Deutéronome 30 - Ma Zhiklè

Ndo man a woy nshèffè, ndo man a woy mʼmetsai

¹ Aman skwi haha tèlèba a da ga ka, mpshè ma ba a ma mphomdaʼa ba man i ngra ka – aman ka da cè a ndav zuraʼa te ndev ndohi herkeda tèlèba man Ndo nzi pèc pècèk, Zhiklè ngaya, a da dzam ka a pa,

² aman ka da menkada deɓa a sam Ndo nzi pèc pècèk, Zhiklè ngaya, a ka fi gèɗ a daʼai nengaʼa, a ndav ngaya tèlèba, a nshèffè ngaya tèlèba, ki nè a wudahi ngaya, ara ma tèlèba man i njè ka a patsna,

³ te deɓaʼa Ndo nzi pèc pècèk, Zhiklè ngaya, a da helka ta ɓèlèlihi a deɓa, ka da sia te va, a da ɓic kinè a deɓa te ndev ndohi herkeda man Ndo nzi pèc pècèk, Zhiklè kinè, a nksar kinè a pa.

⁴ Ko ta dzam ka a verzi herkeda ngidè dra, Ndo nzi pèc pècèk, Zhiklè ngaya, a da ɓic ka te pa, a da woy ka te pa.

⁵ Ndo nzi pèc pècèk, Zhiklè ngaya, a da cka ka a deɓa a kokwar man babhi ngaya ta ngotso, a gi a skwi ngaya. A da ga ka skwi man amba, a da gi a ka mènè a vata a fena man a babhi ngaya.

⁶ Ndo nzi pèc pècèk, Zhiklè ngaya, a da va ka ndav mɓuaʼa, kinè a ndohi te verzi ngaya, ndav mɓuaʼa te nʼngél ngwon genè ka ɓai, te ntil ndav ngaya. A ka da woy Ndo nzi pèc pècèk, Zhiklè ngaya, a ndav ngaya tèlèba, a nshèffè ngaya tèlèba, a ka da nzi a nshèffè.

⁷ Ndo nzi pèc pècèk, Zhiklè ngaya, a da ngwoda ta ma mphomda haha tèlèba a gèɗ a mayamhi ngaya, a géɗ tengaʼa man ta gi shèwa a ka, a ta paraha ka.

⁸ Aman ka, ka da menkada deɓa a sam Ndo nzi pèc pècèk, ka da fi gèɗ a daʼai nengaʼa, a ka da gi skwi tèlèba ara ma nkwèr haha man i njè ka a patsna.

⁹ Ndo nzi pèc pècèk, Zhiklè ngaya, a da va ka skwi kumba a ndev ɓai, aman mizlinè ri ngaya a gi amba, a wudahi ngaya, a wud skwi a rèwè ngaya a nyi herkeda ngaya ta gi amba, te man Ndo nzi pèc pècèk a wuffè zaʼa, aman ka nzi amba amba, ara man a wuffa a sam babhi ngaya.

¹⁰ Aman sèi ka da fi gèɗ a daʼai Ndo nzi pèc pècèk, Zhiklè ngaya, a ka jèjèr ma nkwèr nengaʼa a ma kita nengaʼa, mwindèa te ɗèlèwèr ma kita haha; a ka menkada deɓa a sam Ndo nzi pèc pècèk, Zhiklè ngaya, a ndav ngaya tèlèba, a nshèffè ngaya tèlèba.

¹¹ Ma nkwèr haha man i njè ka a patsna, a vava a fena wuɗi ngaya azɓai, ka slaha ka giaʼa.

¹² Nte zhiklè ka ɓai, aman ka da gaɗa: A ndè zhiklè a nda ckoɗahai, a nga cinèʼa, a nga da giaʼa, wa?

¹³ Nte wud woyam mbiaʼa a ka ɓai, aman ka da gaɗa: A ndè ahngata a wud woyam a nda ckoɗa haha, a nga cinèʼa, a nga da giaʼa, wa?

¹⁴ Az arsa ɓai! Nengaʼa a zhè ndul ndul a sam ngaya, na zhè te ma ngaya, na zhè te ndav ngaya, aman ka da giaʼa.

¹⁵ Na haha a patsna i ngra ka: nshèffè a skwi man amba – mʼmetsai a skwi man ambaɓai.

¹⁶ Aman a patsna i njè ka aman ka woya Ndo nzi pèc pècèk, Zhiklè ngaya, a ka bizhè a civèɗ nengaʼa, a ka jèjèr ma nkwèr nengaʼa, ma kita nengaʼa, ma man a de ka a vna, a ka da nzi a nshèffè, a ka mènè a vata; Ndo nzi pèc pècèk, Zhiklè ngaya, da pshè ka ma te kokwar man ka da dè a pa.

¹⁷ Aman ka ngwoda ndav ngaya, a ka gi mèdègèɗ, a ta pe ka a wai a ka kèlèhi a deɓ sak zhiklèhi ngiɗè, a ka tsi ri a tengaʼa,

¹⁸ i gaɗa ka a patsna – ka da zi ngaya, ka nzi kumba azɓai te kokwar man ka da dè a pa, te deɓ man ka tawaɗa Jourdain ma.

¹⁹ A patsna giɗfèk a herkeda malwuɗihi ga: i ngra ka nshèffè a mʼmetsai, mpshè ma a ma mphomdaʼa. Ngotsko nshèffè auda! – a ka da nzi a nshèffè, ka a ndohi te verzi ngaya,

²⁰ a ka woy Ndo nzi pèc pècèk, Zhiklè ngaya, a ka fi gèɗ a daʼai nengaʼa, a ka gshè va a vna. Aman nshèffè ngaya a hün te pa; a Zhiklè a da nderɗa ka pats nshèffè ngaya a ma ma. Aranta ba ka da nzi te kokwar man Ndo nzi pèc pècèk a mbaɗa a da va ta babhi ngaya, Abraham, Isaac a Jacob.