Esther 1 - Ma Zhiklè

Ngolala bai

¹ Te ndev man Assuérus bai, a ngu bi a hün te Inde ha ndè Ethiopie, a géɗ kokwar-bihi nʼngelaʼa 127.

² Assuérus a géɗ sam nʼnzi bi nengaʼa, te gi bi te Suse.

³ Aman a ngu bi te mvi mamakaraʼa, a ngu skwi nʼndi ngolala a wud bihai a ndohi mizlinè nengaʼa tèlèba. Ndohi var Perse a Mède, a ndohi ngomna a tsuvomhi kokwar tèlèba ta shkè a sam na.

⁴ Assuérus a nʼngra ta skwi mèshèlè a nʼnjèl kokwar-bi nengaʼa a wuɗi nʼnjèl na mbiaʼa, mʼmèn kumba – a gi mʼmèn 180.

⁵ Te deɓaʼa bi a ngu skwi nʼndi ngolala a ndohi ngiɗè te kokwar na te Suse tèlèba, ko mbiaʼa ko nkèshèʼa; ngolala a gu mʼmèn 7 a dalmagi bai.

⁶ Ta dzazla sak gi krengaz a di maslaka nslekadaʼa a mʼmadzaʼa, mʼmana a teɓa gogumi vè-vèzh a dasi-ri verzhègenè. Sam mʼmènè guro a verzhègenè, ta a pa a sam herkeda mvècèʼa a kwa tsaɗ tsaɗ, ɗaz-kwa, nshftök a krengaz.

⁷ Ta su skwi te kokwi guro, ngi ta tsaɗ tsaɗ tèlèba. Zom bi a ndev ɓai, te man bi a gi kda azɓai.

⁸ A géɗ skwi nsai, bi a gaɗa, ndo man a woya da saka skwi na.

⁹ Vasthi, ngwoz bai, a ngu skwi nʼndi ngolala a ngwozi te gi bi Assuérus.

Vasthi a gi mèdègèɗ a sam bai

¹⁰ A pats matsaradaʼa, man zom a da na gèɗ a bi ma, a ngaɗa na Mehuman, Biztha, Harbona, Bigtha, Abagtha, Zéthar a Carcas, ntokotasl-bihi tsaraɗ man ta wèr di bai,

¹¹ aman ta baha na Vasthi, ngwoz bai, a mpèɗè gèɗ bai, a sam na; a woya a ngra ta mbambi di na a ndohai, a tsuvomhi na, te man nengaʼa nhudemshè te dai.

¹² Aman Vasthi, ngwoz bai, a woya man a nfi gèɗ a ma bai man golahi nengaʼa ta menda na ɓai, a woya ndè ɓai. A bai a ngu ndav kumba, a ndza na a ndav worworaʼa.

¹³ A ngaɗa ta ndohi kilèa na man ta sun ndèl skwi te bantai; aranta bi a nʼngra ta ma nengaʼa a ndohi tèlèba man ta sun ma kita a ma nkwèr bai.

¹⁴ Carshena, Shèthar, Admatha, Tarsis, Mérès, Marsena, Memucan, wud bihi Perse a Mède tsaraɗ, ta zhè a sam na, ta nza a sam di bai, tsuvomhi te kokwar bai.

¹⁵ Ma kita a gaɗ kè? Nga da ga na Vasthi, ngwoz bai, kè, aman a fi gèɗ a ma bi Assuérus azɓai, man golahi bai ta menda na?

¹⁶ A Memukan a ngaɗa na bai, a sam di tsuvomhi nengaʼa: Vasthi, ngwoz bai, a ngu skwi ambaɓiaʼa a sam bi genè ka ɓai, aman a sam tsuvomhi tèlèba, a sam ndohi kokwar-bi Assuérus tèlèba.

¹⁷ Skwi man ngwoz bai a ngau, ngwozi tèlèba ta da shinèʼa a ta tèlèba ta da kwola ma baki ta, a ta gaɗa: Bi Assuérus a mbaha na Vasthi, ngwoz bai, a sam na, a nengaʼa a nda ɓai.

¹⁸ A patsna langa ngwozi bi te Perse, te Mède, man ta tsena skwi man ngwoz bai a ngau, ta da Sala ta va a gèɗ a tsuvomhi bi tèlèba; te deɓaʼa ndzoan a zhè, nlivè-ndo a zhè mènè!

¹⁹ Aman ambaha bai, da goɗ ma nengaʼa, a ta windè a va ma kita Perse a Mède, ma bai, man a mindè a deɓa azɓai: Vasthi, a slaha a ndè a sam bi Assuérus asaɓai, klèng. Ngwoz ngiɗè, man a lèɓèslè a fena nengaʼa a ndi a ngwoz bai.

²⁰ Ndohi ta da tsena ma bai te kokwar-bi nengaʼa mbiaʼa tèlèba, a ngwozi tèlèba ta da slébèrdè baki ta, ko mbiaʼa ko nkèshèa.

²¹ Ma haha ambaha bai a tsuvomhi nengaʼa. A bai a ngu ara man Memucan a ngaɗa na.

²² A nzlündo ɗèlèwèr a kokwar nengaʼa tèlèba – kokwar staɗ staɗ tèlèba a daʼai kokwar ta, a lamba daʼai ta – aman ndohi tèlèba ta slaha ta jèngèʼa: nguraʼa staɗ staɗ teleba da kwor gi na, a ngwozi te gi na tèlèba!