kristi a mpre nga, aman nga praʼa a vava. Gar haha va-nze taraʼa, kin gu ɓèlè ara hala ɓai!

² Na haha, iyè Paul, i gaɗa kinè: Aman kin ngél ngwon, ara ndohi Juif, Kristi skwi ambalai a sam kinè.

³ I ngreda na ndo staɗ staɗ tèlèba zaʼa; aman a ngél ngwon sèi man a jèjèr ma kita tèlèba ndèzl.

⁴ Aman kin woy a kin ngècè ngi-zuraʼa te ma kita Zhiklè, kin kezla a nda Kristi, a kin kèlè auda te pombai.

⁵ Nga zhèr ngi-zuraʼa te ndav. Aman sèi nga zhèrèʼa te Mèzhèɓ a ncè-a-ndav.

⁶ Aman te Kristi Yèsu, ko ngwon nʼngela, ko ngwon nʼngel ɓai, skwi ambalai; sèi ncè-a-ndav te mwoy-ndo.

⁷ Kin hüno amba amba. Nzlatsede kinè a hi wa, a kin fi gèɗ a ma nzuraʼa azɓai?

⁸ Ma man ta fa kinè a gèɗ arsa, a shkè te nengaʼa man a baha kinè ka ɓai.

⁹ Movar mɓeslaʼa kèshkata a ɓesla movar tèlèba.

¹⁰ I huro, te Bi Zhiklè, kinè ba kin hur ara ga. Aman ndo man a dzakaɓama kinè gèɗ, a ngècè kita Zhiklè, ko wawa.

¹¹ Aman iyè, dalahimam ga, man i njè ma nʼngél ngwon, ndohi Juif ta parahayè èhèmè? Man arsa, njèma ga a géɗ wof ngézlèl Yèsu nara skwi nslafaɗama ta sak asakaɓai.

¹² Dara tengaʼa man ta dzakaɓa kinè, ta tsuɓa va ta a ri ta.

¹³ Aman kinè, dalahimam ga, Zhiklè a baha kinè a sam mpraʼa. Aman va-gu maya, aman a géɗ man kin pra tʼuda ma, kin va na civèɗ a ntétékè te va kinè ɓai. Aman te mwoy-ndo, ngiɗè da takaha ngiɗè, ngiɗè da takaha ngiɗè.

¹⁴ Aman ma kita Zhiklè tèlèba nhumda te ma staɗ: Woy ndo a ndav ngaya ara man ka woy nshèffè ngaya.

¹⁵ Aman kin bèzl va, a kin ndi va kinè a ma dai, va-gu maya, man ɓai kin ndeva va kinè!

Nyi Mèzhèɓ Zhiklè

¹⁶ Aman i gaɗa: Vo-do te Mèzhèɓ, kin dzodzor ntétékè va kinè ɓai!

¹⁷ Aman ntétékè ndo a gi var a Mèzhèɓ, a Mèzhèɓ a ntétékè ndo. Ta cèw ta bèzl va, a kin gi skwi man kin woyaʼa azɓai.

¹⁸ Aman Mèzhèɓ Zhiklè a gi bi kinè, kinè tʼhwaɗ ma kita Zhiklè ka ɓai.

¹⁹ Skwi man ndohi ta giaʼa te ntétékè ta, a ngrédè auda ara: ngi mphömè, skwi nlizhèa, mbizhè zlawa,

²⁰ ngi vrai, mʼmbèh skwai, ngi mayam, ngi ndav, srak, ndzoan, mbèzl va, tiflè man a kezla ta ndohai, njèjèr ma civèɗ Zhiklè ngiɗè,

²¹ ntétékè, njèjèr zom, nʼndi skwi ketsam-ketsamaʼa, a skwi tsaɗ tsaɗ aranta man i gaɗa kinè nshèlèkuraʼa, a i gèɗè zaʼa: Tengahi man ta gi arsa, ta da ndi kokwar-Bi Zhiklè azɓai.

²² Skwi man a shkè auda te Mèzhèɓ: Mwoy ndo a ndav, mwuffe, gumai, nzhèr skwi a ma ma, ndo a se ka te va, ndav amba, nlèɓèslèa,

²³ ndav nlüɓekwaʼa, ngshè va; ma kita Zhiklè a gedassa skwi haha azɓai!

²⁴ Aman ndohi man te Yèsu Kristi, ta gezlala ntétékè va tengaʼa, a skwi man a woyaʼa.

²⁵ Aman nga nzi a nshèffè te Mèzhèɓ, sèi nga jèjèr Mèzhèɓ ba.

²⁶ Nga da woy nʼnjèl ambali ɓai, nga da poko ta gèɗ auda a ndohi ɓai, nga da gu srak a géɗ ndo ngiɗè ɓai!