Deutéronome 34 - Ma Zhiklè

Mʼmetsi Moise

¹ Moise a njèkeda dal Moab, a nteva za Nebo, a géɗ Pisga, zuraʼa a Jéricho. A Ndo nzi pèc pècèk a nʼngra na kokwar tèlèba: Galaad ha ndè Dan,

² Nephthali tèlèba, a kokwar Ephraim a Manassé, kokwar Juda tèlèba, ha ndè a ma iyam mbiaʼa te civèɗ nkèl pats.

³ Negeb a dal nengaʼa, slrats Jéricho, kokwar Gangar, ha ndè Tsoar.

⁴ Te deɓaʼa Ndo nzi pèc pècèk a ngaɗa na: Na haha kokwar man i pasla ta ri a hi a pa a Abraham, Isaac a Jacob a mʼmbèdè, a i gaɗa: I da va ta ndohi te verzi ngaya. I ngreda ka, a ka rka a di ngaya; aman ka ndikè a pa azɓai.

⁵ A Moise, ndo mizlinè Ndo nzi pèc pècèk, a mʼmets na a pa, te kokwar Moab, ara man Ndo nzi pèc pècèk a goɗa,

⁶ a Ndo nzi pèc pècèk a nrda a vèvèɗ te nkulgodok te kokwar Moab, zuraʼa a Beth-Peor. Aman ndo a sun gi dzavi nengaʼa ɓai, ha patsna.

⁷ Mvi Moise 120, aman a mʼmets na. Di nengaʼa az zawzawa di ɓai, va nengaʼa nara gola dai.

⁸ Ndohi Israel ta kuɗau Moise mʼmen 30. Te deɓaʼa nlèyè Moise klèng.

⁹ A Josué, kra Nun, nʼndha a Mèzhèɓ Zhiklè a maya, a géɗ man Moise a mfa na ri a gèɗ. A ndohi Israel ta tsena ma nengaʼa, a ta gu ara man Ndo nzi pèc pècèk a njè na ma a gèɗ a Moise.

¹⁰ Te deɓaʼa ndo nhadka ma te Israel ara Moise asaɓai, nengaʼa man a sun Ndo nzi pèc pècèk, ta peda di a ma ma.

¹¹ Ngidè ngar nengaʼa azɓai, te skwi man a ngreda auda a nrkedi tèlèba man Ndo nzi pèc pècèk a nzlündo a vna, man a gu te kokwar Egypte, a sam Pharaon, a sam ndohi mizlinè nengaʼa tèlèba, te kokwar nengaʼa tèlèba;

¹² te skwi tèlèba man a ngau mbiaʼa wuɗitpa, man Moise a ngau a ri man wuɗi na zhè a sam di Israel tèlèba.