Deutéronome 23 - Ma Zhiklè

A te va mpi ndohi ɓai

¹ Ndo man kiɓèt, man ɓai ngwon mʼmetsa, na te va mpi ndohi Ndo nzi pèc pècèk ɓai.

² Ndo man bab na a mam na, staɗ te vaʼa ndo Israel ka ɓai, na te va mpi ndohi Ndo nzi pèc pècèk ɓai, ha a ngi verzi ta 10, ta te va mpi ndohi ɓai.

³ Ndo Ammon, ndo Moab, ta te va mpi ndohi Ndo nzi pèc pècèk ɓai, ko verzi ta a gi 10, a mèdèp.

⁴ A géɗ man ta va kinè movar a iyam ɓai, a civèɗ, man kin shkè auda te kokwar Egypte; a géɗ man ta ruɓ Balaam, kra Beor, te Pethor, te Mésopotamie, da phomde ka.

⁵ Aman Ndo nzi pèc pècèk, Zhiklè ngaya, a woya a ntsena ma Balaam ɓai, te man Ndo nzi pèc pècèk, Zhiklè ngaya, a woy ka.

⁶ Ka paha ta di ɓai, ko ta wèl va, ko ta nzi a gumai, a pats nshèffè ngaya tèlèba a mèdèp.

⁷ Ndo Edom da ndara ka ɓai; aman nengaʼa kramam ngaya. Ndo Egypte da ndara ka ɓai, a géɗ man ka nza ara mbrok te kokwar nengaʼa.

⁸ Ndohi te verzi tengaʼa mamakaraʼa ta da dè a va mpi ndohi Ndo nzi pèc pècèk.

Dal var, sam nkezlaʼa

⁹ Aman ka da gi var a ndohi mayamhi ngaya, jèkeda skwi ambaɓiaʼa tèlèba.

¹⁰ Aman ndo ngiɗè a zhè a sam ngaya, nzlihèa, iyam va a lizhèa a vaɗ, da shkè auda te va kinè, ndohi var, da mena a deɓa ɓai.

¹¹ A dakwaɗ a pana va na a iyam. Aman pats nkala ma, a slaha a ndè a deɓa a sam kinè.

¹² Woy sam tʼuda, man ka thè kuri a ka thè zi a pa.

¹³ Woy devar te va kolongwi ngaya a ka da ri zi a vna.

¹⁴ Aman Ndo nzi pèc pècèk, Zhiklè ngaya, a shèwèlè te ndev sam man ka a pa, aman a ɓer ka, a pa ka mayamhi ngaya a ri a ka. A woy sam ngaya nkezla, a Ndo nzi pèc pècèk a rka skwi nlizhèa a sam ngaya azɓai, man ɓai a da mindè va na de deɓa a sam ngaya.

Ma kita ngidè

¹⁵ Ɓèlè man a nhu na te gi babgi na, a hi a sam ngaya, ka mindè a deɓa azɓai.

¹⁶ Da nza a sam ngaya, te ndev kokwar ngaya, a sam man a ngotso, te kokwar ngaya staɗ, ara man ambaha. Ka da ga na wuɗi ɓai.

¹⁷ A woy dem nsossura a te va dalahi Israel ɓai – a woy golahi man ta mènè a va ta a te va ndohi Israel ɓai.

¹⁸ Suli fali dam, Suli ndo mphomaʼa ka ckoɗa gi Ndo nzi pèc pècèk, Zhiklè ngaya, ɓai, a géɗ ma mèmè man ta gadda hai. Aman cèw ba skwi man a ndara na Ndo nzi pèc pècèk, Zhiklè ngaya.

¹⁹ Aman kramam ngaya a jhèɗè skwi a sam ngaya, ka dzhoɗ skwi a deɓa a mpataka a vaʼa te ri nengaʼa ɓai, ko sulai, ko skwi nʼndai, ko skwi mèmè.

²⁰ Ka slaha ka jhèdè te ri ndo man verzi tsaɗ, aman te ri kramam ngaya ka ɓai; a Ndo nzi pèc pècèk, Zhiklè ngaya, a pshè ka ma te skwi tèlèba man ka da gia te kokwar ngaya, man ka da dè a pa a ka da kwèrèʼa.

²¹ Aman ka gaɗa na ma a hi a Ndo nzi pèc pècèk, Zhiklè ngaya, gau tsam tsam! Aman Ndo nzi pèc pècèk, Zhiklè ngaya, a da dzhaɗ ka a géɗèʼa, ka ngots mali a gèɗ.

²² Aman ka gadda ma a hi ɓai, ka gi mali azɓai.

²³ Aman ma man a shkè auda te ma ngaya, ma man ka gaɗa na hi a Ndo nzi pèc pècèk, Zhiklè ngaya, a géɗ man ndav ngaya a woyaʼa, a ka goɗ te ma ngaya, sèi ka giaʼa ndèzl.

²⁴ Aman ka dè a gi lak nslamagi ngaya, ka ndi nyi wof a ka ngeza hwaɗ a vna. Aman ka parda a gozhèm ngaya ɓai!

²⁵ Aman ka dè a gi dau nslamagi ngaya, ka pèslè a ri genè, aman ka tsu dau nslamagi ngaya a gwodza ɓai!