Deutéronome 26 - Ma Zhiklè

Tsuvom skwai

¹ Aman ka da dè a kokwar man Ndo nzi pèc pècèk, Zhiklè ngaya, a va ka a skwi nʼndi gai, aman ka da ngotso a ka nzi a pa,

² ka da hul te tsuvom skwi gi dau ngaya, makaɓai, tʼherkeda man Ndo nzi pèc pècèk, Zhiklè ngaya, a va ka, a ka pi a gadagar, a ka dè a sam man Ndo nzi pèc pècèk, Zhiklè ngaya, a ngotskoɗauda, a nzlembaɗ na a nzi a pa.

³ Ka da zlècè a sam ndo mvi skwi a Zhiklè man a da gi mizlinè a pats sa, a ka da gaɗa na: A patsna i ngreda a sam Ndo nzi pèc pècèk, Zhiklè ngaya, i te kokwar man Ndo nzi pèc pècèk a mbaɗa ta babhi nga, a woya a mva nga.

⁴ A ndo mvi skwi a Zhiklè a da cè gadagar te ri ngaya, a da fedahi a sam mvi skwi a Ndo nzi pèc pècèk, Zhiklè ngaya.

⁵ Ka da gèdè a vaʼa a sam Ndo nzi pèc pècèk, Zhiklè ngaya: Bab ga ndo Aram man a shèwèlè te dak, a mshkè a kokwar Egypte, ndohi az a vata ɓai, a nʼnza te pa. Te pa a ngu a ndohi herkeda mbiaʼa, man wuɗi ta zhè, ta zhè a vata.

⁶ Ndohi Egypte ta ga nga matakwan, ta ga nga wuɗai, ta ga nga ɓèlè.

⁷ Nga kuɗi a sam Ndo nzi pèc pècèk, Zhiklè babhi nga. Ndo nzi pèc pècèk a ntsena daʼai nga, a nrka matakwan nga, skwi mwuɗitpa man a ga nga, nlèyè nga.

⁸ A Ndo nzi pèc pècèk a nhelka nga auda te kokwar Egypte, a ri ngedaʼa, man wuɗi na zhè, a skwi mwuɗitpa man a ngau, a skwi man a ngreda auda a nrkedai.

⁹ A de nga a sam nta, a mva nga kokwar man wa a vongwom a hi te pa.

¹⁰ A kin tsi rai: na haha, Ndo nzi pèc pècèk, i helka tsuvom skwi gi dau, makaɓai, tʼherkeda man ka va nga. Ka da fedahi a sam Ndo nzi pèc pècèk, Zhiklè ngaya, ka da kèlèhi a deɓ sak Ndo nzi pèc pècèk, Zhiklè ngaya.

¹¹ Te deɓaʼa ka da wuffè, a nda ndo Lévi, a nda ndo man verzi tsaɗ, a ko wawa man a zhè a sam ngaya, a gèɗ skwi man amba tèlèba man Ndo nzi pèc pècèk, Zhiklè ngaya, a mva ka, a mva kinè a ndohi gi ngaya.

¹² Aman ka da cè skwi staɗ te va skwi kula, te skwi gi dau ngaya tèlèba, te mvi mamakaraʼa ka va na ndo Lévi, ndo mbrok, kra dikai, a ngwoz mazai; ta da ndiaʼa a ta ngézhè hwaɗ a vna te kokwar ngaya.

¹³ Ka da gaɗa na Ndo nzi pèc pècèk, Zhiklè ngaya: Skwi nkezlaʼa i co auda te gi ga, a i va na ndo Lévi, ndo man verzi na tsaɗ, a kra dikai, a ngwoz mazai, ara man ka gaɗayè tèlèba. Ma nkwèr ngaya i tawaɗaha ɓai, mpcayè a gèɗ ɓai.

¹⁴ I ndaha te va skwi haha te nlèyè ɓai, i helaha a i lizha va ga a vna ɓai, i tsaka skwi ɓai a sam kuɗa. I fu gèɗ a ma Ndo nzi pèc pècèk, Zhiklè ga, a i gau ara man a njèyè a gèɗ tèlèba.

¹⁵ Paka di a hi te giɗfèk, te sam ngaya nkezlaʼa, a ka pshè ta ma ndohi ngaya, Israel, a kokwar man ka va nga, ara man ka mbaɗa ta babhi nga, kokwar haha man wa a vongwom a hi te pa.

Ndohi nkezlaʼa

¹⁶ A patsna Ndo nzi pèc pècèk, Zhiklè ngaya, a njè ka a ka gi ara ma kita a ma nkwèr haha ta gaɗa. Ka da jèjèrèʼa, ka da giaʼa, a ndav ngaya tèlèba, a nshèffè ngaya tèlèba.

¹⁷ A patsna ka pasla na ri a Ndo nzi pèc pècèk, nengaʼa da gu a Zhiklè ngaya, a ka dè a civèɗ nengaʼa, a ka jèjèr ma kita, ma nkwèrè a ma nengaʼa man a de ka a vna, a ka fi gèɗ a daʼai nengaʼa.

¹⁸ A patsna Ndo nzi pèc pècèk a ngaɗa ka aman ka pasla na rai, aman ka da ndi a ndohi na, a skwi na, ara man a gaɗa ka. A ka da jèjèr ma nkwèr nengaʼa tèlèba.

¹⁹ Aman te va ndohi herkeda tèlèba man a gau, a va ka nʼnjèl mbiaʼa man a fena ngidè, a mbi ngaya, a labar ma ngaya man amba, a ka da gi a ndohi nkezlaʼa a sam Ndo nzi pèc pècèk, Zhiklè ngaya, ara man a gaɗa ka.