Ezéchiel 2 - Ma Zhiklè

Zhiklè a zlindè Ezéchiel

¹ A ngaɗayè: Ka ndo, zlatsa, i woy a i gaɗa kal

² A Mèzhèɓ Zhiklè a mshkè a ndav ga, a nzlatsedyè. Te deɓaʼa i tsena daʼai nengaʼa man a gaɗayè.

³ A ngaɗkayè: Ka ndo, i zlinde ka a sam ndohi Israel, a sam ndohi mèdègèɗ, man ta slambaɗkay a gèɗ. Tengaʼa ta gokoɗi ara babhi ta, ha mshkè na ma a mpatsna.

⁴ I zlinde ka a sam ta, a sam ndohi haha man ta sassaya di ta, a ta gwora ndav ta. A ka da gaɗa ta: Bi Zhiklè Ndo nzi pèc pècèk, iyè man i goɗ ar haha:

⁵ Ko ta tsenaʼa, ko ta tsena ɓi ba – a géɗ man ta ndohi mèdègèɗ – ta da suna, ndo nhadka ma Zhiklè a zhè a sam ta.

⁶ Aman ka, ndo, ka gu zlu tengaʼa ɓai, ka gudzu te ri ma tenga ɓai, aman ta da teza ka ma a va ara vatak, ara man ka nza a géɗ varadza. Ka gu zlau ma tenga ɓai, ka gudzu a sam tenga ɓai, te man ta ndohi mèdègèɗ.

⁷ Ka da gaɗa ta ma ga, ko ta tsenaʼa, ko ta tsena bi ba, aman ta ndohi mèdègèɗ.

⁸ Aman ka, ndo, fu zlembaɗ a ma ga. Ka gu mèdègèɗ ara ndohi haha bai! Winè ma ngaya, ndau skwi man i da va ka!

⁹ A i pu dai: A i rka ara man a torko rai a sam ga, a ɗèlèwèr te pa.

¹⁰ A winèʼa a sam ga. Skwi mwindèʼa a pa a hwaɗaʼa ba, a deɓaʼa ba. Skwi man mwindè a pa, ma nkuɗai, ma wobau, ma nɗish va.