Esaie 63 - Ma Zhiklè

Pats kita Zhiklè

¹ Nenga wa, man a shkè te Edom, te Botsra, a maslaka vèvèzh a va, a dzugorko va a ri a géɗ maslaka nengaʼa, ndaɓaraʼa a wuɗai! Iyè man i goɗ a géɗ ngi-zuraʼa, a i pasla kinè ri ma mʼmbel ndo a hai.

² Maslaka ngaya vèvèzh èhèmè? Maslaka ngaya ara man a ndo nkèl barassa èhèmè?

³ I kala nyi wof a géɗ ga, a ndohi ngiɗè ta takahayè ɓai. I kal ta, i gats ta hi a sak a ndzoan ga. A iyamaʼa a nguckay a maslaka ga, a ntsa-tsaslay maslaka.

⁴ I hur pats mpil gèɗ ndohai te géɗ ga ma, a mvi nsumka ta ndohi a deɓa kalka ma.

⁵ I ngul dai, aman ndo ntakahayè azɓai. I rzl ga, aman ndo nʼnzay a deɓa azɓai. A i gau a ri ga, a i mbela a géɗ ndzoan ga.

⁶ I mbats ta ndohi herkeda a hi a sak a ndzoan ga. I kerd ta a pa a sak a ndav, a pombaz tengaʼa a nhu a herkeda.

Ta su Zhiklè te va halaʼa

⁷ I woya a i shid gèɗ a géɗ pombi Ndo nzi pèc pècèk, a gèɗ skwi mbia tèlèba man Ndo nzi pèc pècèk a gau a sam nga. Skwi man amba kumba a mva ta ndohi gi Israel, man ta sia te va, a mva ta pombi nengaʼa man a ndev ɓai.

⁸ Nengaʼa a ngaɗa: A vava, ta ndohi ga, wudahi man ta da ngwodyè azɓai. A ngu a ndo mʼmbel ta te matakwan tenga tèlèba.

⁹ Ndo sak ka ɓai, gol Zhiklè ka ɓai, man a mbel ta; nengaʼa a ri na. Nenga a ri na a sumka ta a deɓa, te mwoy-ndo nengaʼa man ta sia te va. A wara ta dai, a mɓerka ta daga zlèzlèʼa.

¹⁰ Aman tengaʼa ta slambaɗa na va, ta ɗawarama na ndav a Mèzhèɓ Zhiklè nkezlaʼa. A nengaʼa a nde na mayam ta, a ngu var a tengaʼa a ri na.

¹¹ Te deɓaʼa ta hur pats nzlèzlèa, man ta zhè a nda Moise, ɓèl na: Nengaʼa man a nhelka ta auda te iyam mbiaʼa, a nda ndo nwar ta, na tema? Nengaʼa man a mva na Mèzhèɓ nkezlaʼa a ndav, na tema?

¹² Man ri nengaʼa nʼnzalaʼa a ntakaha ri mandi Moise, a nʼngela iyam a ma tengaʼa, aman ta hér nzlembaɗ nengaʼa a mèdèp.

¹³ Man a nde ta te nkulgodok ara plèsh man a dè te ndev hèshèkèɗ, a skwa a ntsama ta sak ɓai?

¹⁴ Lèmèlèmè ara zlèhai man ta sulomkaɗahai te za, Mèzhèɓ Ndo nzi pèc pècèk a nde ta a sam nshèk va. Ka de ta ndohi ngaya aranta, a nzlembaɗ ngaya a gi a mbiaʼa.

Ntsi ri a sam Zhiklè bab ta

¹⁵ Paka di te zhiklè, te gi ngaya nkezlaʼa, nʼnzalaʼa, a herkeda! Srak ngaya tema, wuɗi ngaya tema? Mwoy-ndo ngaya mbia tema? Nga se ka te va azɓi ɗè? Nga da se ka te va genè!

¹⁶ Aman ka bab nga! Abraham a sen nga ɓai, Israel a nse-naha nga ɓai; ka Ndo nzi pèc pècèk, ka bab nga. Nzlembaɗ ngaya ‘ndo nsumka nga a deɓa’, tʼhinkaɗ na.

¹⁷ Ndo nzi pèc pècèk, ka jèke nga a nga beza zlawa te civèɗ ngaya èhèmè? Ka gi a ndav nga ngwora a nga gi zlau ngaya azɓi èhèmè? Menkaɗa deɓa a géɗ ɓèlèlihi ngaya, a géɗ verzi ndohi man ta a ngaya.

¹⁸ Ndohi nderɗa Zhiklè ta bizhè a ndev gi Zhiklè, a ndohi mayamhi ta mbatsaha sam ngaya nkezlaʼa a sak èhèmè?

¹⁹ Nga ga a ndohi man ka kwor ta ɓi fèt, ndohi man ta co nzlembaɗ ngaya ɓai, èhèmè!