Deutéronome 24 - Ma Zhiklè

Njèkè ngwoz

¹ Aman ndo ngidè a nco ngwoz, ambaha ɓai, a géɗ man a ngots skwi hori a sam na, a da gi ɗèlèwèr njèkè ngwoz. Aman a mva na a ri ma, da zlinda a deɓa a gi bab na.

² Te deɓaʼa a dè ngwoz a gi ndo ngidè.

³ Aman ndo sa a cèʼa, te deɓaʼa a ndara na, a gi ɗèlèwèr njèkè ngwoz, a nzlinda a deɓa a gi bab na, man ɓai ndo man a nco ngwoz nte deɓaʼa a mʼmets na,

⁴ baki nshèlèkuraʼa man a kwolaʼa a slaha a ncè a deɓa a ngwoz asaɓai, te man a mʼmana a ndo ngiɗè ma, nlizha va na; skwi sa a ndara na Ndo nzi pèc pècèk. Ka da gu mali te kokwar man Ndo nzi pèc pècèk, Zhiklè ngaya, a mva ka a skwi nʼndi gi ngaya ɓai.

⁵ Aman ndo ngiɗè a nco ngwoz tok tok, a dè var azɓai. Ta jhèɗè azɓai. Ta jèkeda, a géɗ man a til gi na, mvi staɗ, a ta wuffè a ngwoz man a co.

⁶ Ta fi vova a hi a slembelom azɓai – ko kwa vova – kala man ta vi nshèffè.

⁷ Aman ka ngècè ndo man a gu metsar a sam kramam na, ndo Israel, staɗ, gar a nʼnga na a ɓèlè, gar a mpredama a ɓèlè, ndo metsar sa sèi ta keɗaʼa. Aranta ka da cè mali auda te ndev ngaya.

⁸ Gu maya a géɗ mblè hutsoɗ, a ka da gi skwi tèlèba ara man ndohi mvi skwi a Zhiklè, ndohi Lévi, ta gaɗa kinè. Va-gu maya a kin gi tèlèba man ta njè kinè.

⁹ Hur skwi man Ndo nzi pèc pècèk, Zhiklè ngaya, a ga na Miriam a civèɗ, man kin shkè auda te kokwar Egypte.

¹⁰ Aman ka va na skwi a hi a nslamagi ngaya a slembelom, ko do a hwaɗ gi nengaʼa a ko do cko skwi te pa a ri ngaya ɓai.

¹¹ Ka zlatsa a nda nengaʼa man a ndzhoɗo skwi te ri ngaya tʼuda, da ckoɗauda a ri na.

¹² Aman ndoʼa ndo ntawassaʼa, ka da manda a gi ɓai.

¹³ Ka va na, ga pats a kèlè, aman a slaha a mʼmènèhi a maslaka na; a da pshè ka ma. A skwi haha a da gi a ngi-zuraʼa ngaya a sam di Ndo nzi pèc pècèk, Zhiklè ngaya.

¹⁴ Ndo mizlinè sulai, ntawassaʼa, mbelawa, ka ga na wuɗi ɓai, ko te va kramamhi ngaya, ko ndo man verzi na tsaɗ,

¹⁵ ko te kokwar ngaya, ko te gi ngaya. Ka da va na Suli na a pats sa, ga pats a kèlè. A géɗ man ntawassaʼa, a slaha a nzhèrè ɓai. Man ɓai a da kuɗi a sam Ndo nzi pèc pècèk a géɗ ngaya, a ka feda mali a gèɗ ngaya.

¹⁶ Da keɗa bab kra a géɗ mali wudahi na ɓai, a wudahi a géɗ mali bab ta ɓai. Staɗ staɗ tèlèba da mets na a géɗ mali na.

¹⁷ Skwi ndo te verzi tsaɗ, a skwi kra dikai, ka da lama na ɓai. Ka co maslaka ngwoz mazai a skwi slembelom ɓai.

¹⁸ Huro, ara man ka gu bèlè te Egypte, a Ndo nzi pèc pècèk, Zhiklè ngaya, a nsumka ka a deɓa. Gar haha i va ka ma nkwèr ga haha, a ka da giaʼa.

¹⁹ Aman ka da ɓicè skwi te gi dau ngaya, a nkèl dau staɗ a pce na a pa, ka minè a deɓa aman ka da co ɓai: a gi a skwi ndo man verzi na tsaɗ, a skwi kra dikai, a skwi ngwoz mazai; a Ndo nzi pèc pècèk, Zhiklè ngaya a pshè ka ma te mizlinè ri ngaya tèlèba.

²⁰ Aman ka da slivè ny i wof, ka da por nslaw-slawaʼa te pa ɓai. Ta gi a skwi ndo man verzi na tsaɗ, a skwi kra dikai, a skwi ngwoz mazai.

²¹ Aman ka da pèr nyi wof te gi lak ngaya, ka da poro njèkèɗiaʼa a pa te deɓaʼa ɓai: ta gi a skwi ndo man verzi na tsaɗ, a skwi kra dikai, a skwi ngwoz mazai.

²² Ka da hérèʼa, ara man ka gu bèlè te kokwar Egypte. Gar haha i va ka ma nkwèr haha a ka da giaʼa.