Esaie 20 - Ma Zhiklè

Ndohi Assyrie ta ngul Egypte a Ethiopie

¹ Te mvi man Tharthan a mshkè a kokwar Asdod, te man Sargon, bi Assyrie a nzlündo, a mshkè a kokwar a ndumaʼa.

² A pats nasa Ndo nzi pèc pècèk a mbezda na ma nengaʼa a ma Esaie, kra Amots, a ngaɗa: Do, proko maslaka sam kuɗa auda a va ngaya, suɗko koto-koroh auda te sak ngaya! A nengaʼa ngau, maslaka az a verzi ɓai, skwa a te sak ɓai.

³ Ndo nzi pèc pècèk a ngaɗa: Lèmèlè-mè ara man Esaie, ɓèl ga, a mdo adai, skwa a te sak ɓai, te deɓ mvi makar, ndohi Egypte a ndohi Ethiopie ta shinè skwi man a di a shkè.

⁴ Lèmèlèmè bi Assyrie a da dzam ta ndohi ɓèlè Egypte a ndohi ɓèlè Ethiopie, golahi a babgihai, adai, skwa a te sak ɓai, maslaka az a verzi ɓai.

⁵ A ta da gi zlau, a ta da gi horai a géɗ kokwar Ethiopie, man ta pi di a pa, a géɗ kokwar Egypte, man ta fi va a vna.

⁶ A ndohi a ma iyam haha ta da gèɗè a pats nasa: Na haha ndohi man nga pu di a tengaʼa, man nga hu a sam ta, aman a ta takaha nga a ta mbel nga te ri bi Assyrie: ta aran-ta ma ɗè? Nga da mbel nga a maya mè?