Ezéchiel 32 - Ma Zhiklè

Nguzlah a géɗ Pharaon

¹ Te mvi 12, aki 12, mʼmèn nshèlèkuraʼa, Ndo nzi pèc pècèk a ngaɗayè ar haha:

² Ka ndo, hün ntsi nguzlah a géɗ Pharaon, bi Egypte, a ka gaɗa na: Ka ara gol marizhèlè te va ndohi herkeda, ka gedassa! Ka ara kedam te iyam mbiaʼa, ka vèɗ iyam a htsan, ka dhwoɗa iyam a sak ngaya, man ka mbatsa a draɓ.

³ Gar haha Bi Zhiklè a gaɗa: I wusheda lata ga a géɗ ngaya, a i gska ka a vna.

⁴ I kalde ka a herkeda, i tseda ka gèɗ a dala, a ɗiakihi tèlèba ta ngézhè hwaɗ a ka.

⁵ I feda zluèɗ ngaya a hi a géɗ za, i ndheda nkulgodokihai a zluèɗ ngaya nhuslaʼa.

⁶ I ruɓ herkeda a duwè ngaya, a slratsihi a Pombaz ngaya.

⁷ Aman ka metsi ngaya i pizlè giɗfèk, a banti a hel sam azɓai; i da pats a hwaɗ vanai, a kia a dè na ruva.

⁸ Skwi nhel sam te giɗfèk tèlèba ta nde ta a ruva, a ruva a gi a géɗ kokwar ngaya, Bi Zhiklè a gaɗa.

⁹ I gi aman ndohi herkeda kumba ta gi zlau, aman i da hel ta ndohi ngaya a ɓèlè, a kokwar man ka sun ɓai.

¹⁰ A géɗ ngaya i pa ta zlau a gèɗ a ndohi herkeda kumba. Bihi kokwar ta gudzai, aman i da gidè tsakwal ga a sam di ta. Aman ka kalahai, zlau a da dza ta, staɗ staɗ tèlèba a gi zlau a géɗ nshèffè na.

¹¹ Gar haha Bi Zhiklè a gaɗa: Tsakwal bi Babel a da shkè a géɗ ngaya.

¹² Ngul ndohai ta da bèzlè nhèyè ndohi ngaya; ta tèlèba ta ga shèwa ka bai. Ta da gédèshè nʼnjèl Egypte, a nhèyè ndohi nengaʼa ta gedas ta.

¹³ I da gédèshè skwi nengaʼa tèlèba te va iyam mbiaʼa. Ko ndo, ko skwai, da mbatsa a pa a ndhwoɗaʼa bai.

¹⁴ Te deɓaʼa i da kéɗèc iyam, a woyam a hi ara mbar, Bi Zhiklè a gaɗa,

¹⁵ aman i da gédèshè kokwar Egypte, a ndohi te pa ta ze ta, a i bazl ta ndohi te pa tèlèba; a ta da suna, iyè Ndo nzi pèc pècèk.

¹⁶ Nasa nguzlah, man dalahi ndohi herkeda ta tsiaʼa. Ta tsiaʼa a géɗ kokwar Egypte, a géɗ nhèyè ndohi nengaʼa, Bi Zhiklè a gaɗa.

Nʼnga ta ndohi herkeda mè?

¹⁷ Te mvi 12, te mʼmèn 15, Ndo nzi pèc pècèk a ngaɗayè:

¹⁸ Ka ndo, gu wobau a géɗ ndohi Egypte rèdèdèʼa, a kinè a dalahi ndohi herkeda, va-zukde ta hai! I daʼa a vèvèɗ a hwaɗaʼa, a sam ndohi dzavai, a nda ndohi man ta te vèvèɗ tʼhwaɗaʼa.

¹⁹ Wuɗi ngaya mbiaʼa klèng, a ka dè vèvèɗ a sam ndohi man ngwon nʼngel ɓai!

²⁰ Kin dè a va ndohi man ta bazl ta a tsakwal, a va nhèyè ndohi nengaʼa.

²¹ Ngul ndohai man ta te gi dzavai, ta da gaɗa na: A mshkèhai, a mènè a sam ndohi ntakaha, a sam ndohi man ngwon nʼngel bai, man tsakwal a mbazl ta.

²² Assyrie a zhè a ndohi nengaʼa tèlèba.

²³ Gi dzavi tengaʼa a zhè te vèvèɗ tʼhwaɗaʼa. A tsagi gi dzavi sa, ndohi nengaʼa rèdèdèʼa, ndohi man tsakwal a mbazl ta tèlèba, man to do vèvèɗ, man ngwon nʼngel ɓai, man te va nasa ta pra ta zlau a va ndohi tʼherkeda, man ta zhè a nshèffè tèlèba.

²⁴ Elam a zhè a nhèyè ndohi nengaʼa, te gi dzavi nengaʼa tèlèba. Tèlèba ndohi man ta bazl ta a tsakwal, man to do vèvèɗ, ngwon nʼngel bai, man te va nasa ta pra ta zlau a va ndohi tʼherkeda man ta zhè a nshèffè; antanta ta ngots hori a di a sam ndohi man to do vèvèɗ.

²⁵ A mènè a va ndohi mbazlaʼa, te ndev nhèyè ndohi nengaʼa tèlèba, te gi dzavi na. Ta tèlèba, man ngwon nʼngel ɓai, man ta bazl ta a tsakwal. A géɗ man ta pra ta zlau a va ndohi tʼherkeda man ta zhè a nshèffè, ta ngècè hori a di antanta a sam ndohi man to do vèvèɗ, a ta mènè a va ndohi mbazlaʼa.

²⁶ Méshec a Tubal ta zhè, a nhèyè ndohi tengaʼa tèlèba, te gi dzavi tengaʼa, ndohi man ngwon nʼngel bi tèlèba, man ta bazl ta a tsakwal, man ta pra ta zlau a va ndohi tʼherkeda man ta zhè a nshèffè.

²⁷ Ta mana bai a sam slagamhai, ngul ndohi zlèzlèa, man to do vèvèɗ a skwi var a va tèlèba, man ta pe ta a gèɗ a tsakwal tengaʼa, a ta peda gambar a deɓ vatasl ta, aman ndohi herkeda tèlèba ta gu zlau wuɗi ngul ndo tengaʼa.

²⁸ Ka ba, Pharaon, sèi ka dè a va ndohi man ngwon nʼngel bai, a sam ndohi man ta bazl ta a tsakwal.

²⁹ Edom a zhè a bihi nengaʼa, a wud bihi nengaʼa tèlèba, man ta dè a va ndohi man ta bazl ta a tsakwal, ko wuɗi ngul ndo tengaʼa a zhè. Sèi ta dè a va ndohi man ngwon nʼngel bai, a sam ndohi man to do vèvèɗ.

³⁰ Nta wud bihi te civèɗ man a géɗèʼa, tèlèba, a ndohi Sidon tèlèba, man to do vèvèɗ, tsakwal a mbazl ta, ko wuɗi ta a zhè. Sèi ta dè a va ndohi man ta bazl ta a tsakwal, man ngwon nʼngel bai, a ta ngècè hori adi a sam ndohi man to do vèvèɗ.

³¹ Aman te deɓaʼa Pharaon a da rka ta; a skwi man a ga ta nhèyè-ndohi na a pa na a pa a ndav. Pharaon a ndohi var nengaʼa tèlèba, tsakwal a bazl ta, Bi Zhiklè a gaɗa.

³² Aman nengaʼa a mpra ta zlau a va ndohi tʼherkeda man ta zhè a nshèffè; gar haha a dè a va ndohi man ngwon nʼngel bai, a nda nhèyè ndohi nengaʼa tèlèba, a sam ndohi man ta bazl ta a tsakwal, Bi Zhiklè a gaɗa.