Ezéchiel 17 - Ma ZhiklèVezai a wof a ma woyam 1 Ndo nzi pèc pècèk a ngaɗayè ar haha: 2 Ka ndo, goɗ ma njked ma a ngèlègeɗ ma a sam ndohi Israel! 3 Ka gaɗa: Bi Zhiklè a goɗ ar haha: Vezi mbiaʼa, a kelpasl mbiaʼa, a gwots ngurèʼa ntsatsasla, a mshkèda za Liban. A mpasleda ncelekwöm gèɗ wof lakalak a ma. 4 A mɓerzlda zolom ri wof a ma, a ndeda a kokwar ndohi ganai a mfedahi a kokwar man ndohi gani te pa. 5 Te deɓaʼa a nco tser skwi te kokwar, a nzlekeda a ma woyam, a ngi a wof mftsa a ma woyam. 6 Nftsa a pa, a ngra a ma ma, a wof a tsi tustusaʼa, a ntsu ri a civèɗ vezi a zluzlor nengaʼa a nza tʼhai tʼherkeda. A nge na wof kslor, a tsi rai, a yi wuda. 7 Aman vezi ngiɗè a zhè mbiaʼa, a kelpasl mbiaʼa, a gwots mɓica devessaʼa. A na haha wof matsa a nʼngwoda zluzlor na a sam na, a ri wof ba, aman a va na iyam a fena kokwar man a nʼngeda pa. 8 Wof matsa a sam mbelaʼa, a ma woyam, aman a tsi rai, a yi wuda, ta geda a sam mbelaʼa. 9 Gada ta: Bi Zhiklè a goɗ ar haha: A da mbél na ɗè? Vezi a da pelko zluzlor na, a da ngél nyi wof na, a vah nengaʼa tèlèba a gwor na azɓi dè? A pats man ta pela zluzlor na, ko ri man wuɗi na zhè, ko ndohi kumba, ta da takaha azɓai. 10 Nʼnga te pa amba; aman a da mbél na dè? Kozlar te civèɗ mvèng pats a da gworaʼa a sam man a nftsa a pa azɓi dè? Verzi tsaval maʼa 11 Ndo nzi pèc pècèk a ngaɗayè ar haha: 12 Gada ta ndohi mèdègèɗ: Kin tsena verzi skwi haha bi dè? Goɗo: Na haha bi Babylone a mdo a kokwar Jérusalem, a mco bai a wud bihai, a nde ta a sam na a kokwar Babylone. 13 Te deɓaʼa a mco verzi ndo staɗ te gi bai, a nderzla ma a vna. A ndzhoɗo a sam na, aman a mbaɗa na, a nhel ta ndohi mbibihiaʼa a ma te kokwar; 14 kokwar-bi da ga a mbia bai, da zlazlama a vata bai. 15 Aman bai a nslambaɗa na va, a nzlinde ta ndohi sak a kokwar Egypte, a jhèɗè plèsh, a ndohi kumba te ri ta. A da gi amba dè? Ndo man a da gi skwi aranta, a da mbél na dè? A mpra ndérzlè-ma; a da wuc na genè ɗè? 16 Ara man a vava i zhè, Bi Zhiklè Ndo nzi pèc pècèk a gaɗa, a da metsi na a sam man bi a mfeda a pa a bai, man a mʼmendko mʼmbèdè nengaʼa auda, te kokwar Babylone, man a mpra nderzlè-ma na. 17 Pharaon a ndohi var nengaʼa kumba ta da takaha te var azɓai, man ta da dizlè kwahai a ta tivè a pa a vna, a ta zedkoɗi ndohi kumba auda. 18 A mʼmendko mʼmbèɗ na auda, a mpra nderzlè-ma. A vava ta gu aranta. Te deɓaʼa, aman a ngu ar haha ma, a da mbélè azɓai. 19 Gar haha Bi Zhiklè a gaɗa: Ara man a vava i zhè, mʼmbèdè man a mʼmendkoɗauda, a nderzlè-ma man a mpraʼa, i da ngwoda na a gèɗ. 20 I da nga na gadda a hai, a i gshè a vna. I daʼa a kokwar Babylone. Te pa i da ga na kita, a géɗ man a njèkyè. 21 Ndohi var nengaʼa mparahiaʼa, ta da bazl ta a tsakwal. Tengaʼa man ta mbel ta, i da ksar ta a ma kozlar tèlèba, a kin da suna, iyè Ndo nzi pèc pècèk man i goɗa. 22 Gar haha Bi Zhiklè a gaɗa: I gshè ncèlèkwöm wof lakalak a ri ga, ri wof man a ɗu tok tok, zolom ri wof, i berzlè a ri ga, a i da ngi a pa a ri ga, a géɗ za mbiaʼa ngurèʼa, 23 a géɗ za Israel mbiaʼa, i da ngi a pa, a da tsai, a yi wuda, a gi a lakalak mbelaʼa. Ɗiakihi tsaɗ tsaɗ tèlèba ta da nzi a mèzhèɓaʼa, a hwaɗ wofaʼa. 24 A wofhi te dak tèlèba ta da suna, i Ndo nzi pèc pècèk. Wof man a grè a zhiklè a vata, i mindè a hai. A i grè wof nkèshèʼa. I gwora wof mbayaʼa, a wof ngworaʼa i ndeda a mɓayaʼa man a wurzhè. Iyè Ndo nzi pèc pècèk i goɗa, a i da rufaʼa. |
Alliance Biblique du Cameroun 1989
Bible Society of Cameroon