Deutéronome 7 - Ma Zhiklè

Ndohi Israel, a ndohi ngiɗè man a tsagi ta

¹ Aman Ndo nzi pèc pècèk, Zhiklè ngaya, a de ka a kokwar man ka da dè a pa, a ka da kwèrèʼa, a ndzam ta ndohi herkeda kumba auda a ma ngaya: Ndohi Heth, Guirgasi, Amor, Canaan, Phérez, Hévi, Jébus, ndohi herkeda tsaraɗ, mbibihiaʼa, wuɗi ta zhè a fena man a kinè,

² aman Ndo nzi pèc pècèk, Zhiklè ngaya, a mpe ta a ri a ka a ka, ka ngul ta, sèi ka phomde ta. Ka derzla ma a nda tengaʼa ɓai, da se ka te va ɓai!

³ Ka gu mèsh a nda tengaʼa ɓai, ko dem ngaya ka va ta a ngwoz a wudahi tengaʼa ɓai, ko dalahi tengaʼa ka co a ngwoz a kra ngaya ɓai!

⁴ Ta da pe ta wudahi ngaya a wai a ta jèkeda Ndo nzi pèc pècèk, a ta jèjèr zhiklèhi ngidè. Te deɓaʼa ndav a da dza na Ndo nzi pèc pècèk worworaʼa a gèɗ kinè, a da zede kinè tsam tsam.

⁵ Sèi kin gia arsa a nda tengaʼa: Kin da mbeɗda sam mʼmbèh skwi tengaʼa aussa; kwa nzlatseda kin kaldahai; vrai va-bazldaussa, va-fa na vogwa a skwi mbèh skwi tengaʼa!

⁶ Aman kinè ndohi nkezlaʼa a sam Ndo nzi pèc pècèk, Zhiklè ngaya. Kinè man Ndo nzi pèc pècèk a mpar kinè auda a kin gi a ndohi na te va ndohi herkeda ngidè tèlèba.

⁷ A géɗ man kinè a vata ka ɓai man Ndo nzi pèc pècèk a woy kinè; kinè ndohi nkèshèa te ndev ndohi ngidè tèlèba, kin fena ndohi ngidè azɓai;

⁸ aman a géɗ man Ndo nzi pèc pècèk a woy kinè, a ngu ara man a mbaɗa ta babhi kinè; a nhelka kinè auda a ri man wuɗi na zhè, a mpreka kinè auda te gi ɓèlè, te gi Pharaon, bi Egypte.

⁹ Gar haha sèi kin suna, Ndo nzi pèc pècèk, Zhiklè kinè, nlèɓèslèa, man a jèjèr nderzlè-ma nengaʼa. A tengaʼa man ta woyaʼa, a ta jèjèr ma nkwèr nengaʼa, a va ta pombai, ha a ndikè a verzi wud wud ta a gi 1.000.

¹⁰ Aman ndohi man ta gi shèwa a sam na, a ngwoda ta shèwa tengaʼa a gèɗ, a zede ta. A ndèwèi va a pa azɓai, a ngwoda na shèwa a gèɗ a ndo shèwa.

¹¹ Gar haha va-dzodzor ma kita, ma nkwèrè a ma ndè kinè man i va kinè a patsna, a kin gi arsa.

¹² Aman kin da tsena ma kita haha, a kin da jèjèrèʼa, a kin gu arsa, Ndo nzi pèc pècèk, Zhiklè kinè a da jèjèr nderzlè-ma na, a va kinè pombai man a mbaɗa ta a babhi kine.

¹³ A da woy kinè, a pshè kinè ma, a kin mènè a ma ma. Kin da yi wudahi kumba; ny i skwi te kokwar kinè, nyi wof, dau a barassa a mbar a da gi kumba; wud zlè a wud tambak ta mènè kumba, te kokwar man a da va kinè, man a mbaɗa ta babhi kinè.

¹⁴ Kin ngots mpshè ma man a fena ndohi herkeda ngidè tèlèba. Deli a gi a va kinè azɓai, ko staɗ, ko ngu-raʼa, ko ngwoz, ko skwi kuɗom.

¹⁵ Ndo nzi pèc pècèk a da cè matakwan tèlèba auda a sam kine. Matakwan man wuɗitpa, man kin rkaʼa a sam ndohi Egypte, a da ngats kinè azɓai, aman a da ngats ta ndohi tèlèba man ta gi shèwa a kinè.

¹⁶ Kin da gedassa ndohi herkeda tèlèba man Ndo nzi pèc pècèk, Zhiklè kinè, a pa kinè a rai; da se kinè te va ɓai, kin da gu mizlinè a zhiklèhi tengaʼa ɓai, man ɓai ta da slafadama kinè sak.

¹⁷ Aman kin da hur te ndav kinè: Ndohi haha mba tengaʼa a iyè, i da dzam ta, kè?

¹⁸ Kin gu zlau tengaʼa ɓai! Vo-huro skwi man Ndo nzi pèc pècèk, Zhiklè kinè, a gu a sam Pharaon a Egypte tèlèba;

¹⁹ skwi mbiaʼa man a nga ta matakwan a vna, skwi man a ngreda auda, a nrkedai, a ri man wuɗi na zhè, man a ngeda, man Ndo nzi pèc pècèk, Zhiklè kinè, a ncka kine auda a vna. Ndo nzi pèc pècèk, Zhiklè kinè, a da gi lèmèlèmè arsa a sam ndohi herkeda tèlèba man kin gi zlau ta.

²⁰ Ndo nzi pèc pècèk, Zhiklè kinè, a da pra ta mangavar zlè a va, ha ta zeda njèkèɗi ndohi man ta nghede va ta a sam kinè.

²¹ Kin gudzu a sam tengaʼa ɓai, te man Ndo nzi pèc pècèk, Zhiklè kinè, a zhè te ndev kinè, Zhiklè mbiaʼa, mwuɗitpa!

²² A Ndo nzi pèc pècèk, Zhiklè kinè, a da dzam ta bihi kokwar a ndohi ta auda a ma kine staɗ staɗ tèlèba. Kin da ndev ta ma tsam tsam ɓai, man ɓai skwi hèshèkèɗ a dè mènè va na a pa, a da gi wuɗitpa a sam kinè.

²³ Aman Ndo nzi pèc pècèk, Zhiklè kinè, a da pa kinè a ri a kinè, a pra ta zlau a va, ha ta gedas ta.

²⁴ A da pa kinè bihi a ri a kinè, a kin zeda ta nzlembaɗ ta a gèɗ herkeda. Ndo azɓai man a da Sala kin va a gèɗ, ha ka gedas ta.

²⁵ Sèi kin fa na vogwa a skwi mbèh skwi tengaʼa, kin gu ntétékè guro a verzhègenè tengaʼa ɓai, kin co ɓai, man ɓai a da slafadama kinè sak; te man skwi horai a sam Ndo nzi pèc pècèk, Zhiklè kinè.

²⁶ Kin da skwi man a ndara na Zhiklè a gi kinè ɓai, man ɓai kin phomda lèmèlèmè ara skwi sa. Da ndara kine, da ga a skwi hori a sam kinè, te man Zhiklè a mphomda.