Esaie 41 - Ma Zhiklè

Zhiklè a gaɗa ta ndohi herkeda

¹ Kinè herkeda nte ndev iyam, kinè ndohi herkeda, va-nza tètè a kin tsena ma ga! Va-herdekay va a kin godo. Ngo-do kita cèw!

² Mbaha na nengaʼa man pèc pècèk ba ngula genè, te verzi gai, wa? Man a tsede ta ndohi herkeda a hi a ma na, a nkoldokoɗi ndohi auda te bi, wa? Tsakwal nengaʼa a ganzaf taa pa, lèkèɗ nengaʼa a venda ta gèɗ ara lokotor man kozlar a heldama.

³ Nengaʼa a dzam ta, sak nengaʼa nsal na, a cinè a géɗ herkeda azɓai.

⁴ Ngu arsa wa? Ngu wa? Iyè Ndo nzi pèc pècèk, man i hüno verzi verzi ndohai tʼhinkaɗ na. Iyè nshèlèkuraʼa, i te va ndohi ndikèma ndohai lèmèlèmè.

⁵ Herkeda nte ndev iyam ta rkaʼa, a pra ta zlau a gèɗ sawaʼa. Verzi herkeda a gu-dzai, ta herdeka va, a ta shkè tèlèba:

⁶ Ngiɗè a ngaɗa na ngiɗè: Nzala va!

⁷ Ngwozla man a sun nrèmè a poko na gèɗ auda a ngwozla mviɗè züdo; ndo ngum kwa a poko na gèɗ auda a ndo ntsi züdo; a ndo nderzla züdo a gaɗa: Amba a vata! A ntsa na züdo a va, a ngècè wuɗai.

Zhiklè a gaɗa na Israel

⁸ Aman ka, Israel, ɓèl ga! Jacob man i ngotskoɗauda, ka te verzi Abraham, mandal ga.

⁹ Ka man i cka ka te verzi herkeda, man i baha ka te man a tsagi herkeda, a i gada ka: Ka ɓèl ga. I ngatska ka auda, i kwol ka ɓai.

¹⁰ Ka gu zlau ɓai, i zhè a sam ngaya. Ka ngul di zlau lawlawa ɓai, aman i Zhiklè ngaya! I va ka wuɗai, i takaha ka ma ba, i gs ka te ri mandi ga man a ngul skwai.

¹¹ Na haha ta tèlèba man ta gu ndav a gèɗ ngaya, ta da ngècè hori a dai, gèɗ ta ndzakaɓa. Tengaʼa man ta gu ndzoan a ka, ta gedas ta a ta zi ta.

¹² Ka da has ta, ka da ngats ta azɓai, tengaʼa man ta bozl va a ka. Ndohi man ta gu var a ka, ta da gedas ta, ta zi ta.

¹³ Aman iyè, Ndo nzi pèc pècèk, Zhiklè ngaya, man i gs ka te ri mandi ngaya, a i gaɗa ka: Ka gu zlau ɓai, i takaha ka.

¹⁴ Ka gu zlau ɓai, Jacob, me-turɗai; Israel, meturɗi nkèshèʼa. I takaha ka, Ndo nzi pèc pècèk a gaɗa, Zhiklè Israel nkezlaʼa, man a mbel ka.

¹⁵ Na haha i ge ka a mbelau züdo, man züdo ndizlèa te pa zuraʼa. A ka da dum za a vna, a ka kerd ta, a ka düm kwazlazlamhai a vna ara topok dau.

¹⁶ Ka da pèvaʼa, a kozlar a hil lokotoraʼa, a ndombozlor a ksar-daussa. Aman ka, ka da wuffè a gèɗ Ndo nzi pèc pècèk, ka da njèl Zhiklè Israel nkezlaʼa.

Iyam tʼhèshèkèɗ

¹⁷ Aman mbelawahai a ndohi ntawas-saʼa ta woy iyam a ta ngècè azɓai, mi iyam a gworama ta nèʼèn te ma, iyè Ndo nzi pèc pècèk, i cinè kuɗ tengaʼa a i jèke ta a gèɗ ta azɓai.

¹⁸ I winko iyam auda a tsohi-tsoh, thal iyam te slrats, i ngwoda hèshèkèɗ a sam nhèyè iyam, a herkeda ngworaʼa a lèlèy iyam.

¹⁹ I gi dawai a tsna a gonokwaɗbai a kondong a lémon a hèshèkèɗ, a va mohozo gi dau.

²⁰ Tèlèba ta da rkaʼa, a ta suna, ta her gèɗ, a ta co a ndav: skwi haha a shkè te ri Ndo nzi pèc pècèk; Zhiklè Israel nkezlaʼa a ngau.

Mʼmbèh skwai a takaha ta ndohi ɗè?

²¹ Va-ngreda malwudi kinè, Ndo nzi pèc pècèk a gaɗa. Va-helka ta vrihi kinè, bi Jacob a gaɗa.

²² Sèi ta shkè a ta ngreda nga skwi man a di a shkè! Nhèd ma nhalaʼa tema? Vo-goɗa, a nga cè a ndav! Skwi man a gi a ma, va-ngra nga, a nga cinèʼa, a nga shin skwi man a di a shkè!

²³ Vo-goɗ skwi man a da gai, a nga shi-nèʼa te nengaʼa, kinè zhiklèhai. Halau, va-gu skwi ngiɗè, ko amba, ko ambaɓai, a nga rka nrkedi kinè a nga rzl nga a pa.

²⁴ Na haha, kinè skwi ambalai. Skwi man kin giaʼa, skwi ka ɓai. Ndo man a woy kinè, a ndèr a ndo.

²⁵ I slambaɗda ndo ngiɗè te tsagai, a nengaʼa a mshkè; te verzi gai a bèhè nzlembaɗ ga. A mbatsa-ha ta bihi ara wujèɗ, lèmèlèmè ara ndo nrèm shiɗèf a gècè rɓasl.

²⁶ Nʼngreda tʼhinkaɗ na wa, a nga sun zlèzlèa a nga gaɗa: A vava, gokwèn! Ndo a nʼnje nga ɓai, ndo nʼhadka nga ma ɓai, ndo a ntse-na ma kinè ɓai.

²⁷ I nshèlèkuraʼa man i njè ta ndohi Sion, a i zlündo ndo sak a ma mwuffè a kokwar Jérusalem.

²⁸ A i ngul dai: Te ndev ndohi haha, ndo azɓai man a sun maya, a i jhèɗè, a ta mbeɗay a pa.

²⁹ Na haha, tèlèba ndohi ambalai; skwi man ta gia, skwi ambalai; kwa man ta zlatseda ara mblom, skwi ambalai.