Esaie 14 - Ma Zhiklè

Israel mpra ma

¹ Jacob a da si Ndo nzi pèc pècèk te va, a da ɓicka ta ndohi Israel zaʼa, a va ta kokwar bab ta. Ndohi man verzi ta tsaɗ ta da humdè va a nda tengaʼa, a nda ndohi gi Jacob.

² A ta hel ta ndohi kokwar ngiɗè a rai a kokwar bab ta. A ndohi gi Israel ta da ge ta a ɓèl ta, ngur-hi a ngwozi te kokwar Ndo nzi pèc pècèk. Ta da dzaw ta tengaʼa man ta dzawka ta pats ngiɗè, a ta da kwar ta ndohi nʼnga ta matakwan.

Kita a géɗ bi Babylone

³ Aman Ndo nzi pèc pècèk a da va ka nshèk va te skwi ngaya mwuɗitpa, te matakwan ngaya, a géɗ mizlinè ɓèl ngaya man wuɗitpa man ta ga ka matakwan ɓèlè a vna.

⁴ Ka da fi dimèsh nʼngwèshè a bi Babel haha, a ka gaɗa: Ndo ngi wuɗai ani kala ma? Matakwan man a giaʼa, na tema?

⁵ Ndo nzi pèc pècèk a mpasla ta mènèwèɗ a ndohi ambaɓihiaʼa, a gada ndohi nʼnga nga matakwan.

⁶ Ndo man a ndah ta ndohi herkeda pèc pècèk a shè-wa, a mfa ta a gèɗ a mparaha ta ndohi herkeɗa, a njèka ɓai.

⁷ Anai herkeda a nzi a gumai, a shèk va, a sli dimèsh mwuffè.

⁸ Ko wof tsna a lakalak te Liban ta wuffè a géɗ ngaya. Daga nkèl ngaya a hai, ndo man a shkè a bazl nga asaɓai.

⁹ Sam mʼmetsai ba a nslambaɗa, a ta hakaɗi te pa, aman ta da gaɗaha ka. A nslambaɗda ta mèzhèɓhi tèlèba a géɗ ngaya, bihi herkeda tèlèba, a gi aman bihi ndohi herkeda tèlèba ta slambaɗa a sam nʼnzi bi ta.

¹⁰ Ta tèlèba ta hinè a ta gada ka: Ka ba, wuɗi ngaya ani asaɓai, ka ga lèmèlèmè ara nga.

¹¹ Nʼnjèl bi ngaya nkalnahai a sam mʼmetsai, a nda dimèsh ganzavar ngaya. Ka mènè a va nroroɓ, a meturɗihai ta shèwèlè a deɓ ngaya.

¹² Ka banti giɗfèk man ka su dai; ta kalde ka a herkeda, kè! Ka man ka ngul ndohi herkeda; ta tsede ka a hi a herkeda, kè!

¹³ Ka goɗ te ndav ngaya: i war i tivè a zhiklè, te pa i da til sam nʼnzi ga te géɗèʼa, a géɗ bantihi Zhiklè, a i nzi a géɗ sam nʼnzi ɓai a balak Zhiklè te géɗèʼa.

¹⁴ I woya a i tivè a géɗèʼa, a géɗ vanihai, a i gi lèmèlèmè ara Zhiklè te géɗèʼa.

¹⁵ Aman anai ta kalde ka a sam mʼmetsai, te godok te vèvèɗ mpèltemtemaʼa.

¹⁶ Ndohi man ta zli gèɗ a ka, ta pa ka di kurzlaʼa: Ndo haha, nengaʼa man a gu a herkeda a kokwar-bihi ta gudzi ɗè?

¹⁷ Man a nʼngwoda sam herkeda a hèshèkèɗ, a ngedassa kokwar mbiaʼa, man a pra ta ndohi dangai azɓi ɗè?

¹⁸ Bihi ndohi herkeda tèlèba, ko ta bazl ta ma, ndohi ta slubarde ta genè, staɗ staɗ tèlèba te gi dzavi nengaʼa.

¹⁹ Aman ka, ta kalde ka dra a dala ambalai, ara ntsatseri man ta ngeldaussa. Ndohi man ka bazl ta a tsakwal, a ka tez ta a gwèsh, ta tsama ka a deɓa ara zluèɗ nhuslaʼa.

²⁰ Ka da humdè va a nda tengaʼa te gi dzavi azɓai, a géɗ man ka gedassa kokwar ngaya, a ka bazl ta ndohi ngaya. Ta da bèhè verzi ndo man ambabi haha asaɓai a mèdèp.

²¹ Va-tülo sam nzli daʼai wudahi nengaʼa, a géɗ mali bab ta, a ta slèmbèɗè a ta gi ngul herkeda a ta ndhè kokwar a géɗ herkeda asaɓai.

²² A i woya a i slambaɗa ta a va, Ndo nzi pèc pècèk a gaɗa, i gedassa Babylone tèlèba: nzlembaɗ na, njèkèɗiaʼa, a kra a wud wud na, Zhiklè bi mbiaʼa a gaɗa.

²³ Gi nengaʼa i geda a gi matakwas, a draɓ, a i patsedaussa a sambak ngédèshè skwai, Zhiklè bi mbiaʼa a gaɗa.

Kit a herkeda tèlèba

²⁴ Zhiklè bi mbiaʼa a mʼmbaɗa: A vava, a gi ara man i huro, a skwi man i basla na gèɗ a vá, a zhè.

²⁵ I woya a i kalde ta ndohi Assyrie a hai te kokwar ga, a i mbatsaha ta a sak a géɗ za ga. Wof man ta kelawa ta a daʼai, i kelawko ta auda, a skwi man a deɓ tengaʼa i hela na auda.

²⁶ Nasa skwi man i huro a géɗ herkeda tèlèba. Nasa man i geda rai a géɗ ndohi herkeda tèlèba.

²⁷ Aman Zhiklè bi mbiaʼa a basla gèɗ arsa, nslaha a ngédèshè wa? A ngeda ri nengaʼa, nslaha a ngozlkoɗa deɓa wa?

Ndohi Philistie

²⁸ Te mvi man Achaz a mʼmets na, Zhiklè a goɗ aranta:

²⁹ Ndohi Philistie, kin wuffa ɓai, te man gada man ta tse kinè a vna, mpasla; aman hutor ndemhal man ta ngelaʼa, a nʼngwoda va na a kwak. Kra nengaʼa a gi skwi ngiɗè man ara kedam, man a hi a zhiklè.

³⁰ Ndohi ntawassaʼa ta da ngècè skwi nʼndi te za ga, a mbelaw ndohi ta da nzi a pa, skwa a ga ta azɓai. Aman ndohi te verzi ngaya, i bazl ta a mai, a njèkèɗi ndohi ngaya i bazl ta a tsakwal.

³¹ Ntamagai, gau wobau! Kokwar, tsu lalau! Ndohi Philistie tèlèba – va-gudzau! Ndohi var ta shkè te man a verzi gai ara vodzok, a ndohi tengaʼa ko staɗ a minè a deɓa azɓai.

³² Ta da mbeɗa na a ma a ndo sak tengaʼa a ma mè? Ndo nzi pèc pècèk a ngau Sion. A mbelaw ndohi te va ndohi na ta da hi a pa.