Esaie 31 - Ma Zhiklè

Zhiklè a mbel ndo, Egypte ka ɓai

¹ Wobau a géɗ ndohi man ta dè hi a kokwar Egypte, a ta hèsh skwi ntakaha ta te pa. Ndohi man ta pi ndav a plèsh a kiki var, man ta zhè kumba, a ta pi ndav a ndohi plèsh, man ta zhè a vata, aman ta pa ndav a Zhiklè ɓai, a ta jhèɗè te ri nengaʼa azɓai.

² Aman nengaʼa ba, maya na zhè, a da fi matakwan, a mindè ma nengaʼa a deɓa azɓai. A da slambaɗa ta va a ndohi ambaɓihiaʼa, a skwi man ndohi ambaɓihiaʼa ta woy a ta takaha kinè a vna.

³ Aman ndohi Egypte, ndohi genè, Zhiklè ka ɓai. Plèshihi tengaʼa, zluèd genè, mèzhèɓ ka ɓai. Aman Ndo nzi pèc pècèk a geda ri nengaʼa, ndo ntakaha ndo, a ndo man nengaʼa a takaha, ta wush ta hi cèw cèw ba, a ta gedas ta a sam staɗ.

⁴ Aman Ndo nzi pèc pècèk a ngaɗayè: Lèmèlèmè ara marizhèlè a wud nengaʼa ta bebrè a géɗ skwi man ta gso, a ndohi nwèr skwai tèlèba ta kala na gèɗ, a gi zlau nhèzlèwè tengaʼa azɓai, a gi gurts a sam ta azɓai – lèmèlèmè Zhiklè bi mbiaʼa a shkè a ngi var a géɗ za Sion, a géɗ za nengaʼa.

⁵ Ara ɗiak man a zhèwèlèʼa, Zhiklè bi mbiaʼa a da ɓèr kokwar Jérusalem, a ɓerèʼa, a mbelaʼa, a ga na matakwan azɓai, a prokoɗauda.

⁶ Va-menkaɗa deɓa, ndohi Israel, a sam nengaʼa man kin ga na ri a gèɗ kumba!

⁷ A pats nasa ndo staɗ staɗ tèlèba a da kwèl skwi mbèh skwi nengaʼa, nʼngaʼa a verzhège-nè, a guro, man kin gau a ri kinè, man kin gau mali a vna.

⁸ A ndohi Assyrie ta da bazl ta a tsakwal, tsakwal a bazl ta te ri ndo ka ɓai; tsakwal a da ndev ta, tsakwal a gèɗ na, a ri ndo ka ɓai. A ta hi ta auda a sam tsakwal, a ndohi var tengaʼa ta ndi a ɓèlè.

⁹ Za nengaʼa a wérzl na te ri zlau, a ngul ndohai ta hi ta a ta jèkeda gambar a pa. Ndo nzi pèc pècèk, man vogwa nengaʼa a zhè te Sion, rèwèc nengaʼa a zhè te Jérusalem, a goɗ aranta.