Deutéronome 32 - Ma Zhiklè

¹ Kinè giɗfèkihai, va-fu zlembaɗ, i woy a i gèɗè. Herkeda, tsena ma ga!

² Njè ma ga da pshèhi ara iyam, ma ga da pu a sam ara minmèn, ara iyam man a ɓaya sam, ara iyam man a gakaɗa gèɗ herkeda!

³ I woy a i njè nʼnjèl Ndo nzi pèc pècèk, vo-slubordo Zhiklè nga!

⁴ Nengaʼa za, skwi man a giaʼa, nʼngaʼa jèlèlèʼa. Civèd nengaʼa tèlèba, civèɗ nzuraʼa. Zhiklè nlèɓèslèʼa, ncèkèlma a te nengaʼa ɓai; nengaʼa zuraʼa ndzarɓiaʼa.

⁵ Ndohi nengaʼa ta kwolaʼa, verzi ndohi ambaɓihiaʼa, ndohi nʼngwèdè ndo.

⁶ Kinè ndohi nrzlaʼa man maya kinè azɓai: Kin sheda na gèɗ a Ndo nzi pèc pècèk arsa dè? Nengaʼa man a nge kinè, nengaʼa man a fe kinè a pa, a til kinè, nengaʼa bab kinè ka bi dè?

⁷ Va-hur pats halakai, va-pu di a mvi bababhi kinè, vo-dzhoɗo bab kinè, da ngra kinè; ndohi kinè nhalaʼa da gaɗa kinè!

⁸ Aman Zhiklè te géɗèʼa a kezla ta skwi a ndohi herkeda, a ngel ta ndohi Adam, a pa ta kuma a ndohi herkeda, a ɗèlè ta ndohi Israel ara mʼmèn ta,

⁹ te man ndohi nengaʼa ta ga a skwi Ndo nzi pèc pècèk; Jacob skwi nʼndi gi na.

¹⁰ A nʼngotsko a sam ambaɓiaʼa, tʼhèshèkèɗ, te va skwi dak man a kuɗi te pa, a ɓirèʼa, a wèrèʼa, a birèʼa ara tser dai.

¹¹ A wuzhè kelpasl na ara vezai man a zhèwèlè a gèɗ gi na, a woya a slèmbèdè wud na, a pe ta a deɓ kelpasl na.

¹² Ndo nzi pèc pècèk staɗgenè a daʼa, zhiklè ngidè az a tsagi nengaʼa ɓai.

¹³ A ndaʼa a ntskal, a ta ndau skwi gi dau ta, a ta ndi vongwom te za, a mbar a hakaɗauda te slrats te za.

¹⁴ Mbar wa zlè a wa ɓok, mbeza wud tambakihai, drok, kra Basan a mazawalhai, a kuɗpa dau, a ka su barassa.

¹⁵ A Jacob a nʼndau skwai, a nʼngeza hwaɗ a vna, a ngraʼa. Yeshurun a gra ndaɓalaʼa, a gra pertataʼa, a njèkeda Bi Zhiklè man a gau, a nkwola za, skwi mʼmbél na.

¹⁶ Ta poko na gèɗ ndav auda a srak a nda mblom; ta poko na gèɗ ndav auda a nda skwi mʼmbèh skwai.

¹⁷ Tazla na skwi a mblom, man Zhiklè ka ɓai, a zhiklèhi man ta sen ta ɓai, man ta ngots mɓuaʼa, tok-tok, man babhi ngaya ta sun ɓai.

¹⁸ Ka hur za a ka gaɗa nengaʼa a ngyè ɓai; a Zhiklè nyaka ka mpca ka a gèɗ.

¹⁹ Ndo nzi pèc pècèk a nrkaʼa, a nkwol ta, a ngu ndav a géɗ wudahi na a dalahi na.

²⁰ A ngaɗa: I woy a i nghede va ga a sam di ta, a i rka ndikè-ma tengaʼa dai, te man ta ndohi mèdègèɗ, ta lèɓèsl ɓai.

²¹ A ta pokoy gèɗ ndav auda a srak a skwi man Zhiklè ka ɓai. Ta pokoy gèɗ ndav auda a skwi mʼmbèh skwi tengaʼa man ambalai. Iyè i da poko ta gèɗ ndav auda a srak a ndohi ambaɓihiaʼa. I poko ta gèɗ ndav auda a ndohi nrzlaʼa.

²² Ndav ga a vècè ara vogwa, a ndi skwi tʼherkeda tʼhai, a ndè a sam mʼmetsai, a ndi herkeda a ma a skwi man a ftskaɗa pa tèlèba, a fi vogwa a verzi za.

²³ I woy a i kalde ta a matakwan, matakwan, matakwan; i ɓar ta a sulom ga tèlèba.

²⁴ Aman ta tidè a mai, a paha ta vogwa a ta hézhèk ta; a gidiɓèr a nʼnga ta; i pa ta a ma a skwi dak, a zhüzhok man dèrè te ma.

²⁵ Tsakwal a bazl ta tʼuda, zlau a dza ta te gai. Aranta i ga ta a golahai a dalahai, a kra man a wa, a babgai.

²⁶ Ar i gaɗa: i woy a i ksar ta, a i zede ta, a ndohi ta da hér ta asaɓai;

²⁷ aman i woya ɓai, man ɓai ndohi mayamhi ta tsi wagèsh a ta hur a ta gaɗa: nga gu a wuɗi nga, Ndo nzi pèc pècèk a ngu ka ɓai.

²⁸ Ta ndohi man ta sun skwa ɓai, man maya ta azɓai.

²⁹ Aman agassa maya ta zhè, ar ta tsena skwi haha, a ta sun skwi man ta ngècè te deɓaʼa.

³⁰ Ndo staɗ a dzam ta ndohi 1.000 azɓai; ndohi cèw ta dzam ta ndohi 10.000 azɓai, sèi man Ndo nzi pèc pècèk a mpe ta a ria kla!

³¹ Aman za tengaʼa az lèmèlèmè ara za nga ɓai; mayamhi nga ta sun nɗèlè arsa.

³² Aman wof tengaʼa, verzi wof man a ftskaɗa te Sodome, verzi tengaʼa te Gomorrhe. Nyi tengaʼa duzlekzlekaʼa a dèrè te pa.

³³ Barassa tengaʼa nara dèrè zhüzhok, dèrè ntümsho.

³⁴ Skwi haha nʼngheda a sam ga, nʼndè te gi mèshèlè ga ka bi dè?

³⁵ Ha pats kita, pats mpil gèɗ, a pats man ta da kèlèhai. Aman pats ngédèshè tengaʼa ndul ndul, ndikè-ma tengaʼa a herdeka va.

³⁶ Aman Ndo nzi pèc pècèk a da Preka ta ndohi nengaʼa auda te kita, a ɓèlèlihi nengaʼa ta sia te va; te man a rkaʼa, wuɗi tèlèba klèng, ko bèlè azɓai, ko kra ngwi azɓai.

³⁷ Te deɓaʼa a da gaɗa: zhiklèhi tengaʼa ta tema, za man ta nghede va a pa na tema?

³⁸ Tengaʼa man ta ndau mbeza skwi man kin zla ta, man ta sau barassa skwi man kin va ta? A woy ta slèmbèɗè a ta takaha kinè a ta ɓer kinè.

³⁹ Va-suna, iyè nengaʼa man i zhè, Zhiklè ngiɗè az a tsagi ga ɓai. Iyè man i kéd ndo, iyè man i vi nshèffè a ndo; i tsau, a i tilèʼa; ndo man a mbèlè auda te ri ga azɓai.

⁴⁰ Aman i geda ri a zhiklè, a i gaɗa: Ara man i zhè a nshèffè a mèdèp.

⁴¹ Tsakwal ga ntasla, mpeza, a si dai, a i hinè ngi kita, i woya aman ndohi nʼngay matakwan a ndohi shèwa ta pil gèɗ.

⁴² Tsakwal ga da tuz ndo; Pombaz ndohi mbazlaʼa a ɓèlèlihai da geda a sulom ga, man a bècè gèɗ tsuvomhi mayamhai.

⁴³ Kinè ndohi nte deɓa, vo-slubordo ndohi na; aman nengaʼa a jhèdè aman ndohi nʼnga na matakwan ta pil gèɗ a géɗ Pombaz ɓèlèlihi na, a tila ta kokwar na a ndohi na.

⁴⁴ Moise a mshkè, a ngaɗa ta ma di-mèsh haha tèlèba a ndohai, ta a nda Jo-sué, kra Nun.

⁴⁵ Aman Moise a nʼndeva ma haha tèlèba a sam ndohi Israel,

⁴⁶ a ngaɗa ta: Va-fu gèɗ a ma haha man i njè kinè a gèɗ a patsna tèlèba, a kin da njè ta wudahi kinè, a ta gi maya, a ta jèjèrèʼa, ma tèlèba te ma kita haha.

⁴⁷ Ma ambali genè ka ɓai a sam kinè, aman ma nshèffè kinè; a ma haha kin nderɗa nshèffè kinè a ma ma tʼherkeda man kin da kwèrèʼa, aman kin da tawaɗa woyam Jourdain ma.

Moise a rka kokwar Canaan

⁴⁸ A pats nasa Ndo nzi pèc pècèk a ngaɗa na Moise:

⁴⁹ Tüva za Abarim, za Nebo, te kokwar Moab, zuraʼa a ma Jéricho. Ngul di a kokwar Canaan man i va ta ndohi Israel a skwi ta.

⁵⁰ Te deɓaʼa ka metsi ngaya a géɗ za man ka teva a pa sa, a ka dè a va babhi ngaya, lèmèlèmè ara Aaron, kramam ngaya man a mets na a géɗ za Hor, a mʼmets na a va babhi nengaʼa.

⁵¹ A géɗ man kin lèɓèslè ɓai te ndev ndohi Israel, a ma iyam Meriba, te Kades, tʼhèshèkèɗ Tsin, a géɗ man kin slebardyè ara Zhiklè nkezlaʼa te ndev ndohi Israel ɓai.

⁵² Ka da pi di a kokwar dra, aman a pa, ka dè azɓai, a kokwar man i va ta ndohi Israel.