Deutéronome 6 - Ma Zhiklè

¹ Na haha ma nkwèr kinè, a ma man a de kinè, a ma kita, man Ndo nzi pèc pècèk a gaɗayè aman i senda kinè, aman kin jèjèrèʼa, te kokwar man kin da dè a pa, a kin da kwèrèʼa;

² a kin gi zlau Ndo nzi pèc pècèk, Zhiklè kinè, te nshèffè kinè tèlèba, a kin jèjèr ma nkwèr nengaʼa, a ma kita nengaʼa tèlèba, man i njè kinè a wudahi kinè, a wud wudahi ngaya, a kin nzi a nshèffè a vata.

³ Israel, tsenaʼa, dzodzora a nlèɓèslè, a ka da nzi amba, a ka mènè a vata, te kokwar man wa a vongwom a hi te pa, ara man Ndo nzi pèc pècèk, Zhiklè babhi ngaya, a mpasla ka ri a hai.

⁴ Israel, tsenaʼa! Ndo nzi pèc pècèk, Zhiklè nga, Ndo nzi pèc pècèk staɗgenè.

⁵ Sei ka woy Ndo nzi pèc pècèk, Zhiklè ngaya, a ndav ngaya tèlèba, a nshèffè ngaya tèlèba, a wuɗi ngaya tèlèba!

⁶ Ma man i njè ka a gèɗ a patsna, windeda ndav ngaya,

⁷ a ka fa ta a gèɗ a wudahi ngaya; ka gaɗa ta man ka nza te gai, man ka dè a civèɗ, man ka manatʼhai, man ka slèmbèdè.

⁸ Ka da windeda a deɓ ri ngaya, a ka geda a lamba medi ngaya;

⁹ ka da windeda a ri ntamagi ngaya, a ntamagi kokwar ngaya.

¹⁰ Aman Ndo nzi pèc pècèk a de ka a kokwar man a mbaɗa ta a Abraham, Isaac a Jacob, babhi ngaya, aman a da va ka: kokwar mbiaʼa, mbelaʼa, man ka, ka nrom ka ɓai.

¹¹ Gi nʼndha a skwi te pa tsaɗ tsaɗ man ka, ka mpeda a pa ka ɓai. Thal nraʼa, man ka, ka nrau ka ɓai. Gi wof tsna, sam nhéyè wof tsna, man ka, ka ngu ka ɓai. Aman ka da ndiaʼa, a ka ngézhè hwaɗ a vna,

¹² gu maya. Ndo nzi pèc pècèk man a ncka ka auda te kokwar Egypte, te gi ɓèlè, da pca ka a gèɗ ɓai!

¹³ Sèi ka da gi zlau Ndo nzi pèc pècèk, Zhiklè ngaya, a ka gi mizlinè nengaʼa, a ka mbèɗè a nzlembaɗ na.

¹⁴ Ka dzodzor zhiklèhi ngidè ɓai, zhiklehi ndohi man ta zhe a tsagi kine;

¹⁵ te man Ndo nzi pèc pècèk, Zhiklè ngaya, te ndev ngaya, Zhiklè srak. Man ɓai ndav Ndo nzi pèc pècèk a da vècè ara vogwa, a da zedka kinè auda a gèɗ herkeda.

¹⁶ Kin jkeda Ndo nzi pèc pècèk, Zhiklè kinè, ɓai, ara man kin gau te Massa.

¹⁷ Va-dzodzor ma nkwèr Ndo nzi pèc pècèk, Zhiklè kinè, ma nkwèr a ma nengaʼa man a de kinè a vna,

¹⁸ a kin gi skwi man ambaha Ndo nzi pèc pècèk, a kin da nzi amba, a kin da ndikè a kokwar mbelaʼa man Ndo nzi pèc pècèk a mbaɗa ta babhi kinè a kin da kwèrèʼa,

¹⁹ a kin da dzam ta mayamhi kinè tèlèba a ma kinè, ara man Ndo nzi pèc pècèk a pasla kinè ri a hai.

²⁰ Aman pats ngidè kra ngaya a dzhaɗ ka: Ma nkwèrè, ma ndè kinè, ma kita man Ndo nzi pèc pècèk, Zhiklè nga, a mva kinè, a géɗ mè?

²¹ Ka da gaɗa na kra ngaya: Zlèzlèa, nga bèlèlihi Pharaon te kokwar Egypte. A Ndo nzi pèc pècèk a nhelka nga auda te Egypte a ri na man wuɗi na zhè.

²² Ndo nzi pèc pècèk a ngau skwi mbiaʼa mwuɗitpa, a ngu nrkedi a sam ndohi Egypte, a sam Pharaon, a sam ndohi gi nengaʼa tèlèba, a di nga.

²³ A nhelka nga auda te pa, a nhelka nga a haha, a kokwar man a mpasla ta ri a hi a mʼmbèdè a babhi nga.

²⁴ A Ndo nzi pèc pècèk a ngaɗa nga, aman nga dzodzor ma nkwèr haha tèlèba, aman nga gi zlau Ndo nzi pèc pècèk, Zhiklè nga, a nga nzi amba amba pèc pècèk, ara man kin ngotso a patsna.

²⁵ Aman nga jèjèr ma kita haha tèlèba, a nlèɓèslè, a sam di Ndo nzi pèc pècèk, Zhiklè nga, ara man a njè nga, nga gaʼa a ndohi nzuraʼa.