Ezéchiel 39 - Ma Zhiklè

Gog ngedas na

¹ Aman ka, ndo, hod ma a géɗ Gog, a ka gaɗa: Bi Zhiklè a goɗ ar haha: Di man a ngaya ma, Gog, bi mbiaʼa te Rosh, te Mèshek, te Tubal!

² I da geda ka gèɗ, i da bidka ka te civèɗ man a géɗèʼa dra, a i de ka a géɗ za Israel.

³ I da ngezlama ka lèkèɗ auda te ri gula ngaya, a sulom te ri mandi ngaya.

⁴ Kinè a ndohi var ngaya, a ndohi herkeda man ta zhè a sam ngaya, kin da kèlèhi a géɗ za Israel. I va ka a mangayakihai, a skwi tèlèba man kelpasl a va te dak, a ta da nde ka ma.

⁵ Ka da kèlèhi te dal var, te man iyè, i goɗa, Bi Zhiklè a gaɗa.

⁶ I zlinda ta vogwa a gèɗ a Magog a ndohi herkeda man a ntsoko gèɗ auda te iyam, man ta nzi amba amba; a ta da suna, i Ndo nzi pèc pècèk.

⁷ I da ngreda nzlembaɗ ga nkezlaʼa te ndev Israel, ndohi ga. I va ta civèɗ a ta dérɗè nzlembaɗ ga te deɓaʼa asaɓai; ndohi herkeda ta da suna, iyè Ndo nzi pèc pècèk, Zhiklè Israel nkezlaʼa.

⁸ A vava skwi a da gi arsa! Bi Zhiklè a gaɗa. Nasa pats man i goɗ a géɗ nengaʼa.

⁹ Te deɓaʼa ndohi Israel man ta te kokwar mbiaʼa, ta da shkè auda, a ta da vècè vogwa a skwi var, a ta ti skwi a vna, gambar a lèkèd a sulom a géɗ-gaɗa a tsakwal; mvi 7 ta da vècè vogwa a vna.

¹⁰ Ta dè shègwa a dak azɓai, ta dè shègwa a hèshèkèɗ azɓai, te man ta vècè vogwa a skwi var. Ta da gi metsar ndohi man ta gu metsar a sam ta zlèzlèʼa, ta helama ta skwi a ndohi man ta helama ta skwi te va nasa, Bi Zhiklè a ngoɗo.

¹¹ A pats nasa i woy a i va na gi dzavi a Gog te Israel: dal Abarim, a ma iyam mbiaʼa, te civèɗ mvèng pats, a ta da ɓer civèɗ ndè a slrats sa. A pa ta da ri nda Gog a ndohi var nengaʼa, a ta da baha na dal ndohi Gog rèdèdèʼa.

¹² Ndohi Israel ta da re ta ki 7, a ta til kokwar te ri tengaʼa.

¹³ Ndohi tèlèba te kokwar ta da rzl ta. A pats man i da nzala va ga, a i gi a skwi nslébèrdè ta, Bi Zhiklè a gaɗa.

¹⁴ Ta da par ta ndohi man ta zeɓi kokwar pèc pècèk: njèkèɗi nckondohi ta zhè di dè? A ta til kokwar. Te deɓ ki 7 ta jèkeda mizlinè sa.

¹⁵ Aman ta dè a ta zeɓi kokwar, a ndo ngiɗè a nrka nckondo, da va na kwa a tsagai, ha ndohi nri ndo ta da rda a dal ndohi Gog.

¹⁶ Aranta sèi ta til kokwar.

Israel a ngècè skwi na a deɓa

¹⁷ Aman ka, ndo, gaɗa ta ɗiakihai, a skwi tèlèba, man kelpasl a va, a skwi dak tèlèba: Bi Zhiklè a gaɗa: Va-haya va, va-hakadai! Te sam tèlèba va-hakadai a skwi nʼndi ngolala ga man i tila kinè. Skwi nʼndi ngolala mbiaʼa a géɗ za Israel. Kin ndi zluèɗ, kin si Pombaz.

¹⁸ Kin ndi zluèɗ ngul ndohai, kin si Pombaz wud bihi herkeda. Ta tèlèba ara drokihai, tambakihai, mazawalhai, marihai, skwi kuɗom ngraʼa te Basan.

¹⁹ Sèi kin ndi mbeza, ha a ngeza kinè. Kin si pombaz, ha a ngeza kinè, a sam skwi nʼndi ngolala man i tila kinè.

²⁰ Kin ngézhè hwaɗ a sam skwi nʼndi ga, a plèsh a ndohi plèsh, a ngul ndohai, a ndohi var, Bi Zhiklè a gaɗa.

²¹ A i da ngrédè nʼnjèl ga auda te ndev ndohi herkeda, a ndohi herkeda tèlèba ta da rka kita ga man i gau, a ri ga man i lama ta a vna.

²² A ndohi gi Israel ta da suna, i Ndo nzi pèc pècèk, Zhiklè tengaʼa, a hinè a pats sa, ha ndè a ma ma a mèdèp.

²³ A ndohi herkeda ta da suna, ndohi gi Israel ta gu a ɓèlè a géɗ mali ta, a géɗ man ta gu mali a sam ga, a i ngheda va ga a sam ta, a i pe ta a ri mayamhi tengaʼa, a ta bazl ta tèlèba a tsakwal.

²⁴ I ga ta kita a géɗ skwi nlizhèa a mali ta, a i ngheda va ga a sam ta.

²⁵ Gar haha Bi Zhiklè a goɗ ar haha: Antanta i woya a i helka ta ndohi ɓèlè Jacob a deɓa. Ndohi gi Israel tèlèba ta siyè te va, i gi srak a géɗ nzlembaɗ ga nkezlaʼa.

²⁶ Hori tengaʼa a mali tengaʼa tèlèba man ta gu a sam ga, a da pca ta a gèɗ, aman ta da nzi amba amba te kokwar ta; ndo a da pra ta zlau a va azɓai,

²⁷ aman i helka ta a deɓa te ndev ndohi herkeda, man i ɓic ta a deɓa te herkeda mayamhi ta, a i ngreda va ga auda a sam ta, i Zhiklè i kezla, a sam di ndohi herkeda.

²⁸ Te deɓaʼa ta da suna, i Ndo nzi pèc pècèk, Zhiklè tengaʼa, a géɗ man i hel ta ndohi a ɓèlè, aman antanta i ɓicka ta zaʼa a kokwar ta, i jèka ndo a pa ɓai, ko staɗ.

²⁹ I da ngheda va ga te deɓaʼa asaɓai, a géɗ man i va ta Mèzhèɓ ga a gèɗ Israel, Bi Zhiklè a gaɗa.