Esdras 5 - Ma Zhiklè

Ta gi mizlinè a ma ma

¹ Aggée, ndo nhadka ma Zhiklè, a Zacharie, kra Iddo, ndo nhadka ma, ta hodko ma a géɗ ndohi Juifs man ta zhè a nda tengaʼa te Juda, te Jérusalem, a nzlembaɗ Zhiklè Israel.

² A Zorobabel, kra Shealthiel, a Josuè, kra Jotsadak, ta slambaɗa a ta hüno nrèm gi Zhiklè te Jérusalem. Ndohi nhadka ma Zhiklè ta zhè a nda tengaʼa a ta nza ta a deɓa.

³ Te ndev nasa, Thathnai, bigol bai te wud woyam, a Shethar-Boznai, a mandalahi tengaʼa ta shkè a sam ta, a ta gaɗa ta: Ngaɗa kinè, va-rom gi haha, a kin til gi Zhiklè nkezlaʼa zaʼa wa?

⁴ A ta gaɗa ta: Va-ngra nga zlembaɗ ndohi man ta rèm gi haha!

⁵ Aman Zhiklè a zhè a sam ndohi nhalaʼa te ndev ndohi Juda, a ta gedassa civèɗ mizlinè a ndohi ɓai, ha ta zlindo ɗèlèwèr a sam bi Darius, a ta ngots ma nengaʼa a deɓa ma.

⁶ Ɗèlèwèr man Thathnai bigol bai te wud woyam, a Shethar-Boznai a mandalahi na, gwoli Apharsac, te wud woyam, ta zlinda na bi Darius.

⁷ A sam bi Darius, mbalai!

⁸ Bi da suna: ngo do a kokwar Juda, a sam man gi Zhiklè mbiaʼa a pa. Ta ɗüzlo a kwa mpaslaʼa, a ta fa ntatak a ntamagai. Ta gi mizlinè amba amba, ta wosla te mizlinè.

⁹ A nga dzhaɗ ta ndohi nhalaʼa, a nga gaɗa ta: Mva kinè civèɗ a kin rèm gi haha a kin rufa gi Zhiklè nkezlaʼa wa?

¹⁰ Nga dzhoɗ nzlembaɗ ta, a nga ngra ka, a nga va ka nzlembaɗ tsuvomhi ta.

¹¹ Ta mbeɗa nga a ma ar haha: Nga ɓèlèlihi Zhiklè, Zhiklè gidfèk a herkeda, a nga til gai man ta gu zlèzlèʼa. Bi Israel mbiaʼa a nroma, a nrufaʼa.

¹² Aman te deɓaʼa babhi nga ta poko na gèɗ ndav auda a Zhiklè te zhiklè te géɗèʼa, a mpe ta a ri a bi Nebucadnetsar, bi Babylone, ndo Chaldée, a nengaʼa a ngedassa gi haha a nhel ta ndohi a ɓèlè a kokwar Babylone.

¹³ Aman Cyrus, bi te Babylone, te mvi mshèlèkuraʼa, bi Cyrus a mva ta civèɗ a ta rèm gi Zhiklè zaʼa.

¹⁴ A kolongwi gi Zhiklè guro a verzhège-nè, man Nebucadnetsar a nheldauda te gi Zhiklè te Jérusalem, a ndaʼa a gi mʼmbèh skwi te Babylone, bi Cyrus a mhulkoɗauda te gi mʼmbèh skwi te Babylone zaʼa, a mpa na a ri a Sheshbatsar, man a fu a ndo mɓer kokwar na.

¹⁵ A ngaɗa na: Hul kolongwi haha, a ka peda a sam nkezlaʼa te Jérusalem! Te deɓaʼa sèi ta rèm gi Zhiklè zaʼa a sam man a nza halaʼa.

¹⁶ A Sheshbatsar matsa a mshkè, a mvau kwa verzi gi Zhiklè te Jérusalem. Daga pats sa, ha patsna, ta rèmèʼa, aman ta rufa di ɓai.

¹⁷ Antanta, aman ambaha bai, sèi da wor te gi mèshèlè bi te Babylone, aman arsa a vava, aman bi Cyrus a mva ta civèɗ a ta rèm gi haha a Zhiklè te Jérusalem. Te deɓaʼa bai da menda nga ma nengaʼa!