Deutéronome 31 - Ma Zhiklè

Moise a gaɗa na Josué

¹ Moise a ngaɗa ta ma haha a ndohi Israel tèlèba a vaʼa: A patsna, mvi ga 120.

² I slaha a i shèwèlè asaɓai. Ndo nzi pèc pècèk a ngadayè: Ka da tèwèɗè woyam Jourdain asaɓai!

³ Ndo nzi pèc pècèk, Zhiklè kinè, a ri na a dè a ma kinè, a da gédèshè ndohi herkeda haha a ma kinè, a kin da gi a bi ta.

⁴ Josué ba a dè a ma kinè, ara man Ndo nzi pèc pècèk a gaɗa. Ndo nzi pèc pècèk a da ga ta ndohi herkeda haha ara man a ngau a sam Sihon a Og, bihi ndohi Amor, man a gedas ta a nda kokwar ta.

⁵ Ndo nzi pèc pècèk a da pe ta a ri a kinè, a kin ga ta ara man i njè kinè.

⁶ Va-gsa ndav kinè, va-nze taraʼa, kin gu zlau ɓai, kin gudzu ɓai a sam ta! Aman Ndo nzi pèc pècèk Zhiklè kinè, a ri na a dè a tsagi kinè, a jèk kinè azɓai, a pre kinè azɓai.

⁷ Moise a mbaha na Josué, a ngaɗa na a sam di ndohi Israel tèlèba: Gsa ndav ngaya, nze taraʼa! Aman ka dè a nda ndohi haha a kokwar man Ndo nzi pèc pècèk a mbaɗa ta babhi ta, a da va ta. Ka, ka da va ta.

⁸ Ndo nzi pèc pècèk a ri na a dè a ma ngaya, a da zhè a tsagi ngaya, a jèk ka azɓai, a pre ka azɓai. Ka gu zlau ɓai, ka gudzu ɓai!

Njèngè ma kita tʼhwaɗ mvi mwuffe

⁹ Moise a mwindo ma kita haha, a mva ta ndohi mvi skwi a Zhiklè, ndohi Lévi, man ta zuɓ koti ma kita Ndo nzi pèc pècèk, a ndohi Israel nhalaʼa tèlèba.

¹⁰ Moise a mva ta ma haha: Mvi 7, mvi 7, tʼhwaɗ mvi mwuffè, te ngolala te godzovok,

¹¹ aman ndohi Israel tèlèba ta shkè a ta zlècè a sam Ndo nzi pèc pècèk, Zhiklè kinè, a sam man a ngotskoɗauda, kin da jèngè ma kita haha a zlembaɗ ndohi Israel tèlèba.

¹² Kin da ɓic ta ndohai, ngurhi, ngwozi, wudahi, mbrokihi man ta zhè a sam kinè, a ta tsenaʼa, a ta sun ngi zlau Ndo nzi pèc pècèk, Zhiklè kinè, a ta jèjèrèʼa, a ta gi skwi tèlèba ara ma kita haha a gaɗa.

¹³ A wudahi tengaʼa man ta sun ma kita haha ɓai, ta tsenaʼa, a ta sun ngi zlau Ndo nzi pèc pècèk, Zhiklè kinè, te kokwar man kin da cè a skwi kinè, te deɓ man kin tawaɗa woyam Jourdain ma, a ta jèkè azɓai.

¹⁴ Ndo nzi pèc pècèk a ngaɗa na Moise: Na haha, ka da metsi ngaya ndul ndul. Baha na Josué, vo-do a gi mɓicè-va! I da njè na ma ga a gèɗ. Moise a Josué to do a gi mɓicè-va.

¹⁵ Ndo nzi pèc pècèk a ngudko va te gai, te va vanai. Vanai a nzlatsa a magai.

Ndo nzi pèc pècèk a gaɗa na Moise, ga a metsi na

¹⁶ Ndo nzi pèc pècèk a ngaɗa na Moise: Na haha ka da metsi ngaya, a ka dè a va babhi ngaya. A ndohi haha ta da dè a ta da kèlèhi a deɓ sak zhiklèhi ngidè tsaɗ te kokwar man ta dè a pa. Ta da jèkyè, ta da gi mali a sam nderzlè-ma man i gu a nda ta.

¹⁷ A pats nasa i da gi ndav worworaʼa a géɗ tengaʼa. I da jèke ta, i da ngheda di ga a sam ta. Ta da gedas ta, ta kèlèhi a matakwan tsaɗ tsaɗ a ndev ɓai, ta lèyè, te deɓaʼa ta da gaɗa: Matakwan haha a ga nga, a géɗ man Zhiklè nga a te ndev nga ɓi Se?

¹⁸ Aman iye i ngheda va ga a sam di ta a pats nasa, a géɗ skwi man ambaɓi tèlèba man ta gau, aman ta dzodzor zhiklèhi ngiɗè tsaɗ.

¹⁹ Anai va-windo dimèsh haha. Slebda ta ndohi Israel, va ta a ma tengaʼa, a dimèsh haha da gu a malwudai te ndev ndohi Israel.

²⁰ Aman i de ta ndohi haha a kokwar man i mbaɗa ta babhi tengaʼa i da va ta, kokwar man wa a vongwom a hi te pa, a ta da ndi skwi te pa a ta da ngeza hwaɗ, a ta gre ta. Te deɓaʼa ta da jèkyè, ta jèjèr zhiklèhi ngidè tsaɗ, ta tsi ri a tengaʼa. Ta da derɗyè, ta gi mali a sam nderzlè-ma ga.

²¹ Te deɓaʼa matakwan tsaɗ tsaɗ kumba, a nlèyè, a da gs ta, a dimèsh haha man a pca ta a gèɗ azɓai, a gi a skwi malwuɗi a sam ndohi haha. I sun skwi man ta hérè te ndav ta a vava, antanta langa, ga i de ta a kokwar man i mbaɗa a i da va ta.

²² A pats sa, Moise a mwindo dimèsh haha, a nslebda ta ndohi Israel.

²³ A Ndo nzi pèc pècèk a njè na ma a gèɗ a Josué, kra Nun, a ngaɗa: Gsa ndav ngaya, nze taraʼa, aman ka, ka de ta ndohi Israel a kokwar man i mbaɗa, i woy a i va ta. Iyè a ri ga i zhè a nda ka.

²⁴ Aman Moise a mwindeda ma kita haha a ɗèlèwèr klèng ma,

²⁵ a ngaɗa ta ndohi Lévi, aman ta zuɓ koti ma kita Ndo nzi pèc pècèk:

²⁶ Vo-co ɗèlèwèr ma kita haha, va-feda a koti nderzlè-ma Ndo nzi pèc pècèk, Zhiklè kinè, a nzi te pa, a gi malwuɗi a sam ngaya.

²⁷ Aman i sun ndav ngaya man a huɓètè, i suna ara man ka salay va a gèɗ. Aman kin slambaɗa na va a Ndo nzi pèc pècèk, te va man i zhè a nshèffè dai, te ndev kinè, holholaʼa man i da mets ga ma!

²⁸ Va-ɓic ta ndohi nhalaʼa tèlèba a sam ga, a ndohi te verzi kinè, tsuvomhai, a bihai. I dé gèɗ ma ga haha a sam ta. Giɗfèk a herkeda ta da gi malwuɗi ga!

²⁹ Aman i suna, man i da mets ga ma, kin da gi malai, kin da jèke-da civèɗ man i nje kinè a gèɗ; te deɓ skwi tèlèba, matakwan a da gs kinè, aman kin da gi skwi man ambaɓai a sam Ndo nzi pèc pècèk, a kin poko na gèɗ auda a skwi man kin gi a ri kinè.

Dimèsh Moise

³⁰ A Moise a goɗ ma te dimèsh haha tèlèba, a sam di ndohi Israel mɓicaʼa tèlèba: