Ecclésiaste 1 - Ma Zhiklè

¹ Ma ndo ncèmma, kra David, bi Jérusalem.

² Skwi tèlèba skwi ambalai; skwi ambali tèlèba, ndo ncèmma a gaɗa. Tèlèba, skwi ambalai!

³ Ndo a ngècè mè a géɗ mizlinè tèlèba man a giaʼa a vazaza a va a géɗ herkeda?

⁴ Tengahi ngiɗè ta bèzl ta, tengahi ngiɗè ta greka na hwaɗ; aman herkeda a nzi dai.

⁵ Pats a vèngè, pats a kèl na, a ngwodko va a sam mvèngè na.

⁶ Kozlar a hi a civèɗ mazlam, a hi a civèɗ iyam, kozlar a gai, a ngwèdè va a pa.

⁷ Woyamhi tèlèba ta hi a va woyam mbiaʼa, aman woyam mbiaʼa a ndhè azɓai. A iyam a ngwodko va na a deɓa a sam man a hüno a pa.

⁸ Nʼngi skwi tèlèba a ngéz lè azɓai, ndo a shinè azɓai. Dai a pi di a pi dai, a rka tèlè ɓai. Zlembaɗ a fi zlembaɗ a fi zlembaɗ, a tsena tèlè ɓai.

⁹ Skwi man a zhè halakai a di a zhè zaʼa. Skwi man ta gu halakai ta da gia zaʼa. Skwi mɓuaʼa azɓai a géɗ herkeda.

¹⁰ Skwi ngiɗè a zhi dè, aman nga slaha nga gaɗa: na haha skwi mɓuaʼa? Aʼai, zlèzlèa ba a zhè ma.

¹¹ Ndohi halakai, ndo ngiɗè a hér ta azɓai. Ndohi man ta da yi a ma ba, a wud wuda ta ba, ta da hér ta te deɓaʼa asaɓai.

¹² Iyè ndo ncèmma, i gu bai a géɗ Israel, te Jérusalem.

¹³ I huro a maya, i woya a i shindè a i wèrè skwi tèlèba a géɗ herkeda. Mizlinè aranta man Zhiklè a mva ta a ri a ndohai a ta ngézhè a vna, mizlinèʼa wuɗitpa.

¹⁴ I rka mizlinè tèlèba man ta gu a géɗ herkeda. Na haha tèlèba skwi ambalai, nara nhi a gerzi kozlar.

¹⁵ Skwi man ndzaraʼa a zlècèdè saraʼa azɓai. Skwi man azɓai ndo a slaha a ngècè azɓai.

¹⁶ I huro: I ngots maya kumba, a fena bihi tèlèba man ta gu bi te Jérusalem, ga iyè. I sundo skwi kumba, maya ga a zhè a vata.

¹⁷ Ndav ga a woya a shin verzi maya, a woya a sun verzi nrzlè a verzi madaɗau. Aman i suna: Ko nengaʼa ba nara nhi a gerzi kozlar.

¹⁸ A sam man maya a zhè a pa kumba, nlèyè ba a zhè a pa a vata. Ndo man a ngècè maya a vaʼa, a si matakwan a vaʼa.