Ezéchiel 40 - Ma Zhiklè

Gi Zhiklè a nrka na di a Ezéchiel

¹ Aman nga te ɓèlè, te mvi 25, te nhin via, a ki nshèlèkuraʼa, mʼmèn 10, mvi 14 te deɓ man ta duma kokwar Jérusalem, a pats nasa Mèzhèɓ Ndo nzi pèc pècèk a mshkè a géɗ ga, a ndiyè

² a kokwar Jérusalem te nshunè, a nʼnzedyè a hai a géɗ za mbiaʼa. I rka skwi ngiɗè mbiaʼa zuraʼa a ma ga, ara kokwar.

³ A ndiyè a pa. Na haha ndo ngiɗè a zhè te pa, va nengaʼa ara züdo. Gada te rai, a teɓa nlivè skwai, a nzlatsa a ntamagi kokwar.

⁴ A ndo a ngaɗayè: Ka ndo, winè di ngaya, fu zlembaɗ, war skwi tèlèba man i da ngra ka. Ka zhè a haha, aman i da ngra ka. A skwi tèlèba man ka da rkaʼa, ngra ta ndohi gi Israel!

⁵ Na haha, zlazlar a tèuda gi a pa tʼuda. Gada nlivè skwai te ri ndo sa, a tsi ri 6 – ntsi ri staɗ a hwaɗ ri staɗ a vaʼa. A nlüv nckè nengaʼa: a tsi ri 6. Ngurè nengaʼa ba, a tsi ri 6.

⁶ A mdo a sam ntamagai, te civèɗ mvèng pats, a nteva sam ntiv-nti-vè, a nlüva ntamagai: nckè nengaʼa a tsi ri 6.

^7-10 Hwaɗ gala a ntamagai: ngur nengaʼa a tsi ri 6, nguzlohaʼa a tsi ri 6. Hwaɗ gala a ntamagai, tuna makar, tuna makar, mbi ta lèmèlèmè makar tèlèba. A sak gihi mbiaʼa lèmèlèmè te civèɗ ngiɗè te civèɗ ngiɗè. Sak gala a tsi ri 6, ntamagi ntʼhwaɗaʼa a tsi ri 6. A nlüvo dalmagai: a tsi ri 8, a sak gihi nengaʼa: a tsi ri cèw. Sam a ntamagai a zhè tʼhwaɗaʼa.

¹¹ A nlüv vèvèɗ ntamagai: ntamagai, nte ndevaʼa, a tsi ri 10. Ngurè ntamagai a tsi ri 13.

¹² Hwaɗ gala nʼngelaʼa te maʼa: atsi ri 1 te civèɗ ngiɗè, a tsi ri staɗ te civèɗ ngiɗè. Hwaɗ gala a tsi ri 6 te civèɗ ngiɗè, a tsi ri 6 te civèɗ ngiɗè.

¹³ A nlüv ntamagi tʼhwaɗaʼa, a hüno a sam gi staɗ. Ngur nengaʼa a tsi ri 25. Ntamagi ngiɗè zuraʼa a ngiɗè.

¹⁴ A nlüvo gi nʼngalaʼa: a tsi ri 20. Gi nʼngelaʼa a ntamagai, herkeda ndizlèa a sam tèlèba.

¹⁵ A ntamagai man ta bizhè a pa, ha ndè a hwaɗ gala a ntamagi tʼhwaɗaʼa, a tsi ri 50.

¹⁶ A hwaɗ gala, a sam sak gi tengaʼa, a ntamagi tʼhwaɗaʼa, nvakavarhi a zhè a sama tèlèba, lèmèlèmè a sam gi nʼngalaʼa, a der gi tʼhwaɗ gala tèlèba; a ta vèhda vah gangar a pa a sam sak gai.

Sam nʼngalaʼa tʼuda

¹⁷ A ndiyè a sam nʼngalaʼa tʼuda. Na haha sam kalakhi tsaɗ tsaɗ, ntila a sam nʼngalaʼa tèlèba. Sam 30, samaʼa ndizlaʼa.

¹⁸ Sam ndizlaʼa a zhè a tsagi ntamagai, nlèmdè a ntamagai, sam ndizla ngiɗè tʼhwaɗaʼa.

¹⁹ A nlüv civèɗ, a hüno a ntamagi tʼhwaɗaʼa a ndè a ntamagi sam nʼngalaʼa tʼhwaɗaʼa: a tsi ri 100.

²⁰ A nlüv ngurèʼa a nguzlohaʼa a ntamagi man a zhè te civèɗ man a géɗèʼa, te gala tʼuda.

²¹ Nengaʼa ba, ta gu ngaldauna, ngaldauna, nengaʼa ba a sak gi na a hwaɗ gala na, lèmèlèmè ara ntamagi nshèlèkuraʼa: ngurèʼa a tsi ri 50, nguzlohaʼa a tsi ri 25.

²² Nvakavarhi na, a hwaɗ gala na a vah gangar mvèhaʼa a pa, lèmèlèmè ara ntamagi nshèlèkuraʼa. Skwi ntiv-ntivè nengaʼa 7, a hwaɗ gala na a ma.

²³ Ntamagihai ta zhè a sam gala tʼhwaɗaʼa, zuraʼa a ntamagihi man ta zhè te civèɗ dukwaɗ, te civèɗ mvèng pats. A ntamagi ngiɗè, ha ndè a ntamagi ngiɗè, a nlüva a tsi ri 100.

²⁴ Te deɓaʼa a ndyè a civèɗ dukwaɗ. Na haha ntamagi a zhè te civèɗ man a dukwaɗ: a nlüva hwaɗ gala na, sak gihi na, a gi nengaʼa nʼngalaʼa. Nliv ta lèmèlèmè.

²⁵ Ntamagai a sam nengaʼa nʼngalaʼa, a nvakavar tèlèba, lèmèlèmè ara nvakavarhi nshèlèkurhiaʼa. A tsi ri 50 te civèɗ ngurèʼa, a tsi ri 25 te civèɗ nguzlohaʼa.

²⁶ Skwi ntiv ntivè nengaʼa 7, a hwaɗ gala a maʼa, a vah gangar mvèhdaʼa a pa, a sam sak gihi nengaʼa, a sam ngiɗè ngiɗè.

²⁷ A sam nʼngalaʼa tʼhwaɗaʼa, ntamagi a zhè te civèɗ dukwaɗ, a tsi ri 100, a hinè a ntamagi te dukwaɗ ngiɗè a sam ngiɗè.

Sam nʼngalaʼa tʼhwaɗaʼa

²⁸ A ndiye a sam nʼngalaʼa tʼhwaɗaʼa. Nga beza a ntamagi te dukwaɗ, a nlüv ntamagi te dukwaɗ, lèmèlèmè ara nshèlèkurhiaʼa.

^29-30 Hwaɗ gala na, sakhiaʼa, a sam nengaʼa nʼngalaʼa, mbia lèmèlèmè ara nshèlèkurhiaʼa. A ntamagai, a sam nengaʼa nʼngalaʼa, nvakavarhi a sam tèlèba. Te civèɗ ngiɗè, a tsi ri 50, ngurèʼa; te civèɗ nguzlohaʼa a tsi ri 25. Hwaɗ gala man a sam nʼngalaʼa tʼuda, vah gangar mvèhdaʼa a pa a sam sak gai;

³¹ skwi ntiv ntivè a pa 8.

³² Te deɓaʼa a ndiyè a sam nʼngalaʼa tʼhwaɗaʼa, te civèɗ mvèng pats, a nlüv ntamagai; mbia lèmèlèmè ara nshèlèkurhiaʼa.

³³ Hwaɗ gala na, sak gi nengaʼa, a sam nengaʼa nʼngalaʼa, mbia lèmèlèmè ara nshèlèkuihiaʼa. Ntamagi a sam nʼngalaʼa a nvakavar a sam tèlèba. Ngur nengaʼa a tsi ri 50, nguzlohaʼa a tsi ri 25.

³⁴ Hwaɗ gala nengaʼa, a ma sam nʼngalaʼa tʼuda, a vah gangar mvèhèʼa a sam sak gai te civèɗ ngiɗè, te civèɗ ngiɗè; skwi ntivè a pa 8.

³⁵ Te deɓaʼa a ndiyè a sam ntamagai te man a géɗèʼa, a nlivèʼa. Mbi nengaʼa lèmèlèmè ara nshèlèkuraʼa.

³⁶ Hwaɗ gala na, sak gi nengaʼa, sam nʼngalaʼa, a nvakavarhi nengaʼa a sam nengaʼa tèlèba. Ngur nengaʼa a tsi ri 50, nguzlohaʼa a tsi ri 25.

³⁷ Hwaɗ gala a ma sam nʼngalaʼa tʼuda, a vah gangar mvèhèʼa a sam sak gai te civèɗ ngiɗè te civèɗ ngiɗè; skwi ntiv ntivè a pa 8.

³⁸ Gi a zhè, ntamagi nengaʼa a sam nʼngalaʼa tʼhwaɗaʼa a ntamagai. Ta pèn skwi man ta ndara na Zhiklè te pa.

³⁹ Tʼhwaɗ gala a ntamagai, table cèw a zhè, te civèɗ ngiɗè, te civèɗ ngiɗè, man ta zlèhè skwi man ta ndara na Zhiklè a pa; skwi a géɗ malai, a géɗ mphömè.

⁴⁰ A tsagia tʼuda, man ta dè a ntamagi te civèɗ man a géɗèʼa, table cèw ta zhè, tʼhwaɗ gala ntamagi te civèɗ ngiɗè, table cèw.

⁴¹ Te civèɗ ngiɗè, te civèɗ ngiɗè a ntamagai, table 4, a gi tèlèba table 8, a ta zlèhè skwi a pa.

⁴² Table 4 ngiɗè ta zhè, a ta ndèr skwi a pa; table kwa, staɗ staɗ tèlèba, ngurè nengaʼa a nguzlohaʼa a tsi ri 1½. Njüv na a tsi ri 1. A pa ta peda kolongwi mizlinè man ta zlèhè skwai a ta ndèr skwai.

⁴³ Züdo a ntèuda te maʼa, hwaɗ ri 1, ngulɓaʼa a hwaɗaʼa. Ta da feda zluèɗ man ta zla na Zhiklè a pa, a table.

⁴⁴ A ndiyè a sam nʼngalaʼa tʼhwaɗaʼa. Na haha samhi ngiɗè tsaɗ ta zhè, cèw a ntamagi tʼhwaɗaʼa. Ngidè a civèɗ ntamagi te man a géɗèʼa, mwinèʼa a civèɗ dukwaɗ; ngiɗè a ntamagi te dukwaɗ, mwinèʼa a civèɗ man a géɗèʼa.

⁴⁵ A ngaɗayè: Gi te dukwaɗ, a ndohi mvi skwi a Zhiklè man ta gi mizlinè te gai.

⁴⁶ Aman gi te civèɗ man a géɗèʼa, man ndohi mvi skwi a Zhiklè ta gi mizlinè a sam mvi skwi a Zhiklè. Tengaʼa wudahi Tsadok, te va wudahi Lèvi, man ta herda na va a Ndo nzi pèc pècèk, a ta gi mizlinè nengaʼa.

⁴⁷ A nlüva sam nʼngalaʼa tʼhwaɗaʼa; ngurè nengaʼa a tsi ri 100, nguzlohaʼa a tsi ri 100, tsagi 4 lèmèlèmè. Sam mvi skwi a Zhiklè a zhè zuraʼa a ma gi Zhiklè.

⁴⁸ A ndiyè a hwaɗ gala gi Zhiklè, a nlüv sak gai hwaɗ gala: a tsi ri 5, civèɗ ngiɗè ngiɗè; ntamagi a tsi ri 14; dergi a tsagi ntamagai, civèɗ ngiɗè ngiɗè a tsi ri 3.

⁴⁹ Hwaɗ gala, ngur nengaʼa a tsi ri 20, nguzlohaʼa a tsi ri 11; skwi ntiv ntivè 8 man ta dè a pa. Sakhiaʼa nzlatsedaʼa a tsagi gi Zhiklè; ngiɗè te civèɗ ngiɗè, ngiɗè te civèɗ ngiɗè.