Ezéchiel 36 - Ma Zhiklè

A géɗ Israel

¹ Ka ndo, hod ma a géɗ zahi Israel, a ka gaɗa: Zahi Israel, va-tsena ma Ndo nzi pèc pècèk!

² Bi Zhiklè a goɗ ar haha: Ndo maya a goɗ a géɗ ngaya: Ah, ah, ah! Ngedassa a mèdèp! Nga ngotso!

³ Hod ma a ka gaɗa: Bi Zhiklè a gaɗa: Ta vaɗaha kinè htsan, a ta woy a ta par kinè a ma te tsagi tèlèba, a kin kala a ri ndohi herkeda ngiɗè, a ndohi ta ngre kinè, a ta tsu tsaval a géɗ kinè.

⁴ Gar haha, zahi Israel, va-tsena ma Bi Zhiklè: Bi Zhiklè a gaɗa ta zahai, a ngègèdhai, a vara, a nkulgodokihai, sam mʼmbeɗahai, a kokwar dikai, man njèkèɗi ndohi ta dumaʼa, a ta tsu wagèsh a géɗèʼa:

⁵ a géɗ nengaʼa Bi Zhiklè a gaɗa: a vava srak a kedyè, a i gèɗèʼa a géɗ kokwarbihi ngiɗè, a géɗ Edom tèlèba man ta duma kokwar ga, a ta ndedama a mwuffè te ndav, a ta durɗo te ndav ta.

⁶ Gar haha hod ma a géɗ herkeda Israel! Ka da gaɗa ta zahai a ngègèdhai a slrats a nkulgodokihai: Bi Zhiklè a goɗ ar haha: Na haha i goɗ a ndzoan a srak ga: I goɗ a ndav, a géɗ man ndohi ta derde kinè.

⁷ Gar haha Bi Zhiklè a gaɗa: I cè ri a zhiklè. Ndohi herkeda a tsagi kinè, nderdè-ndo tengaʼa a da ngwoda ta va a gèɗ.

⁸ Aman kinè, zahi Israel, sèi kin tsi ara wof a kin yi skwi a Israel, ndohi ga. Aman ta da shkè ngwi ndul ndul ma.

⁹ Na haha i nza kinè a deɓa zaʼa, a kin pi-zhè a kin zleki skwai.

¹⁰ I gi aman ndohi ngaya ta mènè a ma ma, ndohi gi Israel tèlèba. Ndohi ta da nzi te kokwar, a ta da ɗèɗèyè diki a pa zaʼa.

¹¹ I gi aman ndohi a skwi kuɗom ta mènè a vata. Ta zlèzlè-mè a ma ma, a ta yi wuda. I da ge kinè kumba ara halaʼa, i da ga kinè skwi man amba a fena nshèlèkuraʼa; a kin da suna, i Ndo nzi pèc pècèk.

¹² Ndohai, Israel, ndohi ga, ta da shèwèlè te kokwar ngaya, ta da nzi te pa, a ka gi a skwi nʼndi gi tengaʼa; ka da helama ta wud tengaʼa asaɓai.

¹³ Gar haha Bi Zhiklè a gaɗa: Ta gaɗa ka: Halaʼa ka ndo nkeɗa ndo, ka helama ta wuda a ndohi ngaya.

¹⁴ Anai sèi ka da kédè ndo asaɓai, a ka da helama ta wuda a ndohi ngaya asaɓai, Bi Zhiklè a gaɗa.

¹⁵ Ndohi nte deɓa ta derde ka ani asaɓai, a ndohi herkeda ta ngwossaha ka asaɓai, Bi Zhiklè a gaɗa.

Nzlembaɗ Zhiklè nkezlaʼa

¹⁶ Ndo nzi pèc pècèk a ngaɗayè ar haha:

¹⁷ Ka ndo, ndohi Israel ta nza te kokwar ta, a ta gedas ta a maya nshèffè tengaʼa man ambaɓai. Civèɗ tengaʼa nlizhèʼa a sam ga lèmèlèmè ara ngwoz man hwaɗ a va.

¹⁸ A i ga ta ndzoan a va, a géɗ man ta keɗa ndo te kokwar, a géɗ skwi mbèh skwai man ta lizhèʼa a vna.

¹⁹ Te deɓaʼa i dzam ta auda te kokwar ta, a i ksar ta a géɗ herkeda, i ga ta kita ara maya nshèffè ta, ara skwi man ta gau.

²⁰ To do a sam ndohi herkeda, a ta derde nzlembaɗ ga nkezlaʼa, ha ta goɗ a géɗ tengaʼa: nasa ndohi Ndo nzi pèc pècèk; ta slalia ta nzi a kokwar tengaʼa asaɓai.

²¹ Aman nzlembaɗ ga nkezlaʼa a laydyè, man ndohi Israel ta derɗaʼa te ndev ndohi herkeda, man ta nzakaɗa sam ta.

²² Gar haha gaɗa ta ndohi Israel: Bi Zhiklè a goɗ ar haha: Skwi man i giaʼa, a gi a géɗ kinè ka ɓai, ndohi Israel; aman a géɗ nzlembaɗ ga nkezlaʼa, man kin derɗaʼa te ndev ndohi herkeda man kin nzakaɗa sam ta.

²³ I da kuzlko nzlembaɗ ga mbiaʼa auda, man kin derɗaʼa te ndev ndohi herkeda; a ta da suna, iyè Ndo nzi pèc pècèk, Bi Zhiklè, i goɗa; a i ngrédè va ga auda a sam di ta, a kinè, i Zhiklè nkezlaʼa.

²⁴ I da parka kinè a deɓa tʼherkeda tèlèba. I da ɓic kinè, a i de kinè a deɓa a ngwai a kokwar kinè.

²⁵ Te deɓaʼa i da pan kinè a iyam nkéɗècèʼa, a kin pana. I da pan kinè te skwi man a lizhè kinè tèlèba, te mʼmbèh skwi kinè tèlèba.

²⁶ I da va kinè ndav mɓuaʼa a mèzhèɓ mɓuaʼa a ndav kinè. I da cè ndav man ngwora ara kwa auda te va kinè, a i va kinè ndav man ara gwoli va kinè.

²⁷ I da va kinè mèzhèɓ ga a ndav kinè, a i gi aman kin jèjèr ma nkwèr ga a ma kita ga zuraʼa.

²⁸ Te deɓaʼa kin da nzi te kokwar man i va ta babhi kinè, a kin ndi a ndohi ga, iyè i gi a Zhiklè kinè.

²⁹ I da pan kinè skwi nlizhèʼa auda a va tèlèba, i cko dau a hai a gi a vata, a mi a ga kinè asaɓai.

³⁰ I gi aman nyi wof a zhè a vata, a skwi te dak, a kin ngècè hori a di a sam ndohi herkeda azɓai a géɗ mi man a keɗ kinè.

³¹ Te deɓaʼa kin da hér civèɗ kinè man ambaɓai, a skwi man ambaɓiaʼa man kin gau a ndara kinè, a géɗ mali kinè a skwi hori man kin gau.

³² Skwi man i giaʼa, i gi a géɗ kinè ka ɓai, Bi Zhiklè a gaɗa. Sei kin shinèʼa. Hori da keɗ kinè, gèɗ kinè da dzakaɓ na, a géɗ civèɗ kinè, ndohi gi Israel!

Nɗèɗèyè kokwar zaʼa

³³ Gar haha Bi Zhiklè a gaɗa: A pats man i da pan kinè te mali kinè tèlèba, i da pe ta ndohi a kokwar zaʼa, a i da ɗèɗèyè diki zaʼa.

³⁴ I da til kokwar ngedassaʼa zaʼa, te deɓ man a nde na hèshèkèɗ ma, a sam di ndohi tèlèba man ta beza a pa.

³⁵ A ndohi ta da gaɗa: Kokwar haha man ngedassa, a nda lèmèlèmè ara gi lak Eden. A kokwar man a nde na dikai, man ta gedassaʼa, a ta mbeɗdahai, ani ndo te pa, nʼngala te pa.

³⁶ Te deɓaʼa njèkèɗi ndohi man ta zhè a tsagi kinè, ta da suna, i Ndo nzi pèc pècèk, man i ɗèɗèyè skwi mʼmbeɗaʼa zaʼa, a i ngi skwi a pa a herkeda man a nde na hèshèkèɗ te va nasa. Iyè Ndo nzi pèc pècèk i goɗa a i da giaʼa.

³⁷ Gar haha Bi Zhiklè a gaɗa: Aman ndohi Israel ta tsi ri a iyè, i céʼa, a i gi skwi haha a sam tengaʼa a vaʼa: a ndohi ta gi a vata ara rèwè tambak.

³⁸ Ndohi ta zlèzlèmè te kokwar man ngedassaʼa halakai, lèmèlèmè ara rèwè tambak mɓicaʼa, man ta va na Zhiklè te Jérusalem a pats ngolala; a ta da suna, i Ndo nzi pèc pècèk.