Esther 3 - Ma Zhiklè

Haman a vhè ma a géɗ ndohi Juif

¹ Te deɓ nengaʼa, bi Assuérus a nfu Haman, kra Hammadatha, ndo Agag, a ndo mbiaʼa a géɗ tsuvomhi nengaʼa tèlèba.

² Ndohi mizlinè bi tèlèba man ta nza a ma gi bai ta gurɓahi a sam Haman, bai a ngoɗ arsa. Aman Mardo-chée a ngurɓahi a sam na ɓai.

³ Ndohi mizlinè bai man ta nza a ma gi bai ta gaɗa na Mardochée: Ka gi mèdègèɗ a ma bai èhèmè?

⁴ Aman ko ta gaɗa na pèc pècèk, nengaʼa a nfa na gèɗ ɓai. A ta menda na Haman, a da cè ma Mardochée ɗè? Mardochée a nʼngra ta: i ndo Juif.

⁵ Aman Haman a rkaʼa, Mardochée a gürɓahi a sam na azɓai, a ngu ndav.

⁶ Aman a woya a nkéɗè Mardochée a géɗ na azɓai, te man ndohi ta ngra na verzi Mardochée. Haman a hèsh maya, aman a zede ta ndohi Mardochée, ndohi Juif, te kokwar-bi Assuérus tèlèba.

⁷ Ki nshèlékuraʼa, ki Nisan, man bi Assuérus bai te mvi 12, ta gu jimèr a géɗ pats a kia, a sam di Haman, a jimèr a nkala a géɗ ki 12, ki Adar.

⁸ Haman a ngaɗa na bi Assuérus: Ndohi ngiɗè ta zhè, ta venda te va ndohi kokwar bi ngaya, ta kuzlko va ta auda a sam ndohi ngiɗè, ma kita tengaʼa ara ma kita ndohi herkeda ngiɗè ka ɓai,, ta jèjèr ma kita bi azɓai. Ambaɓai aman bai a jèke ta arsa.

⁹ Aman ambaha bai, da gu ɗèlèwèr, da zede ta. I da pil ndohi mbazl ta gurso 10.000, a ta vi Suli a gi skwi mèshèlè bai.

¹⁰ A bai a nsuɗko tèslri nengaʼa auda te rai, a mva na Haman, kra Hammedatha, ndo Agag, ndo mayam ndohi Juif.

¹¹ A ngaɗa na Haman: Suli da nza a ri ngaya! Ndohi sa, gau a sam ta ara man ka huro!

¹² A ta baha ta ndohi mwindè ɗèlèwèr bai a ki nshèlèkuraʼa, mʼmèn 13 kia, a ta Windo ɗèlèwèr ara man Haman a ngaɗa ta, a sam golahi bai, a ngomnahi ndohai, a kokwar tèlèba, a sam tsuvomhi ndohi tèlèba, a kokwar staɗ staɗ tèlèba a lamba daʼai ta, a daʼai kokwar ta. Ta Windo ɗèlèwèr a nzlembaɗ bi Assuérus, a ta tkotseda tèslri nengaʼa a pa.

¹³ A ta zlinde ta ndohi sak tsam tsam a ɗèlèwèr a kokwar-bi tèlèba, ma man a gaɗa aman ta zeda ndohi Juif tèlèba, ta bazl ta, ta ndev ta tèlèba; ko gola ko babgai, ko wudahai, ko ngwozai, tèlèba a pats staɗ, te ki 12, mʼmèn 13, ki Adar, a ta da helama ta skwi ta.

¹⁴ Ɗèlèwèr ta Windo a kokwar staɗ staɗ tèlèba, a sam ndohi kokwar tèlèba, aman ta tila skwi tèlèba, a ta gi a pats sa.

¹⁵ Ndohi sak to do tsam tsam, ara man bi a goɗo. A ta ngreda ma bi te gi bi Suse. Bai a Haman ta nza tʼhai a ta si zom. A kokwar Suse tèlèba a lèyè.