Ezéchiel 24 - Ma Zhiklè

Shiɗèf a vogwa

¹ Ndo nzi pèc pècèk a ngaɗayè, te mvi macüdaʼa, a ki 10, mʼmèn 10, ar haha:

² Ka ndo, windo pats mpatsna! Bi Babylone a kala na va a kokwar Jérusalem a patsna.

³ Goɗ a tsaval ma a géɗ ndohi mèdègèɗ: Bi Zhiklè a goɗ ar haha: Ngeda shidèf a vogwa, a ka gedzeda iyam a pa!

⁴ A ka peda zluèɗ a pa. Para zluèɗ mbelembelaʼa, godoraʼa, ɗuaraʼa, a ka ndheda a vatasl hruf-hrufaʼa.

⁵ Co te va tambaki nsuɗekɗekaʼa, feda a vogwa, a ka tu zluèɗ a nda vataslaʼa.

⁶ Gar haha Bi Zhiklè a gaɗa: Wobau a géɗ kokwar man a keɗa ndo, a géɗ shidèf man hezi a pa, a hezi a mpeza auda a pa bai. Ta da porko zluèɗ auda te pa staɗ staɗ, ta goyè a géɗèʼa azɓai.

⁷ Aman Pombaz man ta badahi a zhè a pa dai, a géɗ pra, ta vsha na herkeda a di bai.

⁸ I bada Pombaz nengaʼa a géɗ pra lèmèlèmè, a ta vshè herkeda a di azɓai, a géɗ ndzoan ga, a ta pil gèɗ a vna.

⁹ Gar haha Bi Zhiklè a gaɗa: Wobau a géɗ kokwar nkeɗa ndo. I ba i woy a i dèsl shègwa mbiaʼa.

¹⁰ Por shègwa a vata, va na vogwa, tu zluèɗ, ha ntaʼa, hasla na skwi a dai, mokoyom da she na a pa, a vatasl da ndara na a pa.

¹¹ Te deɓaʼa feda shiɗèf züdo a vogwa adai, a vogwa a ndza na, a vogwa a ntevaʼa, a skwi nlizhè a pa a ndarkaɗ na auda a pa, a ndi hezi nengaʼa a ma.

¹² Aman hezi a pa kumba; vogwa a ndi tèlè azɓai.

¹³ Ka lizhè va ngaya a mphömè. I woy a i pan ka, aman ka pènè azɓai, te skwi man a lizhè ka. Ka lizhè mènè, ha a i rufa ndzoan ga a sam ngaya.

¹⁴ Iyè Ndo nzi pèc pècèk i goɗa. A skwi haha a shkè, i giaʼa, i jèkè azɓai, ndo a siyè te va azɓai, i ngwèdè gèɗ ga azɓai. I ga ka kita, ara maya nshèffè ngaya, ara skwi ngaya man ka gau, Bi Zhiklè a gaɗa.

Ngwoz Ezéchiel a metsi na

¹⁵ Ndo nzi pèc pècèk a ngaɗayè ar haha:

¹⁶ Ka ndo, skwi man di ngaya a wuffè a géɗèʼa, i woy a i cèma ka a wuɗai. Aman ka tsi lalau a va azɓai, ka da kuɗi azɓai, ka gi wobau azɓai.

¹⁷ Ɗüsh te ndav genè! Ka tsu nguzlah bai! Paɗa gèɗ ngaya, feda kotokoroh a sak, ka paɗda bozozom a pa bai, a ka ndau ɗaf sam kuɗa, man ta ckoɗa a sam kuɗa ɓai!

¹⁸ A prèk ka da gaɗa ta ndohai. A dakwaɗaʼa, ngwoz ga a mʼmets na, ara man Zhiklè a gaɗayè. Te mangoslèmaʼa, i gaɗa ta ndohai, ara man Zhiklè a gaɗayè.

¹⁹ Te deɓaʼa ndohi ta gaɗayè: Ngra nga skwi man ka gi a haha, ka gia èhèmè?

²⁰ A i gaɗa ta: Ndo nzi pèc pècèk a ngaɗayè ar haha:

²¹ Gada ta ndohi Israel: Bi Zhiklè a goɗ ar haha: Na haha, i da ngwoda sam ga nkezlaʼa, a nʼngwode na a sam ambaɓiaʼa – sam mbelaʼa, man kin fu va a vna, man di kinè a wuffè a gèɗ nengaʼa, a mpataka nengaʼa a keɗ kinè. Njèkèdi wudahi a dalahi kinè ta da bazl ta a tsakwal.

²² Kin da gi lèmèlèmè ara man i gau. Kin da paɗda bozozom a pa ɓai, kin da ndi ɗaf sam kuɗa azɓai.

²³ Kin pèdè gèɗ kinè, kin pi kotokoroh a sak kinè, kin tsi lalau azɓai, kin kuɗi azɓai; aman kin zi kinè a gèɗ mali kinè, a kin pi di a va a kin rzl kinè a pa.

²⁴ Te skwi haha Ezéchiel a gi a skwi malwuɗi kinè. Kin da gi lèmèlèmè ara nengaʼa, aman skwi a da gai, a kin da suna, iyè Bi Zhiklè Ndo nzi pèc pècèk.

²⁵ Aman ka, ndo, a pats man i cèma ta sam ta mbelaʼa, skwi man ta wuffè a gèɗ nengaʼa, a ta fi va a vna, skwi man ndav tengaʼa a woyaʼa, wudahi a dalahi tengaʼa,

²⁶ a pats nasa, ndo man a mwuckaɗ na a da shkè a sam ngaya, aman a ngra ka.

²⁷ A pats nasa ma ngaya a winè na, a ka gèdè, ka nzi tètè asaɓai, a ka da gi a skwi malwuɗai a sam ta, a ta da suna, iyè Ndo nzi pèc pècèk.