Esther 5 - Ma Zhiklè

Esther a baha na bi a sam skwi nʼndai

¹ Te mʼmèn mamakaraʼa Esther a mfeda maslaka ngwoz bai a va, a ndo a nʼnza zuraʼa a ma gai, a gala bai. Bai a nʼnza te gi na, a géɗ sam nʼnzi bai, zuraʼa a ntamagi na.

² Aman bai a rka Esther, ngwoz bai a nzlatsa te gala bai, a nʼngots pombai a sam di na, a mpa na a di a bai, a ngeda gaɗa bi guro nte ri na. A Esther a mdo, a nlama na ma gaɗa bai

³ A bai a ngaɗa na: Nʼngaka ka mè, Esther, ngwoz ga? Ka war mè? Ko ka woy rèta kokwar-bai, i da va ka.

⁴ Esther a ngaɗa: Aman i ngots pombai a sam ngaya, sèi ka shkè a nda Haman a sam skwi nʼndi man i gi a patsna a géɗ ngaya.

⁵ A bai a ngaɗa: Va-woy Haman tsam tsam, da gau ara man Esther a ngoɗa. A bai a Haman to do a sam skwi nʼndi ngolala man Esther a ga ta.

⁶ Aman ta si zom, bai a ngaɗa na Esther: Ka war mè? Skwi man ka jhèɗèʼa, ka ngècèʼa. Ka jhèɗè mè? Ko rèta kokwar-bai, i da va ka.

⁷ Esther a mʼmbeɗa na a ma: Skwi man i woyaʼa, a i jhèɗèʼa:

⁸ Aman i ngots pombai a sam bai, aman ambaha bai, a mvay skwi man i jhèɗèʼa – bi da shkè a nda Haman a sam skwi nʼndi man i da gi a géɗ kinè angoslèm; a i da gi ara man bi a dzhoɗa.

Haman a til wof aman ta ktsalda Mardochée a pa

⁹ A pats nasa Haman a ndo ngwai a mwuffe, ndav na langlangaʼa. Haman a nrka Mardochée a ntamagi bai, a slèmbèɗè azɓai, a gi zlau nengaʼa azɓai, a gi ndav kumba a géɗ nengaʼa.

¹⁰ Aman Haman a nkeɗda gèɗ ndav na a pa, a ndo ngwai. A mbaha ta mandalahi na a Zéresh, ngwoz na.

¹¹ Haman a fi va a géɗ skwi mèshèlè nengaʼa mbiaʼa, a géɗ wudahi na man ta kumba, ara man bi a mfeda pa, a géɗ tsuvomhi tèlèba a ndohi te gi bi tèlèba.

¹² Haman a goɗ a vaʼa: Esther, ngwoz bai, a mbaha na ndo ngiɗè a sam ngolala ɓai, sèi iyè, nga gi cèw a bi genè a sam skwi nʼndi nengaʼa. Angoslèm ba a mbaha nga cèw a bi genè.

¹³ Ko gar haha i wuffè azɓai, a géɗ man i rka Mardochée, ndo Juif, a nʼnza a ntamagi bai.

¹⁴ Te deɓaʼa Zéresh, ngwoz na, a ngaɗa na, a mandalahi nengaʼa tèlèba: Sèi ta til wof ngurèa, a tsi ri 50. Angoslèm a prèk ka gaɗa na bai, aman ta ktsalda Mardochée a pa. Te deɓaʼa ka da wuffè, a kin dè a sam skwi nʼndi a nda bai. Ma haha ambaha Haman, a ntila wofaʼa.