Exode 29 - Ma Zhiklè

Mpi Aaron a wudahi nengaʼa a mizlinè Zhikiè

¹ Gu arsa a nda tengaʼa, aman ka pe ta a sam mizlinè Zhikiè, a ta gi a ndohi mvi skwi a Zhikiè: Co gol marai, a droki cèw suɗekɗekaʼa,

² a movar man skwi nshégèrè a te di bai, a makala nsagarbiaʼa aman mbar a pa, a mɓelaslasla man mbar a pa. Gau a gufa ndérnènènèʼa.

³ A ka ɓickoda gadagar, a ka vi a nda marai a droki cèw.

⁴ A Aaron a wudahi nengaʼa a ta shkè a ma gi nkezlaʼa, a ka pan ta a iyam.

⁵ Te deɓaʼa a ta shkè a ma gi nkezlaʼa, a ka va na gadabu maslaka a va Aaron, a sajibèr Ephod, a Ephod a maslaka ara limbèt, mana na di maslaka Ephod,

⁶ paɗa na gèɗ, a ka feda lamba nkezlaʼa a deb mpèɗè gèɗ.

⁷ Co mbar man ta fèɗè a deb skwai, bada na a gèɗ, a ka faɗa na a gèɗ arsa.

⁸ A wudahi nengaʼa ta zlècè a pa; va ta suɗkova a va,

⁹ mana ta deɓa, Aaron a wudahi nengaʼa, a skwi deɓa, va ta pokwa a gèɗ; aman sèi ta gi a ndohi mvi skwi a Zhikiè pèc pècèk ndèzl. Te deɓaʼa ndha ta ri a Aaron a wudahi nengaʼa.

Skwi man ta va na Zhikiè

¹⁰ Cko marai, a ma gi nkezlaʼa, a Aaron a wudahi nengaʼa ta nga na ri a gèɗ.

¹¹ Te deɓaʼa zloho marai a sam di Ndo nzi pèc pècèk a ma gi nkezlaʼa.

¹² Co pombazaʼa kètè, a ka faɗda a drom sam mvi skwi a Zhikiè, a ri ngaya. Njèkèdi Pombaz tèlèba, badaussa a sam mvi skwi a Zhikiè.

¹³ Te deɓaʼa co mbeza tèlèba man a mbèd vayats a pa, man a tsagi menaɗ, a kwa deɓa a mbezaʼa, a ka fa na vogwa a sam mvi skwi a Zhikiè.

¹⁴ Zluèɗ, hutèɗèʼa, a shuèɗèʼa, fa na vogwa tʼuda, a dala, aman nengaʼa skwi man ta va na Zhikiè a gèɗ malai.

¹⁵ Te deɓaʼa co drok staɗ, a Aaron a wudahi nengaʼa ta nga na ri a gèɗ.

¹⁶ Zloho drok, co pombazaʼa a ka guceda a ka tèuda tsagi sam mvi skwi a Zhikiè.

¹⁷ Drok, pho fiyaʼa, pana vayatsaʼa a sakaʼa, peda a va fiya ngiɗè, a va gèdèʼa,

¹⁸ a ka fa na vogwa a drok tèlèba a sam mvi skwi a Zhikiè nengaʼa skwi man ta ndara na Ndo nzi pèc pècèk, skwi man a zhkèha, skwi man ta va na Ndo nzi pèc pècèk te vogwa.

¹⁹ Te deɓaʼa co drok ngiɗè, a Aaron a wudahi nengaʼa ta nga na ri a gèɗ.

²⁰ Zloho drok, co te va pombazaʼa kètè, a ka faɗa ta a bkwi zlembaɗ nte ri mandai Aaron a wudahi nengaʼa, a babgi ri mandai, a babgi sak ri mandai. Njèkèdi Pombaz, guceda a ka tèuda tsagi sam mvi skwi a Zhikiè.

²¹ Te deɓaʼa co Pombaz a gèɗ sam mvi skwi a Zhikiè, a mbar man ta fèdè a skwai, kètè, a ka guca na va Aaron a maslaka nengaʼa, a va wudahi nengaʼa, a va maslaka tengaʼa ba, a ta pia a mizlinè Zhikiè, nengaʼa a nda maslaka nengaʼa, a wudahi nengaʼa a nda maslaka tengaʼa.

²² Te deɓaʼa co mbeza drok kètè, co zalazalaʼa man a hutoraʼa, a mbeza man a mbèda vayats a pa, man a tsagi menad, a kwa deɓa cèw a mbezaʼa, a ɗuso nte ri mandai (aman nengaʼa drok man ta hʼinè mvi skwi a Zhikiè).

²³ Te deɓaʼa co movar a makala man mbar a pa staɗ, a mɗelaslasla te gadagar, man skwi nshégèrè a te di bai, man a zhè a sam di Ndo nzi pèc pècèk.

²⁴ Skwi haha tèlèba va ta a ri Aaron a wudahi nengaʼa, a ka gidèʼa, ka gedaʼa a sam di Ndo nzi pèc pècèk.

²⁵ Te deɓaʼa co te ri tenga zaʼa, a ka fa na vogwa a gèɗ sam mvi skwi a Zhikiè, a va skwi man ka ndara na Zhikiè, a nzhkèha Zhikiè Ndo nzi pèc pècèk, aman nengaʼa skwi man ka va na Zhikiè te vogwa.

²⁶ Te deɓaʼa co ndav drok man ta hinè mvi skwi a Zhikiè, aman a Aaron, a ka gidèʼa a sam di Ndo nzi pèc pècèk, a ka va na a Zhikiè. Te deɓaʼa, a ngaya.

²⁷ Ndava man ka gudo, a ɗuso drok Aaron a wudahi nengaʼa, fiyaʼa man ta co a ta gudo, ka sla ta nkezlaʼa.

²⁸ Ndohi Israel sèi ta gi arsa ndèzl, pèc pècèk, a Aaron a wudahi nengaʼa ta ngècè skwi te pa. Nengaʼa skwi man ta tsakala a ta va na Ndo nzi pèc pècèk, a ta cè auda a sam skwi man ndohi Israel ta va na te pombai.

²⁹ Maslaka Aaron nkezlaʼa, wudahi nengaʼa ta da ngècè te deɓaʼa, a ta feda a va, man ta faɗa ta mbar a gèɗ, a ta pe ta a mizlinè ndohi mvi skwi a Zhiklè.

³⁰ Kra nengaʼa man a gi mizlinè mvi skwi a Zhiklè te di man a Aaron, nengaʼa man a dè a gi nkezlaʼa, a ngi mizlinè a sam nkezlaʼa, da vau maslaka nengaʼa a va mʼmèn 7.

Skwi nʼndi nkezlaʼa

³¹ A ka cè zluèɗ drok man ta hüno mvi a Zhiklè, a ka tiaʼa a sam nkezlaʼa.

³² A Aaron a wudahi nengaʼa ta ndi zluèɗ drok, a movar nte gadagar, a ma gi nkezlaʼa.

³³ Da ndau skwi man ta pul gèɗ mali a vna, a pats man ta pe ta a sam mizlinè ndohi mvi skwi a Zhiklè, a ta pe ta a mizlinè Zhiklè.

³⁴ Aman ta jèkeda zluèɗ drok man ta hüno mvi skwi a Zhiklè, a movar, a mangoslèm, sèi ta fa na vogwa a njèkèdiaʼa. Ta slaha ta ndia te deɓaʼa asaɓai, nengaʼa nkezlaʼa.

³⁵ Ka da gu arsa a sam Aaron a wudahi nengaʼa, zuraʼa, ara man i njè ka a gèɗ. Mpi tengaʼa a mizlinè Zhiklè a gi mʼmèn 7.

Mfi sam mvi skwi a Zhiklè a mizlinè Zhiklè

³⁶ A pats a pats ka keɗa gol marai mpil gèɗ malai, a ka cèma na mali auda a sam mvi skwi a Zhiklè, aman ka gi a mpil gèɗ nengaʼa, a ka faɗa na mbar a pa, a ka fi a mizlinè Zhiklè.

³⁷ Mpil gèɗ malai a sam mvi skwi a Zhiklè, a gi mʼmèn 7, a ka fi a mizlinè Zhiklè. Aranta sam mvi skwi a Zhiklè nkezli nkezlaʼa. Skwi mèmè man a lama na sam mvi skwi a Zhiklè, nkezla mènè.

Mvi skwi a Zhiklè a pats a pats

³⁸ Skwi haha ka vi a sam mvi skwi a Zhiklè: A pats a pats wud tambakihi cèw mvi staɗ, staɗ, a skwi man ta ndara na Zhiklè a pats a pats.

³⁹ Kra tambak ngiɗè ka vi a prèk, ngiɗè a dakwaɗ.

⁴⁰ A va kra tambak nshèlèkuraʼa, gufa ɗuk ri staɗ, mbsoma a mbar dèok kata, a ta ɓala na iyam nyi wof a Zhiklè dèok kata.

⁴¹ Kra tambak ngiɗè, ka vi a dakwaɗ – a movar man ta va na Zhiklè, a skwi man ka ɓala na a Zhiklè. Ka da gu lèmèlèmè ara man a prèk, a skwi man ta va na a Zhiklè te vogwa a zhkè, a jénaha ndav Ndo nzi pèc pècèk.

⁴² Nasa skwi man kin ndara na Zhiklè a pèc pècèk, a ma gi nkezlaʼa, a sam di Ndo nzi pèc pècèk, te verzi tengaʼa a ndè a ma ma pèc pècèk. A i woy a nga zli gèɗ a tengaʼa, a nga gèdè a ka a pa.

⁴³ I woy a nga zli gèɗ a ndohi Israel a pa, a i kezla samaʼa a nʼnjèl ga.

⁴⁴ Aranta i woy a i ga gi mɓicè-va, a sam mvi skwi a Zhiklè, a mizlinè Zhiklè, a i woy a i pi nda Aaron a wudahi nengaʼa a mizlinè ga, a ta gi mizlinè ndohi mvay skwai.

⁴⁵ A i woy a i nzi te ndev ndohi Israel, a i gi a Zhiklè tengaʼa;

⁴⁶ a ta da suna, iyè Ndo nzi pèc pècèk, Zhiklè tengaʼa, man a nhelka ta auda te kokwar Egpte, aman i da nzi te ndev tengaʼa, iyè, Ndo nzi pèc pècèk, Zhiklè tengaʼa.