Ephésiens 5 - Ma Zhiklè

Wudahi skwi nhel sam

¹ Anai va-lèmdè nshèffè kinè a Zhiklè, ara wudahi man a woy ta a ndav na.

² Va-woy ndo, lèmèlèmè ara Kristi man a woy kinè! A mvoko va na a ri na a géɗ nga, ara skwi man a va na Zhiklè, a skwi man a zla na Zhiklè, man ambaha Zhiklè.

³ Ngi baki a dala, skwi nlizhèa tüɗük-tüɗükwaʼa, ngi keda, a woy da goɗ ma haha a sam kinè ɓai. Nasa amba a sam ndohi Zhiklè nkezlaʼa.

⁴ A woy da goɗ ma horai, ma nrzlè, ma mphömè a sam kinè ɓai; aman dara va-shüd gèɗ!

⁵ Aman kin suna, ndo man a gi mphömè, ndo man ndav na nlizhèa, ndo keda, nara ndo mbèh skwai, ta ndi kokwar-Bi Kristi a Zhiklè azɓai.

⁶ Ndo da pe kinè a wi a ma ambali ɓai. Aman a géɗ skwi haha ndzoan Zhiklè a shkè a géɗ ndohai man ta fi gèɗ a ma Zhiklè azɓai.

⁷ Gar haha kin mba ma a nda tengaʼa ɓai!

⁸ Aman zlèzlèa kinè ruva, aman antanta kinè skwi nhél sam te Bi Zhiklè.

⁹ Vo-do ara wudahi skwi nhél sam. Skwi man a shkè auda te skwi nhél sam: skwi man amba, ngi-zuraʼa, ma nzuraʼa.

¹⁰ Va-wor skwi man ambaha Bi Zhiklè!

¹¹ Kin humda ɓai a mizlinè ruva, man skwi mbelaʼa a shkè auda te pa azɓai; mʼmbela kin ngreda skwi nengaʼa ambaɓiaʼa auda.

¹² Aman skwi man ta gi a metsar, horai man a ta gèɗèʼa.

¹³ Aman skwi haha tèlèba a da ngrédè auda, a da gedè va auda a sam skwi nhél sam. Aman skwi tèlèba man a gedè va auda, nengaʼa skwi nhél sam.

¹⁴ Gar haha Zhiklè a gaɗa: Piɗèkwe ngaya, man ka nzhuna. Slambaɗa te ndev ndohi mʼmetsaʼa, a Kristi a di a hela ka sam te ndav ngaya.

¹⁵ Gar haha, va-gu maya a géɗ nshèffè kinè, ara ndohi nrzla ka ɓai, aman ara ndohi maya.

¹⁶ Va-hera na gèɗ a va mizlinè! Sam ambaɓai.

¹⁷ Gar haha kin rzla va ɓai, aman va-sun skwi man Bi Zhiklè a woyaʼa.

¹⁸ Kin dzodzor zom ɓai, aman ndav ndzakaɓa a shkè te pa. Aman va-ndha a Mèzhèɓ.

¹⁹ Va-goɗ ma te ndev kinè a dimèsh Psaumes a dimèsh nslébèrdè Zhiklè; va-wuffa te ndav kinè ngummaʼa ara ganzavar a sam Bi Zhiklè.

²⁰ Va-shüd gèɗ pèc pècèk a géɗ skwi tèlèba, a sam Bab Zhiklè, a nzlembaɗ Bi nga Yèsu Kristi.

Bakihai a ngwozihai

²¹ Va-manda gèɗ a hai, ngiɗè a sam ngiɗè, te zlau Kristi.

²² Ngwozai, va-manda gèɗ a hai a sam bakihi kinè, ara a sam Bi Zhiklè.

²³ Aman bakai, gèɗ ngwoz. Lèmèlèmè ara Kristi gèɗ mpi ndohi Zhiklè, ndo mʼmbélèʼa, va na.

²⁴ Aman anai ara mpi ndohi Zhiklè man a manda gèɗ a hai a sam Kristi, lèmèlèmè ngwozi ha, sèi ta manda gèɗ ta a hai a sam bakihi ta, te skwi tèlèba.

²⁵ Kinè ngurhai, va-woy ngwozi kinè a ndav kinè, lèmèlèmè ara Kristi a woy mpi ndohi Zhiklè a ndav na, a vau nshèffè na a géɗ nengaʼa,

²⁶ a nkezlaʼa, a mpanaʼa, a iyam a ma Zhiklè,

²⁷ aman a Zlatseda a sam na, a ri na, ara mpi ndohi Zhiklè nʼngaʼa jèlèlèʼa, derɗa az a pa ɓai, va mʼmin ɓai, mohtsomba ka ɓai; aman nkezlaʼa, mali az a pa ɓai.

²⁸ Gar haha bakihi ha, sèi ta woy ngwozi ta a ndav ta, ara va ta. Ndo man a woy ngwoz na a ndav na, a woy va na.

²⁹ Aman ndo azɓai, daga zlèzlèʼa ba, man a gi shèwa va na. Aman a va na skwi nʼndai, a wara na dai; lèmèlèmè Kristi ba a sam mpi ndohi Zhiklè.

³⁰ Aman nga nfèfènva na.

³¹ Gar haha ndo a di a jèkeda bab na, a mam na, a ta nzi a ngwoz na, ta cèw ta gi va ta staɗ.

³² Skwi man nʼnghedaʼa haha mbiaʼa. I gèɗè te Kristi, a mpi ndohi Zhiklè.

³³ Gar haha kinè ba, staɗ staɗ da woy ngwoz na a ndav na, ara va na; aman ngwoz da slubordo baki na!