Ezéchiel 47 - Ma Zhiklè

Iyam nshèffè

¹ Te deɓaʼa a ndiyè a deɓa a ntamagi gi Zhiklè. A i rka iyam a hakaɗauda tʼhwaɗ ntamagai, te civèɗ mvèng pats. Ntamagi Zhiklè man a ma mwinèʼa a civèɗ mvèng pats. A iyam a nhakaɗauda tʼhwaɗ zlazlar gi Zhiklè à tsagai, a sam mvi skwi a Zhiklè, te civèɗ man a dukwaɗ.

² Te deɓaʼa a ndiyè a pa a ntamagi te civèɗ man a géɗèʼa, a ndiyè auda, a i sawala tʼuda a ntamagi tʼuda, man a zhè te civèɗ mvèng pats. A i rka iyam a hakaɗauda te zlazlar te civèɗ man a dukwaɗ.

³ A mdo, a gaɗa nlivè skwi te rai, a civèɗ mvèng pats, a nlivèʼa: a tsi ri 1.000. A ngaɗayè: Do a pa! A i beza a va iyam, a ndika, ta a deɓ sak.

⁴ Te deɓaʼa a nlüv zaʼa: a tsi ri 1.000, a ngaɗayè: Do a pa! A i beza a va iyam, a ndika, ta godor.

⁵ A nlüv zaʼa: a tsi ri 1.000, a iyam a grè a grè, i slalia a i bizhè a pa a sak asaɓai, sèi ndè auda a madandav. Woyam mbiaʼa, man ndo a bizhè a pa a sak azɓai.

⁶ A ngaɗayè: Ka ndo, ka rka dè? Te deɓaʼa a ndiyè a deɓa a dzah woyam.

⁷ Aman i do deɓa, i rka wofhi kumba te tsagi woyam cèw.

⁸ A ngaɗayè: Iyam haha a hi auda te civèɗ mvèng pats, a hi a hèshèkèɗ, a hi a va iyam mbiaʼa, man boma te pa; a iyam a ngwode na a iyam njènaʼa.

⁹ A skwi man a nshèffè tèlèba man a shèwèlè te iyam tèlèba, a sam tèlèba man iyam a hi a pa, a nzi a nshèffè. A klèfihi ta da gi kumba. Aman iyam haha a ndikè a pa, iyam a ngwode na a iyam njènaʼa.

¹⁰ A ndohi mpèr klèf ta da nzi a pa. A hinè te En-Guédi, ha ndè En-Eglaim ta da wuzhè lata ta. Klèf a gi kumba holholaʼa te pa, ara klèf, ara klèf te iyam mbiaʼa.

¹¹ Aman sam a ma iyam, magangaɓ, ta ngwèdè iyam te pa azɓai. Ta gi boma te pa.

¹² Te tsagi woyam sa cèw, wofhi tsaɗ tsaɗ man ta ndi nyièʼa, a ta grè a pa. Vahaʼa a wushè azɓai, a nyièʼa a ndev auda te pa azɓai. Tiɗè samaʼa, tiɗè samaʼa ta yi wuda, a géɗ man ta ngècè iyam a sam man a hakaɗauda a sam nkezlaʼa. Nyi tengaʼa a gi a skwi nʼndai, vah tengaʼa a gi a madzaf.

Kuma herkeda ndohi Israel

¹³ Gar haha Bi Zhiklè a gaɗa: Na haha kuma herkeda man kin va ta ndohi Israel te verzi ta 12, a skwi nʼndi gi ta. Joseph a ngècè skwi cèw.

¹⁴ Staɗ staɗ tèlèba te ndev kinè da ngots skwi nʼndi gi lèmèlèmè, tèlè lèmèlèmè. I goɗ a mʼmbèɗè i woy a i va ta a babhi kinè; gar haha sèi kin ngècè herkeda haha a skwi nʼndi gi kinè.

¹⁵ Na haha kuma te civèɗ man a géɗèʼa, a hinè a ma iyam mbiaʼa: te civèɗ Hethlon, ha ndè Tsedad.

¹⁶ Hamath, Bérotha, Sibraim man a zhè te ndev Damas a Hamath. Hatzer-Hatticon, man a zhè a ma kuma Havran.

¹⁷ Kuma a dè a ma iyam mbiaʼa, a Hatsar-Enon, herkeda Damas te man a géɗèʼa, a herkeda Hamath; nasa civèɗ man a géɗèʼa.

¹⁸ Civèɗ mvèng pats: Woyam Jourdain, te ndev Havran, Damas a Galaad a kokwar Israel. A hinè a ma iyam mbiaʼa, te civèɗ mvèng pats, ha ndè Thamar; nasa civèɗ mvèng pats.

¹⁹ Civèɗ man a dukwaɗ: A hinè te Thamar, ha ndè a ma iyam Meriba te Kadès, a sam ndzurv iyam, ha ndè a ma iyam mbiaʼa. Nasa civèɗ te dukwaɗ.

²⁰ Civèɗ nkèl pats: Iyam mbiaʼa a hinè a ma kuma te dukwaɗ, a dè zuraʼa a ma Hamath. Nasa civèɗ nkèl pats.

²¹ Va-kezla herkeda haha a va kinè, ara verzi Israel.

²² Va-gu jimèr a va kinè, a va ndohi man verzi ta tsaɗ man ta zhè a sam kinè, man ta yi wudahi a sam kinè. Ta lèmèlèmè ara wudahi Israel tas. Sèi da ngots skwi nʼndi gai a jimèr a nda kinè te ndev verzi Israel.

²³ Verzi man ndo mbrok, va-va na skwi nʼndi gi na a pa, Bi Zhiklè a gaɗa.