Ezéchiel 34 - Ma Zhiklè

Ndohi mɓer skwai man ta gi falai

¹ Ndo nzi pèc pècèk a ngaɗayè ar haha:

² Ka ndo, hod ma a géɗ ndohi mɓer skwi te Israel. Hod ma! Ka da gaɗa ta ndohi mɓer skwai: Bi Zhiklè a gaɗa: Wobau a géɗ ndohi mɓer skwi te Israel, man ta wèr di va ta genè! Ndohi mɓer skwai ta wèr skwi ta ka bi dè?

³ Kinè, kin ndi mbar wa, kin vi maslaka mbelaʼa a va, kin zlaha skwi ngraʼa, aman kin wara skwi kinè ɓai.

⁴ Mohtsomb skwai, kin va na wuɗi ɓai. Skwi man mbelakaɓai, kin slambaɗda ɓai. Skwi man mblè a va, kin mana na ɓai. Skwi man nksaraʼa, kin ɓickoɗa deɓa ɓai. Skwi man nze na, kin hosso ɓai, a skwi man wuɗi na zhè, kin pasla na gèɗ a hi a wuɗai.

⁵ Tambakihi ga ta ksar ta, a géɗ man ndo mɓer ta azɓai, a skwi dak a nde ta ma.

⁶ A géɗ za tèlèba, a géɗ ngégédhi tèlèba, tambakihi ga ta ksar ta, ta zlak ta, a vara tèlèba. Ndo ndzhaɗ ta azɓai, ndo man a nwar ta azɓai.

⁷ Gar haha ndohi mɓer skwai, va-tsena ma Ndo nzi pèc pècèk!

⁸ Ara man a vava i zhè, Bi Zhiklè a gaɗa: A gèɗ man ta hel ta tambakihi ga a ma, a skwi dak a nde ta ma, a ndohi nwar ta azɓai, a ndohi mɓer skwi ga ta wara tambakihi ɓai, aman ta war di va ta genè – tambakihi ka ɓai –

⁹ kinè ndohi mɓer skwai va-tsena ma Ndo nzi pèc pècèk!

¹⁰ Bi Zhiklè a goɗ ar haha: I gi kita a géɗ ndohi mɓer skwai! I jhèɗè tambakihi ga te ri tengaʼa. I da va ta civèɗ a nwèr skwi ga asaɓai, ndohi mɓer skwai ta da wèr di va ta asaɓai. I da ngezlama ta tambakihi ga auda te ma ta, ta slalia ta nde ta asaɓai.

Ndo nzi pèc pècèk, ndo mɓer skwai

¹¹ A vava, Bi Zhiklè a gaɗa: Na haha i woy a i wèr tambakihi ga a ri ga, a i lè ta.

¹² Ara man ndo mɓer skwai, a wèr rèwè na a pats man iyam a ndombozlor a shkè, man tambakihi na ta ksar ta, i woya a i ɓer tambakihi ga, a i mbalka ta a deɓa a sam tèlèba man ta ksar ta a pa, a pats man vani a zhè, a pats ruva.

¹³ A i de ta auda te va ndohi herkeda, a i ɓicka ta a deɓa te kokwar bihai, a i helka ta a deɓa a kokwar bab ta, a i war ta a gèɗ za Israel, te nkulgodok, a sam nʼnzi tèlèba te kokwar.

¹⁴ I da war ta a sam nɗaʼa, mandi ta a géɗ za Israel mbiaʼa. Sèi ta mènè a pa a sam mandi mbelaʼa, a ta ndi skwi mbelaʼa a géɗ za Israel.

¹⁵ Iyè i wèr tambakhi ga a ri ga, a i lè ta, Bi Zhiklè a gaɗa.

¹⁶ I hèsh skwi man a zlak na, i hulkoɗi skwi man a ksar na, a deɓa; skwi mpaslaʼa i manaʼa; skwi man wuɗi na azɓai i tsa na mbazlav; a i wèr skwi ngraʼa a skwi man wuɗi na zhè, a i da war ta amba zuraʼa.

Kokwar-bi gumai

¹⁷ Kinè, tambakihi ga, Bi Zhiklè a gaɗa: I bèzlè kita a sam tambakihi ga, ngiɗè a ngiɗè, a drokihai a mazawalhai.

¹⁸ Aman kin ndi mandai a sam mbelaʼa, a slra kinè bi dè? A kin gatseda njèkèdiaʼa a pa a sak èhèmè? Aman kin si iyam nkuzlèrèʼa, a slra kinè bi dè? A kin dhwoɗa njèkèdiaʼa a sak èhèmè?

¹⁹ A tambakihai ta ndi skwi man ka gatseda pa a sak, a ta si iyam man kin dhwoɗaʼa a sak kinè.

²⁰ Gar haha Bi Zhiklè a gaɗa: Na haha i woy a i bèzlè kita a ri ga te ndev tambakihi ngraʼa a ngreɓiaʼa,

²¹ a géɗ man kin tse ta tambakihi man wuɗi ta azɓai, a drom, ha kin dzam ta aussa.

²² I woy a i takaha ta tambakihi ga, aman skwa da ga ta bai; a i bèzlè kita a sam tambakihai, ngiɗè a ngiɗè, ngiɗè a ngiɗè.

²³ I woy a i va ta ndo mɓer ta staɗgenè, man a war ta: David, ɓèl ga, a da war ta, a gi a ndo mɓer ta.

²⁴ Iyè, Ndo nzi pèc pè-cèk, i gi a Zhiklè ta; a David, bèl ga, a gi a kra bai te ndev kinè. Iyè Ndo nzi pèc pècèk, i goɗa.

²⁵ I woy a nga derzlè ma gumi a nda ta, a i dzam ta skwihi dak tèlèba auda te kokwar. A ta nzi a hèshèkèɗ a ta mènè a hwaɗ wof nhayaʼa.

²⁶ I woy a i va ta iyam mblèkwai, iyam nzlekai, a iyam via tiɗè samaʼa. Iyam man a pshè ta ma.

²⁷ Te deɓaʼa wof te dak a vi skwai, a herkeɗa a da ftsko skwi auda. Ta da nzi te kokwar ta, skwa a ga ta azɓai, a ta da suna, i Ndo nzi pèc pècèk, man i da proslama ta wof nkelawa te daʼai ta, a i mbel ta auda te ri ndohi man ta ge ta a ɓèlè.

²⁸ Ndohi nte deɓa ta da hel ta a ma azɓai, a skwi dak a nde ta azɓai; aman ta nza, skwa a ga ta azɓai, ndo a pra ta zlau a va azɓai.

²⁹ I woy a i tila ta gi lak man ta wèl va te pa, a ta da tiɗè a mi te kokwar asaɓai, a ndohi nte deɓa ta slalia ta derɗa ta asaɓai.

³⁰ Te deɓaʼa ta da suna, iyè Ndo nzi pèc pècèk, Zhiklè tengaʼa, a tengaʼa, ndohi Israel, ndohi ga, Bi Zhiklè a ngoɗa.

³¹ Kinè tambakihi ga, tambakihi man a rèwè ga. Iyè, Ndo nzi pèc pècèk, Zhiklè kinè, Bi Zhiklè a ngoɗa.