Esther 9 - Ma Zhiklè

Ndohi Juif ta bazl ta mayamhi ta

¹ A ki 12, te ki Adar, mʼmèn 13, a pats man ta woy a ta gi ara man bai a ngoɗa, man mayamhi ndohi Juif ta hur ta slaha ta fen ta, skwi a nʼngwode na, a ndohi Juif ta fen ta tengaʼa man ta ga ta shèwa.

² Ndohi Juif ta ɓica va te kokwar ta, te kokwar-bi Assuérus tèlèba, aman ta bazl ta ndohi man ta ga ta skwi man ambaɓai; ndo a fen ta azɓai, ko staɗ. Zlau ndohi Juif a ndza ta ndohi tèlèba.

³ Tsuvomhi kokwar, golahi bai, ngomnahai, ndohi bi mbibihiaʼa tèlèba ta takaha ta ndohi Juif. Zlau Mardochée a ngs ta.

⁴ Mardochée ndo mbiaʼa te gi bai, labar ma nengaʼa a zlèzlèmè te kokwar-bi tèlèba. A vava Mardochée a ngu mbiaʼa a ma ma.

⁵ A ndohi Juif ta bazl ta mayamhi tengaʼa tèlèba a tsakwal. Mbèzl ndo a zhè mbiaʼa! Ta gu a sam ndohi shèwa ta ara man ta woyaʼa.

⁶ Te gi bi te Suse, ndohi Juif ta bazl ta ndohi 500 a vèvèɗ.

⁷ Ta bazla ndohi haha a vaʼa: Parshandatha, Dalphon, Asphatha,

⁸ Poratha, Adalia, Aridatha,

⁹ Parmashtha, Arizai, Aridai,

¹⁰ Vajezatha, wudahi Haman 10, te verzi Hammedatha, ndo mayam Juif. Ta bazl ta, aman kolongwi tengaʼa ta lama na ɓai.

¹¹ A pats nasa, ndohi mbazlaʼa te gi bi Suse, bi a ntsenaʼa.

¹² A ngaɗa na Esther, ngwoz na: Te gi bai, te Suse, ndohi Juif ta bazl ta ndohi 500 a vèvèɗ, a wudahi Haman 10. A sam njèkèɗi kokwar-bi kè? Ka woya njhèɗè mè? I va ka. Ka war a vaʼa mè? A da gi arsa.

¹³ Esther a ngaɗa: Aman ambaha bai, va ta civèɗ a ndohi Juif, a ta gi lèmèlèmè arsa angoslèm dai, ara man ma ɗèlèwèr a ngoɗa a patsna. Wudahi Haman 10 sèi ta ktsal ta a wof.

¹⁴ A bai a ngoɗ aman ta gi arsa. A ta goɗ ma bai te Suse, a ta ktsal ta wudahi Haman 10 a wof.

¹⁵ Ndohi Juif te Suse ta ɓica va zaʼa mʼmèn 14, te ki Adar, a ta bazl ta ndohi 300 te Suse. Aman kolongwi ta, ta lama na ɓai.

¹⁶ Njèkèdi ndohi Juif man ta zhè te kokwar-bai ta ɓica va, a ta gu var a géɗ nshèffè ta. Mayamhi tengaʼa ta pul gèɗ a ta bazl ta ndohi 75.000 te va ndohi man ta ga ta shèwa. Aman kolongwi tengaʼa, a skwi tengaʼa, ta lama na ɓai.

¹⁷ Skwi haha ta gau a ki Adar, mʼmèn 13. A pats 14, te ki sa, ta sok va, ta gu a pats ngolala, a pats mwuffè.

¹⁸ Aman ndohi Juif te Suse ta ɓica va a pats 14, a pats 14aʼa a ki sa; aman a pats 15aʼa ta sok va, ta gu a pats ngolala a pats mwuffè.

¹⁹ Gar haha ndohi te dak ta ngots pats nshèk va a pats 14 te ki Adar, a ta gu a pats mwuffè, a pats ngolala. Ndohi tèlèba ta zlündo skwi mbalai a va ta.

Ngolala Purìm

²⁰ Mardochée a mwindo skwi haha tèlèba a ɗèlèwèr, a nzlündo ɗèlèwèr a sam ndohi Juif te kokwar-bi Assuérus tèlèba, ko dra ko ndul ndul,

²¹ a njè ta ma a gèɗ, aman a mvi a mvai ta gi ngolala a pats 14aʼa, a pats 15aʼa, te ki Adar.

²² Nasa pats man ndohi Juif ta ngots nshèk va, a ta fen ta mayamhi tengaʼa, a kia man nlèyè tengaʼa a nʼngwode na a mwuffè, a kuɗa a nʼngwode na a dimèsh mwuffe. Sei ta gia a pats ngolala, a pats mwuffè, a ta zlündo skwi mbalai a va ta, a ta va ta skwi a ndohi ntawassaʼa.

²³ Ndohi Juif ta fu skwi man ta gu a haha nshèlèkuraʼa, skwi man Mardo-chée a Windo a ɗèlèwèr, a tsuf ndohi Juif.

²⁴ A vava, Haman, kra Hammedatha, ndo Agag, ndo mayam ndohi Juif tèlèba, a hur a woya a nzede ta. Ta gu jimèr, ta woy a ta bazl ta a ta ndev ta.

²⁵ Aman Esther, ngwoz bai, a nzlatsa a sam bai, a bai a ngoɗ ma nengaʼa, a mwindo a ɗèlèwèr nengaʼa; mvhè ma Haman a géɗ ndohi Juif da ngwoda na va a gèɗ, a ta ktsalda nengaʼa a wudahi nengaʼa a wof.

²⁶ Gar haha ta baha na pats sa Purim, a nzlembaɗ Pur. A géɗ ma tèlèba man bi a Windo a ɗèlèwèr, a géɗ skwi tèlèba man a gu a sam ta, man ta rka a di ta,

²⁷ ndohi Juif ta fu a tsuf ta, tengaʼa a ndohi te verzi ta tèlèba, a ndohi tèlèba man ta da shkè a va tengaʼa; a mvi a mvai sèi ta gi ngolala mʼmèn cèw sa ndèzl, ara tsuf ta, ara ma nkwèr ta, ndohi tèlèba a pats man ta Windo.

²⁸ Sèi ta hér pats sa, a ta gi ngolalaʼa te verzi wud wuda tèlèba, te kokwar staɗ staɗ tèlèba, a sam staɗ staɗ tèlèba, te va gwoli staɗ staɗ tèlèba. Ngolala Purim da za a sam ndohi Juif bai, a ta hérèʼa te verzi wud wuda ta.

²⁹ Esther, ngwoz bai, dem Abichail, a nda Mardochée, ndo Juif, ta Windo ɗèlèwèr a wuɗi-bai, ɗèlèwèr macecèwaʼa a va ɗèlèwèr Purim.

³⁰ A ta zlündo a sam ndohi Juif te kokwar-bihi nʼngelaʼa 127, te kokwar-bi Assuérus tèlèba, a ma gumai, a ma nlèɓèslè.

³¹ Sèi ta gi ngolala Purim ndèzl, a pats man ta vau, ara man Mardochée ndo Juif, a Esther, ngwoz bai, ta goɗ aman sèi ta gia ndèzl, tengaʼa a ndohi te verzi ta, a géɗ man ta jèkeda skwi nʼndai a ta gu wobau.

³² Ma Esther a géɗ ngolala Purim a gu a ma nkwèr ndohi Juif, a ta windeda ɗèlèwèr.