Deutéronome 8 - Ma Zhiklè

Kokwar mbelaʼa man Zhiklè a mpasla ta rai

¹ Ma nkwèrè tèlèba man i njèka a gèɗ a patsna, gu maya, dzodzora, aman ka da nzi a nshèffè, a ka mènè a ma ma, a ka da ndikè a kokwar man Ndo nzi pèc pècèk a mpasla ta ri a babhi ngaya a mʼmbèɗè.

² Sèi ka hér civèɗ tèlèba man Ndo nzi pèc pècèk, Zhiklè ngaya, a de ka tʼhèshèkèɗ, mvi 40, aman a manda ka gèɗ a hai, aman a jkede ka, aman a shin skwi man ka hérè te ndav ngaya, gar ka jèjèr ma nkwèr nengaʼa, gar ka jèrèrèʼa azɓai.

³ A manda ka gèɗ a hai, a faha ka mai, te deɓaʼa a mva ka manne, skwi nʼndai man ka sun zlèzlèa ɓai, man babhi ngaya ta sun ɓai. A woya a ngra ka, ndo a nzi a nshèffè a gèɗ movar stadgenè ka ɓai, aman a gèɗ skwi tèlèba man a shkè auda te ma Ndo nzi pèc pècèk.

⁴ Maslaka man a va ngaya nhal ɓai, sak ngaya a nʼnde ɓai, tʼhwaɗ mvi 40 haha tèlèba.

⁵ Gar haha hur te ndav ngaya, lèmèlèmè ara bab kra a ngezh kra na, Ndo nzi pèc pècèk, Zhiklè ngaya, a gez ka,

⁶ aman ka da jèjèr ma nkwèr Ndo nzi pèc pècèk, Zhiklè ngaya, a ka dè a civèɗ nengaʼa, a ka gi zlau nengaʼa.

⁷ Anai, Ndo nzi pèc pècèk, Zhiklè ngaya, a de ka a kokwar mbelaʼa, kokwar man iyam a hi te pa, a nlèlè iyam a hakaɗauda te slrats, te za;

⁸ kokwar man dau a marori a gi te pa, kumba, a nyi wofhi tsaɗ tsaɗ, a wof kslor a wof tsna, a mbar a vongwom;

⁹ kokwa man skwi nʼndi a ndiv te pa ɓai dav-davaʼa, man ka tèkwèn skwi te pa azɓai; kokwar man ka pècè vizhèu te pa, a ka ngècè verzhègenè.

¹⁰ Aman hwaɗ ngaya a nda ngeza ma, sèi ka shid gèɗ a Ndo nzi pèc pècèk, Zhiklè ngaya, te kokwar mbelaʼa man a mva ka.

Nshid gèɗ a Zhiklè

¹¹ Gu maya, Ndo nzi pèc pècèk, Zhikè ngaya, da pca ka a gèɗ te deɓaʼa ɓai, a ka dzodzor ma nkwèrè, ma kita a ma nde kinè man i njè kinè a patsna!

¹² Aman hwaɗ ngaya a ngeza ma, a ka rèm gi mbelaʼa, a ka nzi a pa,

¹³ aman skwi kuɗom ngaya mbiaʼa a nkèshèa ta mènè te pa a vata, aman Suli a guro ngaya ntsama a vata, a skwi ngaya tèlèba nʼnga a vata,

¹⁴ ka da dzugor va ɓai! Ndo nzi pèc pècèk, Zhiklè ngaya, man a helka ka auda te gi bèlè, te Egypte, da pca ka a gèɗ ɓai!

¹⁵ Nengaʼa man a de ka tʼhèshèkèɗ mbiaʼa mwuɗitpa, te ndev zhüzhok man dèrè te ma, a varadza; man iyam az a pa ɓai, a hodko iyam auda te va za nshfaʼa;

¹⁶ nengaʼa man a mva ka manne tʼhèshèkeɗ a ka ndiaʼa, man babhi ngaya ta sun zlèzlèa ɓai; Zhiklè man a manda ka gèɗ a hai, a jkede ka, aman te deɓaʼa a ga ka skwi man amba,

¹⁷ a woya ɓai aman ka hérè te ndav ngaya: Wuɗi ga, wuɗi ri ga a mvay skwi mèshèlè haha tèlèba.

¹⁸ Aman sèi ka hér Ndo nzi pèc pècèk, Zhiklè ngaya; aman nengaʼa a mva ka wuɗai aman ka ngots skwi mèshèlè, aman a gi ara nderzlè-ma nengaʼa man a mpasla ta ri a hi a babhi ngaya, ara man ka ngotso a sam ngaya a patsna.

¹⁹ Aman Ndo nzi pèc pècèk, Zhiklè ngaya, a da pca ka a gèɗ, a ka jèjèr zhiklè-hi ngiɗè tsaɗ, a vava i gaɗa ka a patsna: ka da zi ngaya.

²⁰ Ka da zi ngaya lèmèlèmè ara ndohi herkeda man Ndo nzi pèc pècèk a mbazl ta a ma ngaya, a gèɗ man ka tsena ma Ndo nzi pèc pècèk, Zhiklè ngaya, ɓai.