Esaie 11 - Ma Zhiklè

Kokwar-bi gumi Zhiklè

¹ Godozlom Isai a da tsi rai, a zluzlor nengaʼa a da tsi ntsatseri staɗ man a ndè yi skwai.

² Mèzhèɓ Ndo nzi pèc pècèk a da nzi a géɗ nengaʼa. Mèzhèɓ mava te ndav, a maya te gèɗ. Mèzhèɓ man a ngrédè maya, man a vi wuɗai, Mèzhèɓ nshindè skwai a zlau Ndo nzi pèc pècèk.

³ A gi a ndohi ta slébèrdè Ndo nzi pèc pècèk a zlau. A pi di a ndo a sam kita azɓai, a fi gèɗ a ma ndohai man ta hodko na a tsagai a mbèzlè kita azɓai.

⁴ A da gi kita ndohi ntawassaʼa zuraʼa. Aman ndohi mbelawa ta dè kita, a ga ta kita a di na a di na. Ma nengaʼa nara gada ntsi ndo shèwa. Nshèffè man a shkè auda te ma nengaʼa a bazl ta ndohi ambaɓihiaʼa.

⁵ Va nengaʼa ndzawaa ngi-zuraʼa, hwaɗ nengaʼa mʼmana a nlèɓèslè.

⁶ Nda nvalaval ta da nzi a sam staɗ a kra tambak. Kokoya tada nzi a sam staɗ a kra ɓok. Kra zlè ta da ndi mandai a sam staɗ a kra marizhèlè, kra nkèshèʼa a lè ta.

⁷ K ɗèh a nvalaval ta gi mandala, a wuda tengaʼa ta da mènè a sam nstaɗ. Marizhèlè a da ndi mandai ara zlè.

⁸ Kra man a wa a da tèr ri a vèvèɗ ndemhal, a kra nkèshèʼa a mbèhwalai a ntümsho.

⁹ A géɗ za ga nkezláʼa tèlèba ta da gi skwi ambaɓiaʼa a skwi mphomaʼa azɓai. Aman herkeda tèlèba a sun Ndo nzi pèc pècèk, nʼndha a vna ara iyam man a hi a sam tèlèba.

¹⁰ A pats nasa ndohi man ta sun Zhiklè ɓai ta da menkaɗa deɓa a sam zluzlor Isai. A zluzlor Isai a gi a skwi malwuɗai a sam ndohi tèlèba, sam nʼnzi bi nengaʼa nʼnzala.

Juda a Israel ta humda

¹¹ A pats nasa Bi Zhiklè a da slèmbèɗè zaʼa, a nda sumka ta ndohi nengaʼa a deɓa, njèkèɗi ndohai man ta venda gèɗ ta a kokwar Assyrie, a Egypte, a Pathros, a Ethiopie, a Elam, a Shinear, a Hamath, a herkeda nte ndev iyam mbiaʼa.

¹² A zlècedè skwi malwuɗai a sam ndohi tèlèba. A da ɓicka ta ndohi Israel man ta hu ta, a deɓa, a da lèka ta ndohi Juda man ta ksar ta a deɓa te tsagi herkeda faɗ.

¹³ Srak Ephraim klèng, ndohi nʼnga ta matakwan a Juda, a nzede ta. Ephraim a da gi srak a géɗ Juda asaɓai, a Juda a da ga na matakwan a Ephraim asaɓai.

¹⁴ Ta da kala ta va a za Philistie a ma iyam mbiaʼa, a ta humda va a ta da hil skwi ndohi kokwar man a verzi gai. Ta da cè kokwar Edom a Joab, a ndohi Ammon ta da gi ɓèl ta.

¹⁵ Ndo nzi pèc pècèk a gidè ri nengaʼa a géɗ woyam mbiaʼa te Egypte, a ngworaʼa, kozlar nengaʼa wobkwobkaʼa a kezla te va tsaraɗ, a ndohi ta bizhè a pa a kotokoroh te sak.

¹⁶ Njèkèɗi ndohi na, man ndohi Assyrie ta jèke ta, ta ngots civèɗ, lèmèlèmè ara ndohi Israel man ta shkè auda te kokwar Egypte.