Deutéronome 3 - Ma Zhiklè

Israel a ngu a ngul Og

¹ A nga ngalda ma nga a civèɗ ndè Basan. Og, bi Basan, a mshkè a ngu var a nga, nengaʼa a ndohi nengaʼa tèlèba, te Edrei.

² Ndo nzi pèc pècèk a ngadayè: Ka gu zlau nengaʼa ɓai, i va kinè nengaʼa a ndohi nengaʼa, a kokwar nengaʼa tèlèba a ri a kinè. Ka da gi a vna ara man ka gu a sam Sihon, bi Amor, man a nza te Hesbon.

³ A Ndo nzi pèc pècèk, Zhiklè nga, a mva nga Og, bi Basan ba, a ri nga, a ndohi nengaʼa tèlèba. Nga bazl ta, ko staɗ mʼmbel ɓai, a njèka ɓai.

⁴ Te ndev nasa, nga duma kokwar nengaʼa tèlèba, ko staɗ nfen nga ɓai. Kokwar tèlèba 60, sam Argob, kokwar-bi Og te Basan tèlèba.

⁵ Kokwar nʼngala te pa, a zlazlar ngurèa, a ntamagi mɓaraʼa, a kokwar ngidè a dala kumba.

⁶ Nga gedas ta tèlèba, a nga phomde ta, ara man nga gu a sam Sihon, bi te Hesbon. Nga phomde kokwar tèlèba, ngurhi a ngwozi a wudahi nkèshnkeshèʼa.

⁷ Aman skwai, a kolongwi kokwar, nga hulkoɗa rai.

⁸ Te ndev nasa nga helama ta kokwar te wud woyam Jourdain, a hinè te woyam Arnon, ha ndè a za Hermon, te ri bihi ndohi Amor cèw.

⁹ Ndohi Sidon ta baha na Hermon Sirion, a ndohi Amor ta baha na Senir.

¹⁰ Kokwar tèlèba a vara, Galaad tèlèba, Basan tèlèba, ha ndè Salca a Edrei, kokwar te kokwar-bi Og a Basan tèlèba, nga dum ta.

¹¹ Og, bi Basan, staɗgenè man a mʼmets ɓai, te verzi ndohi Rephaim (sam mʼmènè nengaʼa züdo, na zhè te Rabath, man a Ammon, ngurèa a tsi ri 9, nguzlohaʼa a tsi ri 4).

Ndohi a ma woyam Jourdain, te civèɗ mvèng pats

¹² Te ndev nasa nga duma kokwar sa, a hinè te Aroer, a ma woyam Arnon, a za Galaad rètaʼa, a kokwar nengaʼa tèlèba, a i va ta a ndohi Ruben a Gad.

¹³ Aman njèkèɗiaʼa Galaad a Basan tèlèba, kokwar-bi Og, a i va ta rèta ndohi Manassé: sam Argob a Basan tèlèba, sam man ta baha na Rephaim.

¹⁴ A Jair, kra Manassé, a nco sam Argob tèlèba, ha ndè a kuma ndohi Gueshur a Maacath, a mbaha ta kokwar Jair, te Basan, a nzlembaɗ na, ha patsna.

¹⁵ Galaad, i va na Makir.

¹⁶ A hinè te Galaad; ha ndè a ma woyam Arnon, kuma te ndev woyam, ha ndè a ma woyam Jabbok, man a ndohi Ammon, i va ta ndohi Ruben a Gad,

¹⁷ a vara a ma Jourdain, a hinè te Kinnéreth, ha ndè a ma woyam mbiaʼa nduzoa, woyam boma mbiaʼa, a der za Pisga, te civèɗ mvèng pats.

¹⁸ Te ndev nasa i gaɗa kinè: Ndo nzi pèc pècèk, Zhiklè kinè, a mva kinè kokwar haha a skwi kinè. Vo-do a ma kramamhi kinè, ndohi Israel, va ndzawaʼa, kinè ndohi var tèlèba.

¹⁹ Sèi ngwozi kinè, a wudahi kinè nkèshkeshèʼa, a rèwè skwi kinè (rèwè skwi kinè a zhè kumba, i suna) ta da nzi te kokwar kinè man i va kinè.

²⁰ Ha pats man Ndo nzi pèc pècèk a mva ta nshèk va a kramamhi kinè, lèmèlèmè ara man a kinè, a tengaʼa ba ta kwèr kokwar man Ndo nzi pèc pècèk, Zhiklè kinè, a va ta, te wud woyam Jourdain. Te deɓaʼa kin dè a deɓa, staɗ staɗ tèlèba a sam skwi na man i va kinè.

²¹ Te ndev nasa Josué ba i gaɗa na: Ka rka skwi tèlèba man Ndo nzi pèc pècèk, Zhiklè ngaya, a ga ta bihi cèw; Ndo nzi pèc pècèk, a da gia arsa a sam kokwar-bihi tèlèba man ka da bizhè a pa.

²² Kin gu zlau tengaʼa ɓai! Aman Ndo nzi pèc pècèk, Zhiklè kinè, a da gi var te di man a kinè.

Moise a dè Canaan azɓai

²³ Te ndev nasa i tsu ri a Ndo nzi pèc pècèk, a i gaɗa na:

²⁴ Bi-Zhiklè, Ndo nzi pèc pècèk, ka man ka hüno nʼngreda na nʼnjèl ngaya a ri ngaya, man wuɗi na zhè, a ɓèl ngaya. Zhiklè ngar ka wa, te Zhiklè te géɗèʼa, a gèɗ herkeda ba? Man a gi skwi mbiaʼa ara ngaya, a skwi nrkedi ara man a ngaya?

²⁵ Aman agassa i slaha a i dè a i rka kokwar mbelaʼa te wud woyam Jourdain, a za mbelaʼa matsa, a za Liban!

²⁶ Aman Ndo nzi pèc pècèk a ngu ndav a gèɗ ga, a gèɗ ma kinè, a nfa zlembaɗ a ma ga ɓai. A Ndo nzi pèc pècèk a ngaɗayè: Jèkeda ma ngaya sa – ka menka na gèɗ asaɓai!

²⁷ Do a gèɗ za Pisga, ngul dai te civèd nkèl pats, te man a tsagi a tsagai, te civèɗ mvèng pats, war a di ngaya! Aman ka da tèwèdè woyam Jourdain azɓai!

²⁸ Njè na ma ngaya a Josué, va-na wuɗai, nzalaʼa aman nengaʼa a da tèwèɗèʼa a ma ndohi haha, a nengaʼa a da va ta kokwar man ka rkaʼa, a skwi ta.

²⁹ A nga nza te nkulgodok, zuraʼa a Beth-Peor.