Ezéchiel 29 - Ma Zhiklè

Egypte, Israel a Babylone

¹ Te mvi makulaʼa, a ki 2, mʼmèn 12, Ndo nzi pèc pècèk a ngaɗayè ar haha:

² Ka ndo, ngwoda ma a civèɗ Pharaon, bi Egypte, a ka hod ma a géɗ nengaʼa, a géɗ kokwar Egypte tèlèba!

³ Hod ma a ka gaɗa: Bi Zhiklè a goɗ ar haha: Di man a ngaya ma, Pharaon, bi Egypte! Ka kedam mbiaʼa, man ka mènè te woyam Nil a ka gaɗa: Woyam Nil a ga ga, iyè a ngau.

⁴ I va ka jir a ngerɗak ngaya, a klèfi te woyam ngaya ta totpaha ka va. I cka ka auda te woyam ngaya, a klèfi te woyam ngaya tèlèba ta da totpaha ka va.

⁵ I da kaldeka ka auda a hèshèkèɗ, kinè a klèfi te woyam ngaya tèlèba. Kin da mènè a dala, kin huslè a dala wunap, a skwi dak a ɗiakihai ta nde ka a ma.

⁶ A ndohi Egypte tèlèba ta da suna, i Ndo nzi pèc pècèk. Ndohi Israel ta thè va a ka, ara man ta thè va a pandar ambalai.

⁷ Aman ta gs ka, ka gurɓ ngaya, a ka bazlama ta rai. Aman ta thè va a ka, ka pasl ngaya a ta verzi ta te godor.

⁸ Gar haha Bi Zhiklè a gaɗa: Na haha i zlinda ka tsakwal a va, a i zedkoɗi ndohi a skwi kuɗom auda a sam ngaya.

⁹ Kokwar Egypte a ndi na hèshèkèɗ, a kokwar dikai; a ta da suna, i Ndo nzi pèc pècèk. A géɗ man a gaɗa: Woyam Nil a ga ga, iyè a ngau.

¹⁰ A géɗ nengaʼa i ga ka kita a gèɗ, a gèɗ woyam Nil ba. I da gédèshè kokwar Egypte, a ndi a dikai, a hinè te Migdol, ha ndè Syène, ha ndè a ma kokwar Ethiopie.

¹¹ Ndo a da mbatseda sak a pa ɓai, ko sak skwi ndzham. Ndo a da nzi a pa azɓai, skwi a da gi a pa azɓai, ha a gi mvi 40.

¹² I da gédèshè kokwar Egypte te ndev kokwarhi ngedassaʼa, te ndev kokwarhi man ta mbeɗ ta; mvi 40. I da ksar ta ndohi Egypte a va ndohi herkeda, i da venda ta gèɗ a géɗ herkeda.

¹³ Gar haha Bi Zhiklè a gaɗa: Te deɓ mvi 40 i da ɓicka ta ndohi Egypte a deɓa te ndev ndohi herkeda man i ksar ta a pa.

¹⁴ I da helka ta ndohi bèlè, ndohi Egypte, a deɓa a kokwar Pathros, kokwar man ta cüzlko va te pa. Te pa ta gi a kokwar-bi nhüdok genè.

¹⁵ Ta da greka ta auda te gèɗ a ndohi ngiɗè azɓai. I da ngelaha ndohi aman ta gi a vata azɓai, a ta gi bi a géɗ ndohi herkeda azɓai.

¹⁶ Israel a da gshè va a Egypte asaɓai. Aman a woy a humdè va a vna, mali na haha a sam Zhiklè a da haka na a gèɗ. A ta da suna, i Ndo nzi pèc pècèk.

¹⁷ Mvi 27, a ki nshèlèkuraʼa, mʼmèn nshèlèkuraʼa, Ndo nzi pèc pècèk a ngaɗayè:

¹⁸ Ka ndo, Nebucadnetsar, bi Babylone, a mva ta mizlinè mwuɗitpa a ndohi var nengaʼa, a géɗ Tyr. Gèɗ ndo staɗ staɗ tèlèba kurndazlndazlaʼa, nkelbadza mɓerzl na. Aman ko nengaʼa, ko ndohi var nengaʼa, ta ngatsa skwi ntul ta bai, a géɗ mizlinè man ta gu te Tyr.

¹⁹ Gar haha Bi Zhiklè a gaɗa: Na haha i va na kokwar Egypte a ri a Nebucadnetsar, bi Babylone. Nengaʼa a da cè skwi mèshèlè nengaʼa a ma, a da gi metsar ndohi ndumaʼa, a da gi a skwi ntul ndohi var na.

²⁰ I da va na kokwar Egypte a skwi man a ngècèʼa a géɗ mizlinè na, Bi Zhiklè a gaɗa.

²¹ A pats nasa i va ta wuɗi a ndohi Israel. A i winè ka ma ngaya, Ezéchiel, a ka gèɗè te ndev tengaʼa zaʼa, a ta da suna, i Ndo nzi pèc pècèk.