Esther 7 - Ma Zhiklè

¹ Bai a Haman to do a sam skwi nʼndi Esther, ngwoz bai.

² Bai a ngaɗa na Esther, a pats macecèwaʼa zaʼa, te va man ta si zom: Esther, ngwoz ga, ka war mè? Ka da ngècèʼa! Ka dzhaɗ mé? Ko rèta kokwar-bai i da va ka.

³ Esther, ngwoz bai, a mʼmbeɗa na a ma: Aman i ngots pombai a sam ngaya, bi ga, aman ambaha bai, ka jèkay nshèffè ga a géɗ ntsi ri ga, a géɗ ntsi ri ndohi ga; nasa skwi man i dzhaɗ ka.

⁴ Aman ta pre nga ma a ɓèlèlihai, ar i gèɗè skwa azɓai, ar i ga na matakwan a bi a géɗ nengaʼa azɓai, aman ta woy a ta zede nga.

⁵ Bi Assuérus a ngaɗa na Esther, ngwoz na: A woya a ngi ar haha nda wa? Na tema?

⁶ Esther a ngaɗa: Ndo mayam nga, ndo shèwa nga, Haman. Ndo ambaɓiaʼa, na haha! Haman a ngudzi a sam bai, a sam ngwoz bai.

⁷ A bai a ndo auda a dalmagai, a njèkeda skwi nʼndi ngolala a zom a ndav. Haman a nʼnza, a woya a ntsi ri a géɗ nshèffè na a sam Esther, ngwoz bai, te man a rkaʼa, bai a woya a gi skwi man ambaɓai a sam na.

⁸ Aman bai a mshkè a deɓa tʼuda, a gi skwi nʼndai, a nʼngots Haman mʼmanatʼhai a sam man Esther a nza a pa a ndi skwi a pa. A bai a ngaɗa: Ka woy a ka kala na va a ngwoz bai te gi ga haha ɗè? A bai a ngoɗ ma staɗ, a ta gsa Haman a ma, ta manama na daʼai.

⁹ Harbona, ntokotasl bai staɗ, a ngaɗa na bai: Wof a zhè te gi Haman, man a ntildahi a géɗ Mardochée, ndo nʼnga na skwi man amba a bai, a tsi ri 50. A bai a ngaɗa: Vaktsalda pa!

¹⁰ A ta ktsalda a pa a wof man a tildahi a géɗ Mardochée. Te deɓaʼa ndav bai a mʼmanahai.