Deutéronome 28 - Ma Zhiklè

Ma mpshè ma ndo

¹ Aman ka da tsena daʼai Ndo nzi pèc pècèk, Zhiklè ngaya, a ka da jèjèr ma nkwèr nengaʼa tèlèba, man i njè ka a patsna, Ndo nzi pèc pècèk, Zhi-klè ngaya, a da ga ka a tsuvomaʼa, a fena ndohi herkeda tèlèba.

² Na haha mpshè ma tèlèba man a da zhè a sam ngaya, man ka da ngècèʼa, aman ka da fi gèɗ a daʼai Ndo nzi pèc pècèk, Zhiklè ngaya.

³ Mpshè ma a géɗ ngaya a da zhè te kokwar, mpshè ma ngaya a da zhè te dak.

⁴ Mpshè ma a géɗ ngaya a da zhè a sam wud ngaya, a sam nyi herkeda ngaya, a sam nyi skwi gai, ko tambak, ko zlè. Mpshè ma a géɗ a da zhè a sam skwi haha tèlèba.

⁵ Mpshè ma ngaya a da zhè te gadagar, te zlèlè ngaya.

⁶ Mpshè ma a géɗ ngaya a zhè man ka shkè, mpshè ma ngaya a zhè man ka dè ngaya.

⁷ Ndo nzi pèc pècèk a gi aman ka ngul mayamhi ngaya man ta slambaɗka ka va. Ta da shkè a civèɗ staɗ, ta da hi ta, a ta venda gèɗ ta tèlèba.

⁸ Ndo nzi pèc pècèk a da va ka mpshè ma a wov ngaya, a mizlinè ri ngaya tèlèba. Ndo nzi pèc pècèk, Zhiklè ngaya, a da pshè ka ma te kokwar man a va ka.

⁹ Ka gi a ndohi nkezlaʼa a sam Ndo nzi pèc pècèk, ara man a mbaɗa, aman ka da jèjèr ma nkwèr Ndo nzi pèc pècèk, Zhiklè ngaya, a ka dè a civèɗ nengaʼa.

¹⁰ Ndohi herkeda tèlèba ta da rkaʼa, nzlembaɗ Ndo nzi pèc pècèk a zhè a sam ngaya, a ta da gi zlau ngaya.

¹¹ Ndo nzi pèc pècèk a da va ka skwi kumba kumba, ka da yi wuda kumba, skwi ngaya a da yi wuda kumba, herkeda a da yi skwi kumba, te kokwar man Ndo nzi pèc pècèk a mbaɗa ta babhi ngaya, a da va ka.

¹² Ndo nzi pèc pècèk a da winè gi mèshèlè nengaʼa te giɗfèk, a da zlindè iyam tiɗè samaʼa, a da pshè na ma mizlinè ri ngaya. Ka da va ta skwi a ndohi herkeda kumba; aman ka, ka jhèɗè skwi a sam ta azɓai.

¹³ Ndo nzi pèc pècèk a zhè, a fe ka a ma, a fe ka a deɓa azɓai. Ka zhè te géɗèʼa, tʼhi ka ɓai; aman ka da fi gèɗ a ma nkwèr Ndo nzi pèc pècèk, Zhiklè ngaya, man i njè ka a patsna, a ka jèjèrèʼa, a ka giaʼa, kajèkeda ɓai, ko te civèɗ ri mandai,

¹⁴ ko te civèɗ ri gula, a sam ma nkwèr tèlèba man i va ka a patsna, a ka dè a verzi zhiklèhi ngidè azɓai, a ka tsi ri a tengaʼa azɓai.

Kita a géɗ mèdègèɗ

¹⁵ Aman ka da fi gèɗ a daʼai Ndo nzi pèc pècèk, Zhiklè ngaya, azɓai, a ka gi ara ma nkwèr nengaʼa tèlèba a ma kita nengaʼa tèlèba man i njè ka a patsna, azɓai, na haha a phomda ka te skwi tèlèba:

¹⁶ A phomda ka te kokwar, a phomda ka te gi dau.

¹⁷ A phomda gadagar ngaya a zlèlè ngaya.

¹⁸ A phomde wudahi ngaya, nyi herkeda ngaya, skwi gi ngaya, ko zlè ko tambak, a phomda skwi haha tèlèba.

¹⁹ A phomda ka aman ka shkè, a phomda ka, aman ka dè ngaya.

²⁰ Ndo nzi pèc pècèk a phomde ka, a va ka skwi mwuɗitpa, ta guv ka te ndev skwi tèlèba man ka giaʼa, ha ka gedessa, ha ka za a vava, a géɗ skwi man ambaɓai man ka gau, a ka jèkyè.

²¹ Ndo nzi pèc pècèk a da faha ka gidiɓèr, ha a nʼndedama kokwar man ka da dè a pa tèlèba.

²² Ndo nzi pèc pècèk a da bazl kinè, lamba man a nde kinè, a pa kinè vogwa a va, a hezi kinè a hai, vogwa a va worworaʼa, halala a ngwoda dau a ma, sawara a gurdzo ta jèke ka azɓai, ha ka zi ngaya.

²³ Gidfèk a géɗ ngaya, nara züdo, herkeda tʼhwaɗ sak ngaya, nara züdo.

²⁴ Ndo nzi pèc pècèk a da zlinda lokotor te di man a iyam, a mberfenèk. A da shkèhi te zhiklè a géɗ ngaya, ha ka gedas ngaya.

²⁵ Ndo nzi pèc pècèk a gi a ndohi mayamhi ngaya ta gi ngul ngaya. Kin dè a sam ta, te civèɗ staɗ, kin da hi auda a sam ta a kin venda gèɗ tèlèba, a kokwar-bihi herkeda tèlèba ta gi hori a géɗ ngaya.

²⁶ Nckondohi kinè, ɗiakihi tʼhwaɗ giɗfèk a skwi dak ta ndiaʼa, ndo a dzam ta auda a géɗèʼa azɓai.

²⁷ Ndo nzi pèc pècèk a da va ka mblè Egypte a va, nʼndeverzai, gayè, goya man a ndi gèɗ, man ka mbelè te pa azɓai.

²⁸ Ndo nzi pèc pècèk a da gi aman a tè-wèlèma ka gèɗ, ka rka di ɓai, gèɗ ngaya nza,

²⁹ a ka tètèmè va a géɗ pats, nara ndo mandazlai te ruva. Skwi man ka giaʼa a gi amba azɓai. A pats nshèffe ngaya tèlèba ta ga ka matakwan, ta gi metsar, ndo ntakaha ka azɓai.

³⁰ Medemi ngaya a zhè, ndo ngidè a mènè a vna. Ka da gi gai, ka da nzi a pa azɓai. Ka da gi gi lak, ka ndi nyiaʼa azɓai.

³¹ Ta da zlèhè zlè a sam di ngaya, ka da ndia azɓai. Ta da cèma ka kɗèh ngaya, ta va ka a deɓa azɓai. Ndohi mayamhi ngaya ta ngècè tambaki ngaya, ndo ntakaha ka te pa azɓai.

³² Wudahi a dalahi ngaya, ndohi kokwar ngiɗè ta hilèʼa, di ngaya a rkaʼa, mpataka tengaʼa a keɗa ka a pats nshèffe ngaya tèlèba, aman wuɗi ri ngaya azɓai.

³³ Ndohi kokwar ngiɗè man ka sen ta ɓai, ta da ndi nyi herkeda ngaya, skwi tèlèba man ka gu mizlinè a pa; a ta ga ka matakwan, ta zumda ka gèɗ.

³⁴ Skwi mwuɗitpa man ka da rkaʼa, a zedama ka gèɗ.

³⁵ Ndo nzi pèc pècèk a da ga ka mblè a di sak, a ɗos, man a pkwè azɓai. A da ga ka mblè a hinè tʼhwaɗ sak, ha ndè a gèɗ.

³⁶ Ndo nzi pèc pècèk a da zlinde ka, kinè a bi ngaya man ka da fu a gèɗ ngaya, a sam ndohi herkeda man ko ka, ko babhi ngaya, kin sen ta ɓai. Te pa ka da tsi ri a zhiklèhi ngidè, ngaʼa a wof a kwa.

³⁷ Ndohi herkeda tèlèba man Ndo nzi pèc pècèk a de ka a sam ta ta da rzl ta a géɗ ngaya, ta ngwossaha ka, ta paraha ka.

³⁸ Ka da zleki tser kumba te gi dau ngaya: ka da bicè skwi kèshkata genè, dzarai a nʼndedama.

³⁹ Ka da gi gi lak a ka pizhèʼa; ka da si iyam nyi wof te pa azɓai, ka da ɓicè skwi te pa azɓai, meturɗihi ta ndedama.

⁴⁰ Wof tsna a zhè te kokwar ngaya tèlèba; ka da fèɗè mbar a va ngaya asaɓai, nyi tsna a wush na.

⁴¹ Ka da yi wudahi a dalahai, ta a ngaya ka ɓai, ta dè a ta da gi ɓèlè.

⁴² Skwi nʼndi wof a da ndi wof ngaya tèlèba, a nyi herkeda ngaya tèlèba.

⁴³ Ndo man verzi na tsaɗ a sam ngaya a da fa ka gèɗ, ka dè mènèhi a hai.

⁴⁴ Nengaʼa a da va ka skwai; ka, ka va na a nengaʼa azɓai. Nengaʼa a ma, a ka nte deɓa.

⁴⁵ Ma mphömdè ndo haha tèlèba a da gi a sam ngaya. Ta da paraha ka, a ka da ngècè arsa, ha ka gedassa, a géɗ man ka fu gèɗ a daʼai Ndo nzi pèc pècèk, Zhiklè ngaya ɓai, a géɗ man ka dzodzor ma nkwèr nengaʼa a ma kita nengaʼa man a njè ka ɓai.

⁴⁶ A gi a skwi man a ngra ta a sam ndohi te verzi ngaya tèlèba, a skwi nrkedai.

⁴⁷ A géɗ man ka gu mizlinè Ndo nzi pèc pècèk, Zhiklè ngaya, a mwuffe a ndav tèlè ka ɓai, te va man skwi ngaya tèlèba a zhè a ndev ɓai,

⁴⁸ ka da gi mizlinè mayamhi ngaya, man Ndo nzi pèc pècèk a da zlinde ta a sam ngaya, te va mai, a iyam a dza ka, a ka adai, a ka tèkwèn skwi tèlèba. A da va ka züdo nkelawa a daʼai ngaya, ha a ngedas ka.

⁴⁹ Ndo nzi pèc pècèk a da zlinde ta ndohi herkeda ngiɗè te verzi herkeda dra, man ta shkè a géɗ ngaya ara mangayak; ndohi herkeda man ka sun daʼai tengaʼa ɓai,

⁵⁰ ndohi herkeda man ta pi di shèwa, man ta slébèrdè babgi azɓai, man kra a se ta te va azɓai.

⁵¹ Ta da ndi wud rèwè ngaya, nyi herkeda ngaya, ha ka gedassa. Ta jèka ka dau azɓai, marori a mbar a skwi gai mbiaʼa a nkèshèa azɓai, ha ta zede ka.

⁵² Ta da nza ka ma te kokwar ngaya tèlèba, ha zlazlar ngaya a mʼmbeɗ na, ko zlazlar mbiaʼa man wuɗi ta a zhè, man ka pu ndav a vna, te kokwar ngaya tèlèba. Ta da nza ka ma a ntamagi kokwar tèlèba, te kokwar-bi ngaya tèlèba, man Ndo nzi pèc pècèk, Zhiklè ngaya, a va ka.

⁵³ Te ndev zlau mʼmetsai, te va nlèyè, aman ndo mayam ngaya a da manda ka gèɗ a hai, ka da ndi wud ngaya, zluèɗ wudahi a dalahi ngaya, man Ndo nzi pèc pècèk, Zhiklè ngaya, a va ka.

⁵⁴ Ndo man a sun mi ɓai, man a sun matakwan ɓai, a pi di shèwa a kramam na, a ngwoz man a ndav na, a njèkèɗi wudahi na,

⁵⁵ te ri zlau a ta da woy zluèɗ wudahi na, man a woya a ndiaʼa a hwaɗ na; ta da jèkeda skwi ɓai te ndev zlau mʼmetsai, te nlèyè man ndo mayam ngaya a manda ka gèɗ a hi a vna te kokwar ngaya tèlèba.

⁵⁶ Ngwoz mwalaʼa man a sun mi ɓai, man a sun matakwan ɓai, a woya a mbècèhi a ɗafsak azɓai, baki nengaʼa man a mènè a vna a da sia te va azɓai, ko kra nengaʼa a dem nengaʼa man a yau.

⁵⁷ A da va ta skwi man a shkè auda a ma husloɓ, kra man a myau, a ɓai, azɓai a géɗ man skwi ngiɗè azɓai, a da ti skwi nʼndi na a metsar te ndev zlau mʼmetsai a nlèyè, man ndo mayam a manda na gèɗ a hi te kokwar ngaya.

⁵⁸ Aman ka da jèjèr ma tèlèba te ma kita haha azɓai, a ka gia azɓai, ara man ta Windo te ɗèlèwèr haha, a ka gi zlau nzlembaɗ nʼnzalaʼa, mwuɗitpa,

⁵⁹ man a Ndo nzi pèc pècèk, Zhiklè ngaya, azɓai, Ndo nzi pèc pècèk a da tse ka a nrkedai, kinè a ndohi te verzi ngaya, a mblè mbiaʼa man a pkwè azɓai, a matakwan mbiaʼa man a ndiye azɓai.

⁶⁰ A da faha ka matakwan Egypte tèlèba, te ri nengaʼa ka gudzai; matakwan a gshè va ngaya.

⁶¹ A Ndo nzi pèc pècèk a ri na a da faha ka matakwan a mblè tsaɗ tsaɗ tèlèba, man ta Windo a ɗèlèwèr ma kita haha ɓai, ha a ngedas ka.

⁶² Nshèlèkuraʼa kin kumba, ara bantihai te giɗfèk; te deɓaʼa kin kèshkata genè, a géɗ man kin fu gèɗ a daʼai Ndo nzi pèc pècèk, Zhiklè kinè, ɓai.

⁶³ Lèmèlèmè ara Ndo nzi pèc pècèk a wuffè man a ga kinè skwi man amba, a gi aman kin mènè a vata, lèmèlèmè a da gi ambaha man a zede kine, a gedas kinè. A da hil kinè auda te kokwar man kin da dè a pa, man kin ngotso.

⁶⁴ Ndo nzi pèc pècèk a da ksar kinè a va ndohi herkeda tèlèba, te verzi herkeda ngidè a ngidè. Te pa kin da gi mizlinè zhiklèhi ngidè tsaɗ, man kinè a babhi kinè kin sen ta ɓai, nʼngaʼa a wof a kwa.

⁶⁵ Te va ndohi herkeda haha kin da nzi a gumi azɓai, sam man kin fi gèɗ a pa azɓai, kin da fi verzi a hi azɓai. Ndo nzi pèc pècèk a da mbeɗama kin ndav, di kinè a kuɗai, ndav kinè a lèyè.

⁶⁶ Nshèffè kinè te mpataka genè, kin gudzi a vaɗ a pats, kin fi gèɗ a nshèffè kinè azɓai.

⁶⁷ Te ndev zlau man a ndha ndav kinè, a sam di skwi man kin rkaʼa, kin gaɗa a prèk: Dakwaɗ da shkè! A dakwaɗ ka gaɗa: Sam prèk da shkè!

⁶⁸ A Ndo nzi pèc pècèk a de kinè a kokwar Egypte a géɗ iyam te wurom, a kin dè a civèɗ man i gaɗa kinè te nengaʼa: kin da rka te deɓaʼa asaɓai. Te pa kin da preda va kinè a ma a ri mayamhai, ara ɓèlè, ngurhi a ngwozihai. Ndo nsumka kinè a deɓa asaɓai.