Exode 16 - Ma Zhiklè

Movar man a shke te zhiklè

¹ Te deɓaʼa ta slambaɗa te Elim, a nhèyè ndohi Israel tèlèba ta shkè a hèshèkèɗ Sin, te ndev Elim a Sinai, te mʼmèn 15, a ki macecèwaʼa, te deb man ta jèkede kokwar Egypte.

² A nhèyè ndohi Israel tèlèba ta ga na ma a va Moise a Aaron tʼhèshèkèɗ.

³ A ndohi Israel ta gada ta: Dara nga da mbazla nga te ri Ndo nzi pèc pècèk te kokwar Egypte, a sam man nga ngots zluèɗ a skwi nʼndai a vata. Kin helka nga auda a hèshèkèɗ, aman ndohi tèlèba ta tiɗè ta a mai.

⁴ A Ndo nzi pèc pècèk a ngaɗa na Moise: Na haha i woy man a i va kinè movar man a shkèhai te zhiklè ara iyam, a ndohi ta dè auda a pèc pècèk, aman ta ɓicè skwi nʼndai man ta ndiaʼa a pats sa. I woya man i jkede ta a i rka, gar ta jèjèr ma ga, gar ta woya Bai.

⁵ Te mʼmèn mamokwaʼa, ta da til skwi man ta ɓicaʼa te di mʼmèn cèw.

⁶ A Moise a Aaron ta gada ta ndohi Israel tèlèba: A dakwaɗ kin da shinèʼa, nengaʼa man a nhelka kinè auda te kokwar Egypte, Ndo nzi pèc pècèk.

⁷ A prèk kin da rka nʼnjèl Ndo nzi pèc pècèk, aman nengaʼa a ntsena ara man kin ga na ma a va. Kin gi ndav a géɗ nga èhèmè?

⁸ A Moise a ngaɗa ta a vaʼa: Ndo nzi pèc pècèk a da va kinè zluèɗ a dakwaɗ, a movar a prèk, a kin ngézhè. Aman Ndo nzi pèc pècèk a ntsena ara man kin ga na ma a va. Aman nga, nga be wa? Ma ndav kinè man kin gi a haha, kin gu a nga ka ɓai, kin ga na Ndo nzi pèc pècèk.

⁹ A Moise a ngaɗa na Aaron: Gada ta nhèyè ndohi Israel tèlèba: Va-zlatsa a sam Ndo nzi pèc pècèk, te man nengaʼa a ntsena ma man kin ga na va.

¹⁰ Aman Aaron a ngaɗa ta nhèyè ndohi Israel tèlèba ar haha, ta ngwoda gèɗ ta a deɓa a ndev hèshèkèɗ, a ta rka nʼnjèl Ndo nzi pèc pècèk a ngudoko ta va a dai te va vanai.

¹¹ A Ndo nzi pèc pècèk a ngaɗa na Moise:

¹² I tsena ma ndav ndohi Israel. Gada ta aranta: A dakwaɗ kin da ndi zluèd, a prèk movar, a kin ngézhè, a kin da suna, iyè Ndo nzi pèc pècèk, Zhiklè kinè.

¹³ A gu arsa: A dakwaɗ nkuɗhomhai ta shkè rèdèdèa, a ta nzahi a sam man ndohi Israel ta a pa.

¹⁴ A prèk, aman minmèn a wush na ma, skwi ngiɗè a zhè tʼhèshèkèɗ, nkokuraʼa ara tser ntemas, ntsotsfa a géɗ herkeda.

¹⁵ Aman ndohi Israel ta rkaʼa, ta goɗ a va ta: Naha mè? Aman ta sun skwia bai. A Moise a ngaɗa ta: Nasa movar man Zhiklè a va kinè a kin ndiaʼa.

¹⁶ Ndo nzi pèc pècèk a gada kinè: Ndo staɗ staɗ da potso, tidè hwaɗ na. Ndo staɗ staɗ a ngècè agoda staɗ staɗ a géɗ ko wawa te gi na;

¹⁷ a ndohi Israel ta gu arsa. Ndohi ngiɗè ta ɓica a vata, ndohi ngiɗè ta ɓica kètè genè.

¹⁸ Aman ta lüvo a agoda: ndo man a mɓica a vata, a njèkaha bai, a ndo man a mɓica kètè genè, dèha na. Ndo staɗ staɗ a mɓüco, tidè hwaɗ na.

¹⁹ A Moise a ngaɗa ta: Kin da jèkahahi a mangoslèm bai!

²⁰ Aman ta tsena ma Moise bai, a ndohi ngiɗè ta nghedahai a mangoslèm, a movar a ngedas na, a meturɗi ndheda va a pa, a zhkè. A Moise a ngu ndav a géɗ tengaʼa.

²¹ Te deɓaʼa ta ɓica a prèk a prèk, tidè hwaɗ ta. A pats a wiyam na.

²² A pats mamokwaʼa, ta ɓica a vaʼa te di mʼmèn cèw, ndo staɗ staɗ agoda cèw. A bababgihi ndohi Israel ta shkè a ta ngra na Moise.

²³ A Moise a ngaɗa ta: Ndo nzi pèc pècèk a gaɗkaɗa: Angoslèm pats ngolala, pats nshèk va, nkezlaʼa a sam Ndo nzi pèc pècèk. Skwi man kin woy a kin shülèʼa, vo-sula! Skwi man kin woy a kin tiaʼa, va-tau! Njèkèdiaʼa va-fedahai, a kin da ndia angoslèm.

²⁴ A ta fedahai te di mangoslèm, ara man Moise a gada ta. A zhkè azbai, a meturɗi ta da a pa ɓai.

²⁵ A Moise a ngaɗa ta: Va-ndau skwi haha a patsna. Aman a patsna, pats nshèk va nkezlaʼa a sam Ndo nzi pèc pècèk. A patsna kin da ngècè skwi te dak azɓai.

²⁶ Va-ɓüco mʼmèn 6, aman pats matsaraɗaʼa, nengaʼa pats nshèk va, skwi sa azbai.

²⁷ Te pats matsaraɗaʼa, matrhiaʼa to do auda, aman ta ɓicè skwai, aman ta ngatsa bai.

²⁸ A Ndo nzi pèc pècèk a ngaɗa na Moise: Nʼnzi tèkè kin woy a kin cinè ma ga, a skwi man i gada kinè, bai?

²⁹ Ndo nzi pèc pècèk a mva kinè pats nshèk va. Gar haha te pats mamokwaʼa a va kinè movar te di mʼmèn cèw. Gar haha va-nza a gai, ndo do do a vara bai, a pats matsaraɗaʼa.

³⁰ A ndohi ta slubordo pats matsaraɗaʼa.

³¹ A ndohi Israel ta baha na manne, nslekaɗaʼa ara tser dau kuɗpa, a jén ara matawai man vongwom te dai.

³² A Moise a ngaɗa: Ndo nzi pèc pècèk a goɗkoɗa: Agoda staɗ staɗ va-nghedahai, a ndohi verzi kinè ta da sun movar man kin ndau tʼhèshèkèɗ, a pats man i de kinè auda te kokwar Egypte!

³³ Moise a ngaɗa na Aaron: Co shidèf, peda manne agoda staɗ a pa, fedahi a sam di Ndo nzi pèc pècèk, da nza, a ndohi man ta shkè te verzi kinè, ta da ngotso.

³⁴ A Aaron a ngau, ara man Ndo nzi pèc pècèk a ngaɗka na Moise, a Aaron a nghedahi a tsagi kwa ma kita.

³⁵ Ndohi Israel ta ndau manne mvi 40, ha ta ndikè a kokwar man ndohi te pa. Ha ta ndikè a kuma kokwar Canaan, ta ndau manne.

³⁶ Skwi nlivèʼa man ta livè a vna, a gi agoda cèw.