Esaie 29 - Ma Zhiklè

Zhiklè a pra ta zlau a va a ndohi Juda

¹ Wobau a géɗ Ariel! Ariel, kokwar man David a nza a pa. A mvi a mvai, va-gu ngolala mvi skwi a Zhiklè!

² I woya a i ndaɗatsa na va a kokwar Ariel, a ta kuɗai, a ta gi wobau, a gi a sam ga a rèwèc.

³ I woya a i tèuda ka a pa, a i herda ka kuma ndul ndulaʼa, a i ɗizlè zlazlar a sam ngaya.

⁴ Te deɓaʼa ka da gèɗè tʼhai tʼherkeda, a ma ngaya a tsenkaɗauda te ndev hutsoɗ. Daʼai ngaya a cinè ara daʼai mèzhèɓ skwai te vèvèɗ, a ma ngaya a tsenkaɗauda te va mberfenèk ara daʼai mbatsa.

⁵ Mayamhi ta gi ɗekeɗekaʼa ara lokotor mberfenèk, a ndohi shèwa ngaya ta gi ɗekeɗekaʼa ara topok dau man kozlar a ksardaussa. Te deɓaʼa, a nasa nasa, tsam tsam,

⁶ Zhiklè bi mbiaʼa a dè a sam ngaya a ntsi iyam, a ngudzi herkeda, a kozlar mbiaʼa, a iyam mbiaʼa, a nèʼen vogwa man a ndi skwai.

⁷ Ndohi herkeda ɗekeɗekaʼa tèlèba ta ara nshunè a vaɗ, ara skwi man ka rka te nshunè a vaɗ, a ta gi var a Ariel; ta tèlèba man ta gi var a vna, a za nengaʼa, a ta ndadatsa na va a Ariel.

⁸ A gi ara ndo man mi a keɗaʼa, a ndi skwi te di nshunè, a hur a nʼnda ma, a prèk man a piɗèkwe na, njèkèm ntara skwa ɓai. Lèmèlèmè ara ndo man iyam a dza na, a si iyam te di nshunè, a piɗèkwe na, iyam a dza na, a gworama na ndav. A da gi arsa a sam ndohi herkeda ɗekeɗekaʼa man ta gi var a za Sion.

Maya Juda ambaha Zhiklè ɓai

⁹ Va-pu di ndèzlèʼa, va-rzl kinè, va-nde kinè a mandazlai, kin rka di ɓai! Skwi ngiɗè da zedama kinè maya, zom ka ɓai! Vo-do dzaw-dzawaʼa, a géɗ zom man a keɗ kinè ka ɓai!

¹⁰ Aman Ndo nzi pèc pè-cèk a mva kinè Mèzhèɓ a ndav, a mpa kinè nzhunè a di tsektskaʼa, a ndèma ta dai a ndohi nhadka ma a ndohi nwèr skwai.

¹¹ A gu a sam kinè ara nhodko ma man ta windeda a ɗèlèwèr a ta tkotseda pa. Aman ta va na ndo ngiɗè, man a sun njèngè ɗèlèwèr, a ta gaɗa na: Jongo skwi haha! A nengaʼa a gaɗa: I slaha ɓai, ntkotsa a pa.

¹² Aman ta va na ɗèlèwèr a ndo ngiɗè man a sun njèngè ɗèlèwèr ɓai, a gaɗa na: Jongo skwi haha! A nengaʼa a ngaɗa: I sun njèngè ɗèlèwèr ɓai.

¹³ Bi Zhiklè a gaɗa: A géɗ man ndohi haha ta herdekay va a ma, a ta slébèrdyè a tapidaf ma ambalai, aman ndav tengaʼa dra a sam ga, a ta gi zlau ga ara man ndohi ngiɗè ta njè ta genè,

¹⁴ ko pats ngiɗè i woya a i vi skwi nrkedi mbiaʼa a sam ndohi haha, nrkedai man ta rzl ta a pa, a i gedassa maya ndohi maya tengaʼa, a mwèsl ndohi mwoslaʼa a zi na te pa.

¹⁵ Wobau a sam ndohai man ta ngheda skwi man ta woy a ta giaʼa a skwi man ta gia te ruva, a sam Zhiklè, a ta gaɗa: Nrka nga wa, nsenaha nga wa?

¹⁶ Kinè ndohi tsakazlam! Ndo nrèm shiɗèf a rɓasl, ta lèmèlèmè ɗè? Skwi a gada na ndo nʼngau: Ka ngyè ka ɓai! Shiɗef a gaɗa na ndo nrèmèʼa: ka sun nrem skwi ɓai! – a gaɗa na ɗè?

¹⁷ Njèkè kèshkata genè ka ɓi ɗè, a Liban a ngwèdè va na a gi lak, a gi lak a ndi na a sam man wof nhaya a pa.

Di ndohi a da win na

¹⁸ A pats nasa ndaɓazlamhai ta da cinè ma te ɗèlèwèr, a ndohi mandazlihi ta shkè auda te ruva, te va vaɗ.

¹⁹ Mbela-wahai ta da wuffè zaʼa, a géɗ Ndo nzi pèc pècèk, a ndohi ntawassa holholaʼa ta slébèrdè Zhiklè Israel nkezlaʼa.

²⁰ Aman ndohi shèwa klèng, ndo ngwossaha ta klèng, ndohi ambaɓihiaʼa klèng,

²¹ ndohi man a sam kita ta fa ta mali a gèɗ, a ta ngi ɓalai a ndo nʼngatsa na maya a ntamagai, a ta tseda na ma a pa a ndo nzuraʼa ambalai, klèng.

²² Gar haha Ndo nzi pèc pècèk, Zhiklè ndohi Jacob, man a nsumko Abraham a deɓa, a gaɗa: Te deɓaʼa Jacob a da ngècè hori a di azɓai, a ngwodama na di kuftor-hoʼa azɓai.

²³ Aman ta da rka skwi man ri ga a ngau, ta da kezla nzlembaɗ ga; ta da suna, Zhiklè Jacob nkezlaʼa, a ta gi zlau Zhiklè Israel.

²⁴ Ndohi man ta zlak ta te nhér gèɗ ta, di tengaʼa a da win na, a tengaʼa man ta gu ndzoan ngodzo-ngodzoʼa ta cè skwi man ndohi ta slebda ta.