Esther 8 - Ma Zhiklè

Esther a tsi rai a géɗ ndohi Juif

¹ A pats nasa Bi Assuérus a mva na gi Haman, ndo mayam ndohi Juif, a Esther, ngwoz bai; a Mardochée a mshkè a gi bai, a géɗ man Esther a ngreda skwi man a ngu a sam na, a gaɗa i verzi na.

² A bai a nco tèslri, man a suɗama na auda te ri Haman, a mva na Mardochée. Esther a nʼnga Mardochée a bi ndohi gi Haman.

³ A Esther a gèdè zaʼa a sam bai, a nkalahi a deɓ sak nengaʼa, a kuɗi a sam na, da jèkeda skwi shèwa Haman, ndo Agag, a skwi man a woya a nga ta ndohi Juif.

⁴ A bai a ngeda na gaɗa bi guro a Esther, a Esther a nslambada, a nzlatsa a sam di bai,

⁵ a ngaɗa: Aman ambaha bai, a i ngots pombai a sam di na, aman bai a hur amba, a iyè ambaha, sèi ka zlindo ɗèlèwèr a ka menda ma a deɓa man Haman, kra Hammedatha, ndo Agag, a mwindo, man a goɗ a géɗ nzhidè ndohi Juif te kokwar-bi tèlèba.

⁶ Aman matakwan a ga ta ndohi ga, i slaha a i nzi ga dè? Aman ndohi verzi ga ta gedas ta, i slaha a i nzi ga dè?

⁷ A bi Assuérus a ngaɗa na Esther, ngwoz bai, a Mardochée, ndo Juif: Na haha i va na gi Haman a ri a Esther, a ta ktsalda nengaʼa a wof, a géɗ man a woya a mbazl ta ndohi Juif.

⁸ A géɗ ndohi Juif, va-windo ɗèlèwèr a ri kinè, ara man ambaha kinè, a nzlembaɗ bi a pa. Ɗèlèwèr man ta tkotseda tèslri bi a pa, i slaha a i mindè a deɓa azɓai.

⁹ Gar haha te ki mamakaraʼa, ki Sivan, ta baha ta ndohi mwindè ɗèlèwèr bai, mʼmèn 23. A ta Windo ɗèlèwèr, ara man Mardochée a ngoɗa: a sam ndohi Juif, a sam golahi bai, a sam ngomnahai a tsuvomhi kokwarhi nengaʼa 127 tèlèba, a hün te Inde, ha ndè Ethiopie, a kokwar staɗ staɗ tèlèba, a lamba daʼai ta; a ndohi tèlèba a daʼai kokwar ta, a daʼai kokwar ta.

¹⁰ A Windo ɗèlèwèr a nzlembaɗ bi Assuérus, a ta tkotseda tèslri bi a pa, a ta zlündo ndohi sak tsam tsam a ɗèlèwèr. Ta a deɓ plèsh ntʼhwaɗ gi bai, a deɓ mari kɗèh, a zlugumihai.

¹¹ Ɗèlèwèr a goɗ aman bai a va ta civèɗ a ndohi Juif te kokwar staɗ staɗ tèlèba, aman ta ɓicè va, a ta gi var a géɗ nshèffè ta, a ta bazl ta ndohi var tèlèba, man ta ga ta matakwan, a nda wudahi ba a ngwozi ba, a ta zede ta, a ta helama ta skwi ta.

¹² Da gu arsa te kokwar bi Assuérus tèlèba a pats staɗ, ki 12, mʼmèn 13, ki Adar.

¹³ Ma a mdo a kokwar staɗ staɗ tèlèba, ara ngèdè bai; a ndohi tèlèba ta da suna, ndohi Juif ta til va ta, aman ndohi mayamhi ta ta da pil gèɗ a pats staɗ.

¹⁴ Ndohi sak ta hu a deɓ plèsh bai, a ta vasso va a ɗèlèwèr, a ma bai te rai, a ta ngreda ma kita bai te gi bi te Suse.

¹⁵ Mardochée a mshkè auda te gi bai, a maslaka bi a va, a vèvèzh mʼmadzaʼa, a bata nslekaɗaʼa, gèɗ mpaɗaʼa a guro, a dawar a bata a vèvèzh te ndevaʼa. Kokwar Suse a wuffè, ta hèzlèwè a mwuffè.

¹⁶ A sam ndohi Juif, pats sa, pats mwuffè mbiaʼa, pats nʼnjèlè, pats pombai.

¹⁷ Te kokwar staɗ staɗ tèlèba, a sam staɗ staɗ tèlèba, man ma bai a ndika a pa, ndohi Juif ta wuffè, ndav ta langlangaʼa, ta gu ngolala, ta ɓica a sam skwi nʼndai. Ndohi kumba te va ndohi nte deɓa ta nde ta a Juifhai. Zlau ndohi Juif a ndza ta.