Ezéchiel 27 - Ma Zhiklè

Nguzlah a géɗ Tyr

¹ Ndo nzi pèc pècèk a ngaɗayè ar haha:

² Ka ndo, tsu nguzlah a géɗ Tyr! Ka gaɗa na Tyr man a nza a ma woyam mbiaʼa, kokwar man a gi gani a ndohi herkeda te civèɗ tsaɗ tsaɗ tèlèba: Bi Zhiklè a gaɗa:

³ Tyr man ka gaɗa: lyè ara wurom mbelaʼa, i amba zuraʼa!

⁴ Kokwar ngaya te ndev iyam mbiaʼa.

⁵ Tsagi wurom ngaya ta gu a wof lakalak te Senir, a zolom wof nte ndevaʼa ta gu a lakalak te Liban.

⁶ Ta gu skwi nwurr wurom a wof tsna te Basan. Géd wurom ta gu a zlèʼèn fakawai, ntèuda pa a wof ɗawai te Kittim.

⁷ Bata ngaya, a maslaka ntsentsai mvècèʼa te Egypte, géɗ wurom ngaya ta gu a maslaka vèvèzh nduzoʼa a mʼmadzaʼa man ta ckoɗi a ma woyam Elisha.

⁸ Ndohi Sidon a Arvad ta wurr wurom ngaya, ndohi maya te ndev ngaya ta hèdèʼa.

⁹ Ndohi nhalaʼa te Guébal a nda ndohi maya ta, ta til sam ngedassa te wurom. Wuromhi tèlèba, a ndohi nhèdè wurom tèlèba, ta shkè a kokwar ngaya, a ta gi ganai.

¹⁰ Ndohi var ngaya ta shkè te Perse, Lud a Puth. Ta ktsalda gambar a dzokwom gèɗ a sam ngaya, ta dzazla ka va.

¹¹ Ndohi Arvad ta zlatsa a géɗ zlazlar ngaya a nda ndohi var ngaya, a ndohi Gammad ta zhè te gi ngaya ngurèʼa, ta ktsalda gambar a zlazlar ngaya, a ta ga ka skwi man amba zuraʼa.

¹² Tarsis a ngu gani a sam ngaya, a géɗ skwi mèshèlè ngaya kumba. Ka humbèdè skwi a verzhègenè, züdo, guro nengaʼa.

¹³ Javan, Tubal a Méshec ta gu gani a sam ngaya. Ta va ka ɓèlè a kolongwi züdo te di skwi man ka prèʼa.

¹⁴ Ndohi Togarma ta shum skwi te ri kinè a plèsh, a plèsh var a kdèhihai.

¹⁵ Ndohi Dedan ta gu gani a sam ngaya. Herkeda a ma woyam kumba, ta gu gani a nda kinè. Ta tsokolko ka zlèʼèn fakawai, a wof mʼmadzaʼa.

¹⁶ Edom a ngu gani a sam ngaya, a géɗ man skwi ngaya kumba: Ta helka ka skwi daʼai, a kwa mbelaʼa, maslaka vèvèzh, ntsentsai, bata maslaka.

¹⁷ Juda a kokwar Israel ta gu gani a sam ngaya. Dau te Minnith a ntemas, a vongwom, a mbar a votok a ɓurdi.

¹⁸ Damas a ngu gani a sam ngaya, a géɗ man skwi ngaya kumba. A géɗ skwi mèshèlè ngaya a mpra ka barassa te Helbon, a gogumai te Suhar.

¹⁹ Vedan a Javan, a hinè te Uzal, ta gu gani a sam ngaya: ɗaf züdo, a masara, a skwi nvrè te di lak.

²⁰ Dedan a ngu gani a sam ngaya, a mpra ka maslaka mpi a deɓ plèsh.

²¹ Kokwar Arabie a bihi Kédar tèlèba ta gu gani a sam ngaya: wud tambakihai, drok, mazawalhai.

²² Ndohi gani Séba a Raema ta gu gani a sam ngaya: skwi nvrè lak, a kwa mbelahiaʼa tsaɗ tsaɗ a guro.

²³ Charan, Canné a Eden ta gu gani a sam ngaya. Ndohi gani Assyrie a Séba a Kilmad tèlèba ta gu gani a sam ngaya.

²⁴ Ta gu gani maslaka mbelaʼa a dawar vèvèzh mʼmadzaʼa a gadabu maslaka, maslaka ara dago, teɓa mʼminèʼa ndazlaʼa.

²⁵ Wurom Tarsis ta sawala a géɗ iyam mbiaʼa a skwi ngaya. Ka ngots skwi mèshèlè kumba, ka ngots nʼnjèlè a géɗ iyam mbiaʼa.

²⁶ Ndohi nhèdè wurom ngaya ta hul kolongwi ngaya a géɗ iyam. A kozlar te civèɗ mvèng pats a mʼmbeɗa wurom ngaya te ndev iyam.

²⁷ A skwi mèshèlè ngaya, a kolongwi ngaya, a skwi gani ngaya, a ndohi ngaya man ta hèdè wurom a ndohi man ta til wurom a ndohi gani ngaya a ndohi var ngaya man ta nza a sam ngaya, a ndohi rèdèdèʼa tèlèba man ta zhè a sam ngaya, ta dè a hwaɗ iyam, a pats man ka zi ngaya.

²⁸ A géɗ lalau ndohi nhèdè wurom ngaya, dzah woyam a gudzai.

²⁹ A ndohi nhèdè wurom ta hi auda te wurom tèlèba, ta tèlèba man ta wurr wurom, man ta til wurom ta dè auda a dzah woyam.

³⁰ A ta tsi lalau a géɗ ngaya a ta gi wobau, ta peda hutsoɗ a gèɗ, a ta nzi a va mèrwèc.

³¹ Ta shè gèɗ a géɗ ngaya, ta feda maslaka sam kuɗa a va, ta kuɗai a géɗ ngaya a ka layde ta.

³² Ta hinè ntsi nguzlah a géɗ ngaya, ta kuɗ ka. Ngedas na te ndev woyam mbiaʼa ara Tyr wa?

³³ A skwi gani man a shkè te iyam mbiaʼa, ndohi kumba ta ngots skwi a sam ngaya, a hwaɗ ta nʼngeza. A skwi mèshèlè ngaya mbiaʼa a kolongwi gani ngaya ka ga ta bihi herkeda a ndohi mèshèlè.

³⁴ Ani ma, ka gedassa a géɗ iyam mbiaʼa man ka za tʼhwaɗaʼa. Gani ngaya a ndohi ngaya rèdèdèʼa man ta nza a sam ngaya, ta ze ta a hwaɗaʼa.

³⁵ Ndohi tèlèba a ma woyam mbiaʼa ta kuɗai a géɗ skwi man a ga ka, ta gudzai a ta pi di zlau.

³⁶ Ndohi ganai te ndev ndohi herkeda ta fkwè ka a gèɗ. Ka kal ngaya a hi ɓaf klèng – ka gedassa a mèdèp.