Esaie 34 - Ma Zhiklè

Wobau

¹ Vo-washkè, kinè kokwar-bihai, va-tsenaʼa! Kinè ndohi herkeda, va-fu zlembaɗ! Herkeda a ndohi a géɗ herkeda, herkeda kerpaʼa a skwi nftsa a pa tèlèba, va-tsenaʼa!

² Ndo nzi pèc pècèk a gi ndav a géɗ ndohi herkeda tèlèba. Ndav a dza na a géɗ ndohi var tengaʼa tèlèba. A mpe ta a ri a ngédèshè, a sam man ta zlama ta daʼai.

³ Ndohi tengaʼa man ta bazl ta, ta wushedaussa, nckondohi tengaʼa ta zhkè njhünjhünjhaʼa, pombaz tengaʼa a hakaɗi te za.

⁴ Ndohi var Zhiklè ta venda gèɗ ta. Giɗfèk mpaɗaʼa, ara huba. Ndohi var nengaʼa ta gworaʼa hünjuɓaʼa, ara vah wof barassa man a ɓüt na, ara vah ngworaʼate wof kslor.

⁵ Tsakwal Ndo nzi pèc pècèk a pombaz a pa, a nkeɗa Edom, ndohi man a mpe ta a ri a ngédèshè, a mpe ta a ri a kita.

⁶ Ndo nzi pèc pècèk a tsakwal te rai, man pombaz a pa guzhguzhèʼa, mbeza a pa tambelththaʼa, a pombaz tambak a ɓok, a mbeza kwa deɓa drok. Ta gi ngolala nzli skwi a Ndo nzi pèc pècèk te Botsra, ta bazla skwi kumba te Edom.

⁷ Ndohi ta bazl ta a nda kevar, ndohi var a nda marai, herkeda a si pombaz kumba, a mbeza a gi a mongoɓa.

⁸ Aman pats mpil gèɗ Zhiklè a mshkè, a ta pela na gèɗ, ndohi nʼnga na ndzoan a Sion.

⁹ Woyam Edom a ngwèdè va na a kuɗ tèngètè, a herkeda a skwi nvècè vogwa. Kokwar tèlèba a ndi ara kuɗ tèngètè, a vogwa a ndiaʼa a pats a vaɗ.

¹⁰ A mbècè azɓai a mèdèp. Vodzok nengaʼa a ɗüzhè a ma ma, ha verzi wud wuda. A ndi a hèshèkèd a mèdèp, ndo a shèwèlè a pa azɓai;

¹¹ sam nʼnzi tugwom a matakwas, wuzhèm a ngwak. Ndo nzi pèc pècèk a mva na ngédèshè a deɓ kokwar.

¹² Ma-dzagihai ta da nzi a pa; ndohi nengaʼa mbibihiaʼa klèng. Ta vi bi te pa azɓai, bihi nengaʼa klèng.

¹³ Te gi bihai, vatak a grè; nhelas a nkuɗdzarai ta gi mbiaʼa, barkda a gi gi te pa, a zhèrèu a nzi a pa.

¹⁴ Skwi dakhai ta zli gèɗ te pa a nvalaval. Madza-gihai ta zli gèɗ te pa. Sèi mblom a nzi a pa, a mènè a pa.

¹⁵ Ntümsho a nzi te pa, a yi slaslai, a haya slaslai a mènè a pa. Moho-dokihai ta ɓicè va a pa, a ta gi mbalai a va.

¹⁶ Va-wuzho te ɗèlèwèr Zhiklè a kin jongo! Skwi man a zaha va na te vaʼa azɓai. Aman Ndo nzi pèc pècèk a ngoɗa, a Mèzhèɓ nengaʼa a mɓicaʼa.

¹⁷ Zhiklè a liva ta kuma a skwi ta a ri na. A mèdèp skwi tengaʼa; a ta nzi a pa a ma ma, ha verzi wud wuda.