Deutéronome 25 - Ma Zhiklè

¹ Aman ndohi ta bèzl va a ta dè kita, da pra ndo man nʼnga mali ɓai, da fa na mali a gèɗ ndo man a ngu malai.

² Aman a ngu malai aman ta tsiaʼa, ndo kita da tseda a herkeda, da tsau sak ngam ngam ba, ara mali na.

³ Aman a tsiaʼa, da fena 40 ɓai, man ɓai a da tsiaʼa a vaʼa, kramam ngaya ara skwi ambalai a sam di ngaya.

⁴ Ka da va na dzala a ma zlè man a kizlè dau ɓai!

Ngwoz kramama

⁵ Aman kramamhi ta nzi a sam staɗ, a ngidè a mʼmets na, kra na azɓai, ngwoz ndo man a mets na a dè ngwoz a sam ndo ngiɗè a dala azɓai; aman kramam baki na a da cè a ngwoz, a cè ngwoz kramam na.

⁶ Tsuvom kra man a da yiaʼa a da nzi te di man a kramam na, a cè nzlembaɗ na, a nzlembaɗ nengaʼa a zi auda te Israel azɓai.

⁷ Aman ndo sa a woya ngwoz kramam na ɓai, ngwoz a dè a sam ndohi nhalaʼa, a gaɗa ta: Kramam baki ga a woya a nzeda nzlembaɗ kramam na te Israel, a woya a ncyè a ngwoz, a ya na kra a kramam na ɓai.

⁸ A ndohi nhalaʼa ta da baha na, a ta da gaɗa na.

⁹ Aman a woya bi genè, a gaɗa: I woy a i cè ɓai, te deɓaʼa ngwoz kramam na do do a sam di ndohi nhalaʼa, da suɗama na kotokoroh auda te sak, da njfè na slèslèɓ a dai, da gaɗa na: Ta gi a sam ndo man a woya a ntil gi kramam na ɓai, arsa.

¹⁰ A ta baha na gi ndo arsa te Israel: gi ndo man kotokoroh a te sak na ɓai.

Ma kita ngiɗè

¹¹ Aman ndohi ngidè ta bèzl va, ngidè a ngidè, a ngwoz ndo staɗ a shkè, a woya a nkèldè baki na auda te ri ndo man a tsiaʼa, a nda hil kuɗèc,

¹² ngelama na rai, da se ka te va ɓai!

¹³ Da ngots skwi nlivè skwai te ri ngaya tsaɗ tsaɗ cèw ɓai! – mbiaʼa a nkèshèa.

¹⁴ Te gi ngaya ba, da ngots agoda tsaɗ tsaɗ cèw ɓai, mbiaʼa a nkèshèa!

¹⁵ Sèi ka ngots skwi nlivè skwi amba zuraʼa, agoda amba zuraʼa, a ka nzi a ma ma a nshèffè te kokwar man Ndo nzi pèc pècèk, Zhiklè ngaya, a va ka.

¹⁶ Aman ko wawa man a gi skwi haha, a gi malai man a ndara na Ndo nzi pèc pècèk, Zhiklè ngaya.

Ndohi Amalek

¹⁷ Hur skwi man Amalek a ga ka a civèɗ man kin shkè auda te kokwar Egypte,

¹⁸ ara man kin zlü gèɗ a civèɗ, a nkala ka va te deɓa, a mbazl ta ndohi man ta dzadzar ka te deɓa, man wuɗi ta azɓai, te va man ka ngeza, ntulè nkeɗa ka – a nʼnga zlau Zhiklè ɓai.

¹⁹ Te deɓaʼa man Ndo nzi pèc pècèk, Zhiklè ngaya, a mpreka ka auda te ri mayamhi ngaya man ta tèude ka a pa ma, a va ka nshèk va te kokwar man Ndo nzi pèc pècèk, Zhiklè ngaya, a da va ka a skwi nʼndi gai, a skwi ngaya; ka da zede nzlembaɗ Amalek auda tʼhwaɗ giɗfèk. Da pca ka a gèɗ ɓai!