Deutéronome 27 - Ma Zhiklè

Ma kita

¹ A Moise a ndohi Israel nhalaʼa ta njè ta ma haha a gèɗ a ndohai: Va-dzodzor ma nkwèr tèlèba man i njè kinè a gèɗ a patsna!

² Aman kin da tawaɗa woyam Jourdain ma, a kin dè a kokwar man Ndo nzi pèc pècèk Zhiklè kinè a va kinè, kin da ɗizlè kwa mbiaʼa, a kin gi slalia a pa.

³ Kin da windè ma kita haha tèlèba a pa, aman kin tawaɗa woyam Jourdain ma a kin dè a kokwar man wa a vongwom a hi te pa, ara man Ndo nzi pèc pècèk, Zhiklè babhi kinè, a gaɗa kinè.

⁴ Aman kin da tawaɗa woyam Jourdain ma, kin da dizlè kwa haha a gèɗ za Ebal, ara man i njè kinè a patsna, a kin da gi slalia a pa.

⁵ Te pa kin da gi sam mvi skwi a Zhiklè kinè, Ndo nzi pèc pècèk, a kwa, aman kin poslo a züdo ɓai!

⁶ Kin da dizlè sam mvi skwi a Zhiklè, Ndo nzi pèc pècèk, a kwa genè. A gèɗ sam mvi skwi a Zhiklè haha kin ndara na skwi a Ndo nzi pèc pècèk, Zhiklè kinè.

⁷ Kin da va na skwi a nshid gèɗ, a kin da ndi skwi a pa, a kin wuffè a sam Ndo nzi pèc pècèk, Zhiklè kinè.

⁸ Kin da windè ma kita haha tèlèba a deɓ kwa haha, kin da gumda pa mbelembela.

⁹ Moise a ndohi mvi skwi a Zhiklè a ndohi Lèvi ta gaɗa ta ndohi Israel tèlèba: Israel, fu zlembaɗ, tsenaʼa! A patsna kin ga ʼa a ndohi Ndo nzi pèc pècèk, Zhiklè kinè,

¹⁰ a kin da gi skwi tèlèba man ma nkwèr nengaʼa a ma kita nengaʼa a gèdèʼa, man i njè kinè a patsna.

Ma mphömdè ndo

¹¹ A pats nasa Moise a njè ta ma a gèɗ a ndohai:

¹² Aman kin da tawaɗa woyam Jourdain ma, Siméon, Lèvi, Juda, Issacar, Joseph a Benjamin ta da zlècè a gèɗ za Garizim, aman ta gèɗè ma mpshè ma a ndo.

¹³ A Ruben, Gad, Aser, Zabulin, Dan a Nephthali ta da zlècè a gèɗ za Ebal, a ta gèdè ma mphömdè ndo.

¹⁴ A ndohi Lèvi ta da gèdè a daʼai mbiaʼa a ndohi Israel tèlèba:

¹⁵ Ndo man a viɗè skwi mbèh skwai, a rèm skwi mbèh skwai, man a ndara na Ndo nzi pèc pècèk, skwi man ri ndo a ngau, a nʼngheda a sam ngidè – da phomda! A ndohi tèlèba ta da mbeda na a ma a ta gaɗa: Amen!

¹⁶ Ndo man a dérɗè bab na a mam na – da phomda! A ndohi tèlèba ta da gaɗa: Amen!

¹⁷ Ndo man a herda kuma nslamagi na a hwaɗaʼa, – da phomda! A ndohi tèlèba ta da gaɗa: Amen!

¹⁸ Ndo man a zlakeda mandazli a civèɗ – da phomda! A ndohi tèlèba ta da gaɗa: Amen!

¹⁹ Ndo man a ngwoda ndo te verzi tsaɗ, kra dikai, a ngwoz mazai – da phomda! A ndohi tèlèba ta da gaɗa: Amen!

²⁰ Ndo man a mènè a ngwoz bab na, – da phomda – a gèɗ man a nderɗè bab na! A ndohi tèlèba ta da gaɗa: Amen!

²¹ Ndo man a nzi a deɓ skwi gai mèmè – da phomda! A ndohi tèlèba ta da gaɗa: Amen!

²² A ndo man a mènè a demam na, dem bab na, man ɓai dem mam na, – da phomda! A ndohi tèlèba ta da gaɗa: Amen!

²³ Ndo man a mènè a skwar na – da phomda! A ndohi tèlèba ta da gaɗa: Amen!

²⁴ Ndo man a keɗa nslamagi na a metsar – da phomda! A ndohi tèlèba ta da gaɗa: Amen!

²⁵ Ndo man ta ruɓa, aman a nkédè ndo man a nʼnga mali ɓai – da phomda! A ndohi tèlèba ta da gaɗa: Amen!

²⁶ Ndo man a jèjèr ma kita haha azbai, a gi arsa azɓai – da phomda! A ndohi tèlèba ta da gaɗa: Amen!