Esaie 66 - Ma Zhiklè

Nslébèrdè Zhiklè

¹ Ndo nzi pèc pècèk a gada: Gidfèk sam nʼnzi bi ga, a herkeda skwi nfi sak ga. Gi mè, man kin woy a kin gayè? Sama tema, man i nzi a pa?

² Ri ga a ngau skwi haha tèlèba man a zhè, nʼnga aranta, Ndo nzi pèc pècèk a gaɗa. Ndo man a manda gèɗ a hai, a ndav nengaʼa a mbèɗè, ndo man a gi zlau ma ga, i rkaʼa, a i pi di a nengaʼa.

³ Ndo man a keɗa zlè, lèmèlèmè ara ndo man a keɗa ndo. Ndo man a zli tambak, a ngelama na gèɗ a kda, lèmèlèmè ara ndo man a vi pombaz wodala a Zhiklè. Ndo man a fi vogwa a ɓurdi a ndara na vrai, lèmèlèmè ara man tá wuffè a gèɗ civèɗ tengaʼa, a skwi tengaʼa ambaɓiaʼa ambaha ta te ndav.

⁴ Lèmèlèmè i da wuffè a gèɗ skwi man ambaɓai man i da ga ta, man a ndara ta. Aman i boho, ta mbeɗkay a ma ɓai. Aman i goɗo, ta tsena ɓai. Aman ta gu skwi man ambaɓai a sam ga; a skwi man i woya ɓai, ta woya holholaʼa.

⁵ Kinè man kin gi zlau ma Zhiklè, va-tsena ma Ndo nzi pèc pècèk! Kramamhi kinè man ta gi shèwa a kinè, man ta kwol kinè a gèɗ nzlembaɗ ga, ta gada: Ndo nzi pèc pècèk da ngreda nʼnjèl na, a nga humda a mwuffè kinè! Aman ta dá ngècè hori a dai.

⁶ Tsenaʼa! Mbèhè ngiɗè, nhè-zlèwè ngiɗè a cinè te kokwar! Mbèhè ngiɗè a cinè te gi Zhiklè! Daʼai Ndo nzi pèc pècèk, man a ga ta ndzoan a mayam-hi nengaʼa.

Jérusalem, mam wudahai

⁷ Ga ngwoz a dish kra, nya ma; ga a dza na, nya kra ngura ma.

⁸ Ntsena ar haha wa? Mrka skwi ar haha wa? Kokwar-bi a gi a pats staɗgenè ɗè? Ndohi herkeda ta y i a sam staɗ, a pats staɗ ɗè? Ga a dish va, Sion nya wudahi na ma.

⁹ I gi a wudahi ta grè tʼhwaɗ a ta yi azɓi ɗè? Ndo nzi pèc pècèk a gada. Man ɓai i gi a ta yi wudahai, a i nde ta adeli te deɓaʼa ɗè? Zhiklè ngaya a gaɗa.

¹⁰ Va-wuffa a nda kokwar Jérusalem, va-slu dimèsh a géɗ nengaʼa, kin tèlèba man kin woyaʼaa ndav kinè. Va-wuffa a nda nengaʼa, kin tèlèba man kin lèyèʼa.

¹¹ A bid kinè, a ngeza kinè a wa nengaʼa ara kra man a ntseɗa wa, a kin siaʼa a kin cidèʼa, a kin ngeza a vna.

¹² Aman Ndo nzi pèc pècèk a gaɗa: Na haha i da wuzhè gumi ga a sam na ara woyam man iyam a hi te pa, a nʼnjèl ndohi herkeda ara woyam man a hi auda a dzah, Ta humbat ta wudahi tengaʼa a rai, ta pe ta a gsa a ta bid ta.

¹³ Lèmèlèmè ara ndo man mam na a bidèʼa, i woya a i bid kinè. I da bid kinè te kokwar Jérusalem.

¹⁴ Aman kin rka skwi haha, ndav kinè a da gi langlangaʼa, va kinè a ɗai ɗukeɗukaʼa ara mandai, a ri Ndo nzi pèc pècèk nʼngreda auda a sam ɓèlèlihi nengaʼa, a ndzoan nengaʼa a sam mayamhi nengaʼa.

¹⁵ Na haha, Ndo nzi pèc pècèk a di a shkè te va vogwa, a ndzoan nengaʼa ara nèʼèn vogwa.

¹⁶ Ndo nzi pèc pècèk a gi kita a sam ndohi haha tèlèba a vogwa, a tsakwal te rai, a ndohi man Zhiklè a bazl ta ta gi a vata.

¹⁷ Tengaʼa man ta kezla ndav ta, a ta pana ndav ta, te gi lak, a ta dè a gi lak a verzi ndo staɗ te ndevaʼa, man ta ndi zluèd wodala a skwi man nlizhèa ara koʼom, ta da ndev ta a sam staɗ, Ndo nzi pèc pècèk a gaɗa.

¹⁸ I sun skwi man ta giaʼa, a skwi man ta hérèʼa. A i shkè, aman i ɓic ta ndohi herkeda a daʼai tsaɗ tsaɗ tèlèba, a ta shkè, a ta rka nʼnjèl ga.

Herkeda tèlèba a shid gèɗ

¹⁹ I da ngrédè skwi a sam ta, te va ndohi man ta zhè a nshèffè dai. I zlin-dè ndo a sam ndohi herkeda: a Tarsis, Pul, Lud, ndohi man ta ɓèr sulom, Tubal, Javan, a herkeda dra nte ndev iyam, man ta tsena ma ga di ɓai, a ta rka nʼnjèl ga di ɓai. A ta njè ta nʼnjèl ga a ndohi herkeda.

²⁰ A ta hulkoɗi kramamhi kinè te ndev ndohi herkeda tèlèba, a skwi man ta vi a Zhiklè, a deɓ plèsh a kikai, a mota, a deɓ kɗèh, zlugumai, a kokwar Jérusalem, a sam za ga nkezlaʼa, Ndo nzi pèc pècèk a gada; lèmèlèmè ara wudahi Israel man ta hulkoɗi skwi man ta va na Zhiklè a gi Ndo nzi pèc pècèk, te kokwi mpa-naʼa.

²¹ Te ndev tenga ba i pe ta ndohi a ndohi mvi skwi a Zhiklè, a ndohi Lévi, Ndo nzi pèc pècèk a gada.

²² Lèmèlèmè ara giɗfèk mɓuaʼa a herkeda mɓuaʼa, man i giaʼa a ta nzi dai a sam di ga, Ndo nzi pèc pècèk a gaɗa, lèmèlèmè verzi kinè a nzlembaɗ kinè ta nzi dai a ma ma.

²³ A mvèng ki ngiɗè, a mvèng ki ngiɗè, a pats nshèk va ngiɗè, a pats nshèk va ngiɗè, ndohi tèlèba ta shkè a ta tsi rai a sam ga, Ndo nzi pèc pècèk a gaɗa.

²⁴ Ta dè auda, a ta rka nckondo ndohai man ta kwolyè. Meturɗi te va tengaʼa a metsi azɓai, a vogwa a sam tengaʼa a mbècè azɓai, a ta ndara ta ndohi tèlèba.