Deutéronome 29 - Ma Zhiklè

Nderzlè-ma te kokwar Moab

¹ Na haha ma nderzlè-ma man Ndo nzi pèc pècèk a njè na a Moise, man a da va ta ndohi Israel te kokwar Moab, a va nderzlè-ma ngidè man a mva ta a der za Horeb.

² Moise a mbaha ta ndohi Israel, a ngaɗa ta: Kin rka skwi tèlèba man Ndo nzi pèc pècèk a ngau a sam di kinè te kokwar Egypte, a sam Pharaon, a sam ɓèlèlihi na, te kokwar nengaʼa tèlèba:

³ matakwan mbiaʼa man di ngaya a rkaʼa, nrkedai a skwi man Zhiklè a ngreda auda.

⁴ Aman ha patsna, nda a gèɗ kinè di ɓai, ndav kinè a nzlembaɗ kinè mwine di ɓai.

⁵ Ndo nzi pèc pècèk a sawalda kinè tʼhèshèkèɗ mvi 40; maslaka a va ngaya nhal ɓai, kotokoroh te sak ngaya nʼnde ɓai,

⁶ kin nda ɗaf ɓai, kin sa zom a barassa ɓai, a kin da suna, iyè i Ndo nzi pèc pècèk, Zhiklè kinè.

⁷ Kin ndikkaɗa a sam nta: Sihon, bi Hesbon, a Og, bi Basan, ta shkè aman ta gi var a nga, a nga ga a ngu-raʼa.

⁸ Nga duma kokwar ta, nga va ta a ri a ndohi Ruben, Gad, a rèta ndohi te verzi Manassé.

⁹ Gar haha va-dzodzor ma nderzlè-ma haha, a kin da giaʼa, a skwi tèlèba man kin giaʼa a gi amba.

¹⁰ A patsna kin zlècè a sam Ndo nzi pèc pècèk, Zhiklè kinè, kin tèlèba, tsuvomhi verzi Israel, ndohi kinè nhalaʼa, bihi sojè, ngurhi Israel tèlèba,

¹¹ wudahi kinè, ngwozi kinè, ndo mbrok man a zhè te gi kinè, ko ndo nʼngél wof, ko ndo ndérh iyam.

¹² Kin zlècè aman kin humda a nderzlè-ma Ndo nzi pèc pècèk, Zhiklè kinè, nderzlè-ma haha man a goɗ a mʼmbèdè, man Ndo nzi pèc pècèk, Zhiklè ngaya a gi a nda kinè a patsna;

¹³ a nʼnga kinè a patsna a ndohi nengaʼa, a ngi a Zhiklè kinè, ara man a goɗa, ara man a mbaɗa ta babhi kinè, Abraham, Isaac a Jacob.

¹⁴ Nderzlè-ma haha man i mbaɗa, i goɗ ambali ka ɓai, i durzlo a nda kinè genè ka ɓai;

¹⁵ aman a nda kinè man kinè a zhè a haha a patsna, a sam Ndo nzi pèc pècèk, Zhiklè nga, a nda nengaʼa man a patsna az a haha ɓai.

¹⁶ Kin suna ara man kin nza te kokwar Egypte, ara man nga beza a ndev ndohi herkeda ngidè.

¹⁷ A kin rka skwi hori a skwi mʼmbèh skwi tengaʼa, ngaʼa a wof a kwa, a verzhègenè, a guro man ta zhè a sam ta.

¹⁸ Te ndev kinè, ko nguraʼa, ko ngwoz, ko ndohi gai, ko gwol ngwai, da jèkeda Ndo nzi pèc pècèk, Zhiklè nga, a patsna ɓai a nda tsi ri a zhiklèhi mbèh skwi ndohi herkeda sa. Zluzlor man dèrè te pa, a dèrvowa, i woya a sam kinè ɓai.

¹⁹ Ndo man a ntsena ma nderzlè-ma man i mbaɗa haha, da fu va te ndav na ɓai, aman a gaɗa: Gumi a zhè genè; i da gi ara man ndav ga a woya genè; ko iyam azɓai, zom a zhè genè!

²⁰ Ndo nzi pèc pècèk a da pre mali nengaʼa azɓai. Aman Ndo nzi pèc pècèk a da gi ndav, a da gi srak a géɗ ndo haha, a ma mphomdaʼa tè-lèba man a Windo te nderzlè-ma haha a da kèlè a géɗ nengaʼa, a Ndo nzi pèc pècèk a da zedko nzlembaɗ nengaʼa auda tʼhwaɗ giɗfèk.

²¹ Ndo nzi pèc pècèk a da cè auda te va ndohi Israel tèlèba, a kèl-dèʼa a matakwan, ara ma mphömdè ndo te nderzlè-ma haha tèlèba, man a Windo te ɗèlèwèr ma kita haha.

²² Ndohi man a ma, wudahi man kin da yia dai, a ndo mbrok man a da shkè te kokwar dra, man ta da rka mblè a matakwan man Ndo nzi pèc pècèk a ntsu kokwar haha a nʼngwoda herkeda a vna;

²³ aman ta da rka skwi mvècè vogwa, a boma, a vogwa man a gedassaʼa; tser azɓai, nyi skwi azɓai, mandi a grè azɓai, ara Sodome a Gomorrhe, Adma a Tseboim, man Ndo nzi pèc pècèk a ngedas ta a ndav a ndzoan nengaʼa –

²⁴ ndohi herkeda tèlèba ta da gaɗa: Ndo nzi pèc pècèk a ga na kokwar haha arsa èhèmè? Ndzoan mbiaʼa, shèwa mbiaʼa haha èhèmè?

²⁵ A ta mbeɗa ta a ma: A géɗ man ta jèkeda nderzlè-ma man ta gu a Ndo nzi pèc pècèk, Zhiklè babhi ta, man a nhelka ta auda te kokwar Egypte.

²⁶ A géɗ man to do a ta tsu ri a zhiklèhi ngiɗè, ta kalahi a deɓ sak tengaʼa, a zhiklèhi man ta sen ta ɓai, man Ndo nzi pèc pècèk a mva ta civèɗ a pa ɓai.

²⁷ A Ndo nzi pèc pècèk a ngu ndav worworaʼa a géɗ kokwar haha, a ngau ara

²⁸ ma rnphomdaʼa man a Windo te ɗèlèwèr haha tèlèba. Ndo nzi pèc pècèk a ndzam ta auda te kokwar a ndav, a ndzoan, a shèwa mbiaʼa, a wushede ta a kokwar ngidè ara man kin rka a patsna.

²⁹ Skwi nʼnghedaʼa sèi Ndo nzi pèc pècèk, Zhiklè nga, a suna; skwi nʼngreda tʼuda, nga a wudahi nga, a nga sun a mèdèp, a nga da gi ara ma kita haha a gaɗa tèlèba.