Exode 2 - Ma Zhiklè

Nyi Moise

¹ A ndo ngidè te verzi Lévi a nco dem te verzi Lévi a ngwoz.

² A ngwoz a nʼngots kra, a myu kra nguraʼa. Aman a nrka, kra mbikaɓai, a nʼngheda ki makar.

³ Aman a slaha a nghédè a ma ma assaɓai, a nco kokov, a ta ndè a votok a kuɗ wof, a ta feda kra a pa, a ta da feda kokov a va ncènjéra a ma woyam Nil.

⁴ A demam nengaʼa a mpoko va dra kètè, aman a mɓerèʼa.

⁵ A dem Pharaon a mdo a ma woyam Nil, aman a pèn va. Aman golahi nengaʼa ta sawala a ma woyam Nil, nengaʼa a nrka kokov te va ncènjéra. A nzlündo ɓèl nengaʼa, a nda ckoɗa.

⁶ Aman a mwinèʼa, a nrka kra, a kra a kuɗai — a nsi dem Pharaon te va, a ngaɗa: Nengaʼa a kra Hébreu.

⁷ A demam kra a ngaɗa na dem Pharaon: Ka woya man i dè a i bahka na ngwoz Hébreu staɗ, a nda tseda na wa a kra dè?

⁸ A dem Pharaon a mʼmbeɗa na a ma: Halau, do! A dem matsa a mdo, a mbaha na mam kra.

⁹ A dem Pharaon a ngaɗa na: Co kra, tseda na wa, i woya man i da va ka skwi a géɗ man ka tseda na wa. A ngwoz a nco kra, a ntseda na wa.

¹⁰ Aman kra a ngra ma, a nckoɗa a sam dem Pharaon. A nengaʼa a ndeda a kra na, a mbaha na Moise, a ngaɗa: I ckoɗauda te iyam.

Moise a mwuc na a Madian

¹¹ A pats ngiɗè, man Moise gola ma, a ndo auda a sam kramamhi na, a nrka aman ta ngazl ta a sam mizlinè. A nrka, ara man ndo Egypte ngiɗè a tsu kramam nengaʼa, ndo Hébreu.

¹² A Moise a nʼngul dai, a nrka ndo ngiɗè ɓai, a nkeda ndo Egypte, a nrda a va wyak.

¹³ Te mangoslèmaʼa, aman a ndo auda, ndohi Hébreu cèw ta bèzl va. A ngaɗa na, a ndo mwoy ma: Ka tsi kramam ngaya èhèmè?

¹⁴ A nengaʼa a mbeɗa na a ma: Nʼnge ka a bi a ndo kita nga wa? Ka woy a ka keɗyè, lèmèlèmè ara man ka keɗa ndo Egypte dè? A Moise a ngu zlau, a nhuro: A vava ta sun skwi man i gau.

¹⁵ A Pharaon ba a ntsena skwi haha, a woy maya, aman a nkeda Moise. Aman Moise a mhu na auda a sam di Pharaon, a nʼnza a kokwar Madian. Te pa a nʼnzahi a ma thal.

Moise te kokwar Madian

¹⁶ Ndo ncèsl skwai te Madian a zhè, dalahi nengaʼa 7. Ta shkè a mɓèl iyam, a ta ɓala ta iyam a wurom a tambakihi bab ta, a ta siaʼa.

¹⁷ A ndohi mɓer skwai ta dzam ta. Aman Moise a nslambaɗa, a ntakaha ta, a mɓala ta iyam a tambakihai.

¹⁸ Aman ta shkè a deɓa a sam Réuel, bab ta, a ngaɗa: A patsna kin shkè ngwi tsam tsam aranta èhèmè?

¹⁹ A ta mbeɗa na a ma: Ndo Egypte ngiɗè a ntakaha nga a sam ndohi mɓer skwai. A vava nengaʼa a mɓala nga iyam, a tambakihi ta siaʼa.

²⁰ A bab ta a ngaɗa ta dalahi na: Na tema? Kin jokoɗa pa èhèmè? Va-baha na, da ndau skwi a sam nga!

²¹ A Moise a nco, a nzi a sam ndo sa, a nengaʼa a mva na Séphora, dem nengaʼa, a ngwoz.

²² Nengaʼa a myu kra nguraʼa, a Moise a mbaha na Guershom, a ngaɗa: I tʼherkeda dra ara mbrok.

²³ Te deɓ nʼnzi, bi Egypte a mʼmets na. A ndohi Israel ta si matakwan, a géɗ man ta gu ɓèlè, a ta kuɗai, a nkuɗ tengaʼa a géɗ man ta gi bèlè, a ntsenaha a sam Zhiklè.

²⁴ Zhiklè a ntsena nkuɗ tengaʼa, a nhur nderzlèma nengaʼa a Abraham, Isaac, a Jacob.

²⁵ A Zhiklè a mpu di a ndohi Israel, a ta sia te va.