Ezéchiel 20 - Ma Zhiklè

Te Egypte a ndè Canaan

¹ Te mvi matsaraɗaʼa, a ki 5, mʼmèn 10, matrhiaʼa te va ndohi Israel nhalaʼa ta shkè a ta dzhoɗ Ndo nzi pèc pècèk, a ta nzahi a tsagi ga.

² Ndo nzi pèc pècèk a ngaɗayè ar haha:

³ Ka ndo, gaɗa ta ndohi Israel nhalaʼa ar haha: Bi Zhiklè a goɗ ar haha: Kin shkè a kin dzhadyè dè? Ara man a vava i zhè, i woya aman kin dzhadyè bai, Bi Zhiklè a gaɗa.

⁴ Ka ndo, ka woya ka ga ta kita dè? Aman ka woyaʼa, ngra ta mali bab ta.

⁵ Gada ta: Bi Zhiklè a goɗ ar haha: A pats man i ngotsko Israel auda, i mbaɗa ta ndohi te verzi Jacob, a ri ngeda te zhiklè, i gudoko ta va a dai te kokwar Egypte, a i mbaɗa ta, a ri ngeda te zhiklè, a i gaɗa: Iyè Ndo nzi pèc pècèk, Zhiklè kinè.

⁶ A pats nasa i mbaɗa ta, a ri ngeda te zhiklè, aman i da helka ta auda te kokwar Egypte, a i de ta a kokwar man i woy a i va ta, man wa a vongwom a hi te pa, kokwar mbelaʼa man a fena ngiɗè tèlèba.

⁷ I gaɗa ta: Staɗ staɗ tèlèba da wusheda mali man ambaha di na aussa. Kin lizhè va kinè a skwi mbèh skwi bai! I Ndo nzi pèc pècèk Zhiklè kinè.

⁸ Aman ta gu mèdègèɗ a sam ga, ta woy a ta tsena ma ga bai. Ta wusheda mali man ambaha di ta bai, ta jèkeda mʼmbèh skwi Egypte bai. A i hur ara man i ga ta ndzoan a va, a i pra ta ndzoan ga a gèɗ, te ndev kokwar Egypte.

⁹ Aman a géɗ nzlembaɗ ga i ga ndzoan a vata bai; ndohi nte deɓa da durɗo nzlembaɗ ga bai, te ndev tengaʼa man ta zhè, a sam di tengaʼa man i gudoko ta va a dai, aman i helka ta auda te kokwar Egypte.

¹⁰ Aranta i helka ta auda te kokwar Egypte, a i de ta a ndev hèshèkèɗ.

¹¹ I va ta ma nkwèr ga, a i ngra ta ma kita ga man ndo da dzodzora, aman a nzi a nshèffè.

¹² I ngra ta patshi nshèk va ga, a ta gi a skwi malwuɗi te ndev nga a tengaʼa, a ta suna, iyè Ndo nzi pèc pècèk, man i kezla ndav ta.

¹³ Aman ndohi Israel ta slambaɗkay a va tʼhèshèkèɗ, ta dzadzara ma nkwèr ga bai, ta kwola ma kita ga man ndo da dzodzora aman a nzi a nshèffè. Ta derɗa patshi nshèk va ga, a i hur ara man i pra ta ndzoan a gèɗ tʼhèshèkèɗ, a i da zede ta.

¹⁴ Aman a géɗ nzlembaɗ ga i ga ndzoan a vata Bai; ndohi nte deɓa da durɗo nzlembaɗ ga ɓai, a sam di tengaʼa man i helka ta auda.

¹⁵ Te deɓaʼa i mbaɗa ta tʼhèshèkèɗ, a ri ngeda te zhiklè, aman i de ta a kokwar azɓai man i hur i da va ta, man wa a vongwom a hi te pa, kokwar mbelaʼa man a fena ngiɗè tèlèba,

¹⁶ a géɗ man ta kwola ma nkwèr ga a ta durɗo patshi nshèk va ga, a ndav tengaʼa a ndzodzor skwi mbèh skwai.

¹⁷ Aman ta siyè te va, a i gedas ta ɓai. I zede ta tʼhèshèkèɗ tèlè ɓai.

¹⁸ I gaɗa ta wudahi ta tʼhèshèkèɗ: Kin do a civèɗ babhi kinè ɓai, kin dzodzor tsuf tengaʼa bai, kin lizhè va kinè a mʼmbèh skwi tengaʼa bai!

¹⁹ Iyè Ndo nzi pèc pècèk, Zhiklè kinè! Va-dzodzor ma nkwèr ga, va-gu ara man ma kita ga a gaɗa.

²⁰ Va-kezla patshi nshèk va ga, da gu a skwi malwuɗai te ndev nga a kinè, a ta da suna, iyè Ndo nzi pèc pècèk, Zhiklè kinè.

²¹ Aman wudahi ta gu mèdègèɗ a sam ga, ta lèɓèslè a sam ma nkwèr ga bai, aman ndo ndzodzora a nzi a nshèffè a vna. Ta derɗa patshi nshèk va ga, a i hur ara man i pra ta ndzoan ga a gèɗ, a i ga ta ndzoan a gèɗ tʼhèshèkèɗ.

²² Aman i mendko ri ga a deɓa, i ga ndzoan a vata ɓai, a géɗ nzlembaɗ ga; ndohi nte deɓa da durɗo nzlembaɗ ga bai, a sam di tengaʼa man i helka ta auda.

²³ Te deɓaʼa iyè i mbaɗa ta, a ri ngeda te zhiklè, tʼhèshè-keɗ, aman i woy a i ksar ta a va ndohi nte deɓa, a i venda ta gèɗ a kokwar ngiɗè,

²⁴ a géɗ man ta dzadzara ma nkwèr ga ɓai, ta kwola ma kita ga, a ta derɗa patshi nshèk va ga, a ta pu di a verzi skwi mbèh skwi babhita.

²⁵ A i va ta ma nkèrèman mwuɗitpa, man ta slalia ta jèjèrèʼa azɓai, a ta nzi a nshèffè a vna azɓai

²⁶ Ta lizhè va ta a skwi man ta va na vrai, man ta bezda tsuvomhi ta a ndev vogwa. A i pa ta zlau a gèɗ, a ta suna, iyè Ndo nzi pèc pècèk.

²⁷ Gar haha, ka ndo, gaɗa ta ndohi Israel! Gada ta: Bi Zhiklè a goɗ ar haha: Babhi kinè ta kwolyè a ta derɗyè arsa.

²⁸ I de ta a kokwar man i mbaɗa ta a ri ngeda te zhiklè, man i woy a i va ta. A ta rka za tèlèba, wof ndizlimaʼa tèlèba, a ta zloho skwi ta a pa, a ta va na skwi ta a vri a pa, a ta feda skwi tengaʼa a pa man a zhkè amba, a ta bada skwi nsi a hi a pa.

²⁹ A i gaɗa ta: Géd za mè, man kin dè a pa? A ta baha na ‘Bamah’, ha patsna.

Zhiklè a vérslè a Israel

³⁰ Gar haha gaɗa ta ndohi Israel: Bi Zhiklè a goɗ ar haha: kin lizhè va kinè a maya babhi kinè, a kin jèjèr mʼmbèh skwi tengaʼa dè?

³¹ Aman kin va na skwi a vrai, a kin bezda wudahi kinè a ndev vogwa, kin lizhè va kinè te skwi mbèh skwi ha patsna. A kin dzhadyè a i cè dè, ndohi Israel? Ara man a vava i zhè, Bi Zhiklè a gaɗa, i woya aman kin dzhadyè bai.

³² Skwi man kin hur te gèɗ kinè a da gi azɓai, man kin, gaɗa: Nga woy a nga nzi ara ndohi nte deɓa ngiɗè, a nga slébèrdè wof a kwa.

³³ Ara man a vava i zhè, Bi Zhiklè a gaɗa, i da gi a bi kinè a ri man wuɗi na zhè, a ri ngedaʼa, a ndzoan man i ga kinè.

³⁴ I da helka kinè auda te ndev ndohi kokwar, i da ɓic kinè a deɓa te ndev kokwar man i ksar kinè a pa, a ri man wuɗi na zhè, a ri ngedaʼa, a ndzoan man i ga kinè.

³⁵ I de ta ndohi herkeda a hèshèkèɗ a sam kinè, a i da gi kita kinè a pa.

³⁶ Lèmèlèmè ara man i ga ta kita a babhi kinè tʼhèshèkèɗ te kokwar Egypte, i da ga kinè kita, Bi Zhiklè a gaɗa.

³⁷ I woya aman ka bizhè a hwaɗ gaɗa ndo mɓer skwi ga, a i pe kinè a hwaɗ nderzlè-ma ga.

³⁸ Ndohi man ta slambaɗkay a va a ndohi man ta jèkyè, i da parka ta auda te va kinè, aman ta dè a kokwar Israel azɓai, a kin da suna, i Ndo nzi pèc pècèk.

³⁹ Kinè, ndohi Israel, Bi Zhiklè a goɗ ar haha: Vo-do, staɗ staɗ te ndev kinè da gedassa a skwi mbèh skwi na! Aman te deɓaʼa kin cinè ma ga. A kin derɗa nzlembaɗ ga nkezlaʼa a skwi man kin mbèhèʼa azɓai.

⁴⁰ Aman a géɗ za ga nkezlaʼa, a géɗ za Israel mbiaʼa, ndohi Israel tèlèba ta da gi mizlinè ga, Bi Zhiklè a gaɗa. Te pa i woy a i ce kinè a i jhèɗè skwi man kin ckoɗauda a kin vayè, tsuvom skwai a skwi kinè nkezlaʼa tèlèba.

⁴¹ Aman kin ndaray skwai a zhkèhayè, i ce kinè a pombai, aman i da helka kinè auda te ndev ndohi nte deɓa, a i ɓicka kinè a deɓa te kokwar man i venda kinè gèɗ a pa. A i woya a i ngreda va ga auda a sam kinè, I Zhiklè nkezlaʼa, a sam di ndohi nte deɓa.

⁴² Te deɓaʼa kin da suna, i Ndo nzi pèc pècèk, aman i helka kinè a deɓa a kokwar Israel, a kokwar man i mbaɗa ta babhi kinè aman i da va ta, a ri ngeda te zhiklè.

⁴³ Te pa kin da hér civèɗ kinè a skwi tè-lèba man kin gau, man kin lizhè va kinè a vna, a ndara kinè a géɗ skwi man ambaɓi tèlèba man kin gau.

⁴⁴ A kin da suna, i Ndo nzi pèc pècèk, aman i da gi skwi a sam kinè a géɗ nzlembaɗ ga; a géɗ civèɗ kinè man ambaɓai, a géɗ mali kinè ka ɓai, ndohi Israel, Bi Zhiklè a gaɗa.