Ezéchiel 30 - Ma Zhiklè

Kita a géɗ ndohi herkeda

¹ Ndo nzi pèc pècèk a ngaɗayè ar haha:

² Ka ndo, hod ma! Goɗo: Bi Zhiklè a goɗ ar haha: Vo-ngoy va! Ayah! Ayah! Pats ambaɓai!

³ Aman pats ngiɗè staɗ ndul ndul, pats Ndo nzi pèc pècèk a zhè ndul ndul, pats ruva ntéɗèɗikaʼa, a géɗ man tiɗè sam ndohi nte deɓa ma.

⁴ Tsakwal a shkè a kokwar Egypte. Kokwar Ethiopie a gudzai, aman ndohi ta bazl ta te Egypte a tsakwal, aman ta da duma skwi mèshèlè nengaʼa, a ta mbeɗa kokwar kala verziaʼa ba.

⁵ Ethiopie, Puth, Lud, kokwar Arabie tèlèba, Lub a ndohi man ta mba ma a nda ta, ta bazl ta a tsakwal tèlèba.

⁶ Gar haha Ndo nzi pec pècèk a gaɗa: Ndohi man ta takaha Egypte, ta da kèlèhai, a wuɗi nengaʼa mbiaʼa a ndiv na. A hinè te Migdol, ha ndè Syène, ndohi ta da bèzl ta a tsakwal, Bi Zhiklè a gaɗa.

⁷ Ta da kuɗai te va ndohi herkeda man ta kuɗai, a ta ngrè kokwarhi nengaʼa a va kokwar dikai.

⁸ A ta da suna, i Ndo nzi pèc pècèk, man i fa na vogwa a Egypte, a ndohi ntakaha tèlèba ta wush ta hai.

⁹ A pats nasa, ndohi sak ga ta dè a wurom, a ta mbeda Ethiopie man a nza a gumai. Ta da ɓerzl ta a pats matakwan Egypte, aman pats matakwan a shkè.

¹⁰ Gar haha Bi Zhiklè a gaɗa: I woya a i gi, a Nebucadnetsar, bi Babel, a ngedassa skwi man Egypte a giaʼa.

¹¹ Nengaʼa a ndohi na, ndohi man ta ge shèwa ka ɓai, ta da shkè a ta da gedassa kokwar. Ta da gidè tsakwal ta a géɗ Egypte, a ta da ndha kokwar a ndohi mbazlaʼa.

¹² Woyam a da gwor na, a i va ta kokwar a ri a ndohi ambaɓihiaʼa. I ndeda kokwar a hèshèkèɗ, a skwi tèlèba te pa, a i pe ta a ri ndohi man verzi ta tsaɗ. Iyè, Ndo nzi pèc pècèk, i goɗa.

¹³ Gar haha Bi Zhiklè a gaɗa: I da gédèshè skwi mbèh skwi nlizhèʼa, a i da ndev ta zhiklèhi mbèh skwai auda te Noph. Wud bihi a te kokwar Egypte asaɓai. A i gi aman kokwar Egypte tèlèba a gi zlau.

¹⁴ I da gedassa Pathros, i da fa na vogwa a Tanis, i da ga na kita a Noph.

¹⁵ I da kalda na ndzoan ga a gèɗ a Sin, kokwar man bi Egypte a gu bi te pa, a i zede ta ndohi rèdèdèʼa te Noph.

¹⁶ I da fa na vogwa a Egypte. Sin a da gudzi kworkworaʼa. Noph ta zlinèʼa, a ta mbeda zlazlar na, a ta dumaʼa a pats tʼuda.

¹⁷ Golahi On a Pi-Béseth ta bèzl ta a tsakwal, a ndohi kokwar ta dè ɓèlè.

¹⁸ Te Tachpanès pàts a dè na zhiklè, aman i pasla gaɗa bi Egypte te pa, a i gedassa wuɗi nengaʼa mbiaʼa te pa. Ruva a da gi a kokwar sa, a dalahi nengaʼa ta dè ɓèlè.

¹⁹ I da ga na kita a kokwar Egypte, a ta da suna, i Ndo nzi pèc pècèk.

²⁰ Te mvi llaʼa, a ki 1, mʼmèn 7, Ndo nzi pèc pècèk a ngaɗayè ar haha:

²¹ Ka ndo, paslama na ri a Pharaon, bi Egypte, ndo mʼmana bai, ndo nʼnga madzaf a pa bai, ta pa na zungwa a pa ɓai, aman a dè gshè tsakwal zaʼa.

²² Gar haha Bi Zhiklè a goɗ ar haha: I ga na matakwan a Pharaon, bi Egypte. Ri na man wuɗi na zhè, man mpasla, iyè mpaslaʼa, a tsakwal a nkèl na te ri na.

²³ I da ksar ta ndohi Egypte a va ndohi herkeda, a i venda ta gèɗ a kokwar ngiɗè.

²⁴ I va na wuɗi a ri a bi Babylone, i va na tsakwal ga a rai, a i paslama na ri a bi Pharaon, man a dè ngèy va ara ndo man a ndi va mʼmetsai.

²⁵ I da va na wuɗi a ri a bi Babylone; aman ri Pharaon a wush na hai. A ta da suna, i Ndo nzi pèc pècèk, man i va na tsakwal ga a ri a bi Babylone, a ngiɗèʼa a gèɗ kokwar Egypte.

²⁶ I da ksar ta ndohi Egypte a ndev ndohi herkeda, i da venda ta gèɗ a kokwar ngiɗè, a ta da suna, i Ndo nzi pèc pècèk.